Read O‘zbek tilidagi Muqaddas Kitob, 2013 Marsiya 3 Bible Online

Marsiya 3 - O‘zbek tilidagi Muqaddas Kitob, 2013 bible

Marsiya 3

¹Azoblarda qolgan insonman, Xudoning g‘azabi tufayli tayoq yedim.

²Boshlab bordi Xudo meni zulmatga, Nur tushmaydigan qorong‘i joyga.

³Yolg‘iz menga qarshi U qo‘l ko‘tardi, Kun bo‘yi meni qayta–qayta jazoladi.

⁴Qaritib yubordi etu terimni, Sindirib tashladi suyaklarimni.

⁵Alamga meni tutqun qildi, Jabru jafo zindoniga meni tashladi.

⁶Majbur qildi meni zimistonda yashashga, O‘xshab qoldim men ancha oldin o‘lgan marhumga!

⁷Qochib ketmasin, deya Xudo atrofimni qurshadi, Og‘ir zanjirlar bilan meni kishanband etdi.

⁸Yordam so‘rab yolvorsam ham men Unga, Quloq solmas U mening fig‘onimga.

⁹Yo‘nilgan toshlar bilan U yo‘limni to‘sdi, Yurgan yo‘limni chalkashtirib yubordi.

¹⁰Poyladi U meni ayiqday, Tashlanmoqchi bo‘ldi menga sherday.

¹¹So‘ng meni sudradi bir chetga, G‘ajidi, tashlab ketdi tang ahvolda.

¹²Xudo O‘z yoyini tortdi, O‘qlariga meni nishon qildi.

¹³Sadog‘idagi o‘qlari bilan yuragimni teshdi.

¹⁴Mana, endi o‘z xalqim ustimdan kulmoqda, Uzzukun ular meni mazax qilib, qo‘shiq kuylamoqda.

¹⁵Xudo menga achchiq o‘tdan yedirdi, Zaharli suvdan menga ichirdi.

¹⁶Meni oyoq osti qilib, tuproqqa beladi, Shag‘al yedirib, tishlarimni sindirdi.

¹⁷Tinchlik bilmas endi mening jonim, Baxt nimaligini tamom unutdim,

¹⁸Shunda o‘zimga dedim: “Adoyi tamom bo‘ldim! “Barbod bo‘ldi Egamga bo‘lgan umidim!”

¹⁹Kulfatu sargardonlik haqidagi o‘ylarim Zaharli suvga, achchiq o‘tga o‘xshaydi.

²⁰Bunday o‘ylarga tolgan mening jonim Tushkunlikka tushdi.

²¹Biroq men bir narsani yodda tutarman, Shuning uchun doim umid qilarman:

²²Egamning sodiq sevgisi bo‘lmaydi ado, Uning rahm–shafqati tugamas aslo.

²³Har tong ular yangilanadi, Buyukdir Xudoning sadoqati!

²⁴Qalbimda aytaman: “Egamdir mening bor–yo‘g‘im, Shunday ekan, yolg‘iz Undadir mening umidim.”

²⁵Egamiz O‘ziga umid bog‘laganlarga yaxshilik qiladi, Unga intilgan har bir jonga ezguligini ko‘rsatadi.

²⁶Egamizning najotini toqat ila kutish yaxshidir.

²⁷Yoshlikdan tarbiyaga bo‘ysunish yaxshidir.

²⁸Rabbimiz tarbiyalaganda, Yolg‘iz o‘tirib, sukut saqlaylik.

²⁹Bunday vaqtlarda yer o‘pib ta’zim qilaylik, Axir, yana umid bordir.

³⁰Tarsaki yeganimizda qarshilik qilmaylik, Eshitgan ko‘p haqoratlarni ichimizga yutaylik.

³¹Zero, Rabbiy bizni abadiy tashlab qo‘ymaydi!

³²Uning O‘zi bizga qayg‘u keltirgan bo‘lsa–da, O‘zi bizga rahm–shafqat qiladi. Axir, Uning sodiq sevgisi buyukdir!

