Read O‘zbek tilidagi Muqaddas Kitob, 2013 Marsiya 5 Bible Online

Marsiya 5 - O‘zbek tilidagi Muqaddas Kitob, 2013 bible

Marsiya 5

¹Ey Egam, boshimizga tushgan ko‘rgilikni yodingda tutgin, Qanchalik xor bo‘lganimizni bir ko‘rib qo‘ygin!

²Mulk qilib olgan yerimiz ajnabiylar qo‘liga tushdi, Kelgindilar uylarimizga ega bo‘lishdi.

³Otasiz yetimday bo‘lib qoldik biz, Bevaga o‘xshab qoldi onalarimiz.

⁴Biz ichgan suvimizga pul to‘laymiz, Yoqqani o‘tinni sotib olamiz.

⁵Yovlarimiz ta’qib qilib, qo‘ymas bizni holimizga, Charchab ketdik, tinim yo‘q bizga.

⁶To‘yguncha non yeymiz deb, Misr va Ossuriya bilan biz sulh tuzdik.

⁷Ajdodlarimiz gunoh qilib, o‘tib ketdi, Ammo ularning jazosini biz tortyapmiz endi.

⁸Bizga hukmronlik qilayotir qullar, Ular zulmidan bizni kim qutqarar?!

⁹Non izlaymiz, jonimizni qo‘yib xavf ostiga, Chunki kallakesarlar pisib yotibdi dalalarda.

¹⁰Ocharchilik dastidan chiqqan issig‘imiz, Tandirday qizigan bizning badanimiz.

¹¹G‘animlarimiz Quddusda ayollarni zo‘rlashdi, Yahudo shaharlarida qizlarning nomusiga tegishdi.

¹²Qo‘llaridan osishdi yo‘lboshchilarimizni, Xor qilishdi oqsoqollarimizni.

¹³Yigitlar tegirmon toshini tortyapti, O‘g‘lonlar og‘ir o‘tin ostida gandiraklab qoldi.

¹⁴Shahar darvozasida oqsoqollar o‘tirmaydigan bo‘ldi, Yigitlar shodon kuylar chalmaydigan bo‘ldi.

¹⁵Ko‘nglimizni shodlik tark etdi, O‘yin–kulgimiz azaga aylandi.

¹⁶Boshimizdagi tojimiz tushib ketdi, Gunoh qildik! Sho‘rimiz quridi!

¹⁷Dardu alamga to‘ldi yuragimiz, Yig‘layverib xiralashdi ko‘zimiz.

¹⁸Axir, Sion tog‘i huvullab qoldi, Chiyabo‘rilar u yerda izg‘ib yuribdi.

¹⁹Sen esa, ey Egam, abadiy hukmronlik qilasan, Avlodlar osha O‘z taxtingda o‘tirasan.

²⁰Nechun bizni Sen tamom unutding? Nechun uzoq vaqtga tashlab qo‘yding?

²¹Ey Egam, bizni O‘zingga yuz burdirgin, Toki Senga qaytaylik. Qadimgi ulug‘vorligimizni tiklagin.

²²Nahotki Sen bizdan butunlay voz kechding?! Qahru g‘azabingning had–poyoni bordir, axir!