³³Ha, U insonga g‘am keltirib, ozor berishni xush ko‘rmaydi.

³⁴Yurtdagi hamma asirlarning oyoq osti bo‘lganini,

³⁵Odamlar haq–huquqdan mahrum bo‘lganini, Xudoyi Taolo ko‘rib turibdi.

³⁶Bir yoqlama hukm chiqarilganini Rabbiy bilib turibdi.

³⁷Rabbiyning ijozatisiz, Hech kimning buyrug‘i bajo bo‘lmas.

³⁸Yaxshilik ham, yomonlik ham Xudoyi Taoloning amrisiz sodir bo‘lmas.

³⁹Hanuz hayot ekanmiz, Gunohimiz uchun jazo tortganda nolimaylik!

⁴⁰Tutgan yo‘llarimizni yaxshilab tekshiraylik, Egamizga qaytaylik.

⁴¹Qo‘llarimizni osmonga cho‘zib, Chin dildan samodagi Xudoga yolvorib aytaylik:

⁴²“Ey Egamiz! Biz itoatsizlik qildik, Senga qarshi bosh ko‘tardik, Sen bizni kechirmading.

⁴³Sen g‘azabga minib, ta’qib qilding bizni, Shafqatsiz qirding hammamizni.

⁴⁴Iltijolarimiz Senga yetib bormasligi uchun, Bulutlar bilan oldingni to‘sding.

⁴⁵Sen bizni axlatday tashlab yubording, Xalqlar orasida supurindiday qilding.

⁴⁶Mana, barcha yovlarimiz ustimizdan kulyapti.

⁴⁷Biz vahimaga tushdik, tuzoqqa ilindik, Falokatu halokatga giriftor bo‘ldik.”

⁴⁸Sel–sel bo‘lib oqar mening ko‘z yoshlarim, Axir, qirilib ketdi mening xalqim!

⁴⁹[49-50] Egamiz osmondan bizga qaramaguncha, Men to‘xtamay obi diyda qilaman, Tinmay ko‘z yosh to‘kaman.

⁵⁰

⁵¹Quddusdagi hamma qizlarning qismati Yurak–bag‘rimni ezib yubordi!

⁵²Sababsiz dushmanlik qilayotir menga odamlar, Qushni ovlaganday meni ovladi ular.

⁵³Meni tiriklayin chuqurlikka tashlashdi, Chuqurlik og‘zini tosh bilan berkitishdi.

⁵⁴Suvlar ko‘tarilib oshdi boshimdan, “Ado bo‘ldim” dedim ichimda.

⁵⁵Ey Egam, chuqurlik tubidan Senga iltijo qildim.

⁵⁶“Dodimni tingla, yopma qulog‘ingni!” dedim. Sen eshitding bu iltijoimni.

⁵⁷Yolvorganimda Sen menga yaqinlashding, “Qo‘rqma!” deb o‘shanda menga aytding.

⁵⁸Yo Rabbiy, Sen da’voimni himoya qilding, Mening jonimni xalos etding.

⁵⁹Ko‘rding menga qilingan nohaqlikni, Ey, Egam, O‘zing yoqlagin meni.

⁶⁰Yovlarimning til biriktirganini Sen ko‘rding, Menga qarshi qilgan yovuz niyatlarini bilding.

⁶¹Ey Egam, ular mazax qilganini O‘zing eshitding, Menga qarshi til biriktirganini bilding.

⁶²G‘animlarim meni g‘iybat qilar, Kun bo‘yi menga piching otar!

⁶³Qara, ular o‘tirsa ham, tursa ham, Qo‘shiq kuylab, meni mazax qilishar.

⁶⁴Ularning qilmishlariga yarasha, Jazosini bergin ey, Egam!

⁶⁵Yuraklariga g‘ulg‘ula solgin, Ularni la’natga duchor qilgin,

⁶⁶G‘azab bilan ularning ketidan quvla, Yer yuzidan tamomila yo‘q qilib tashla!