Read O‘zbek tilidagi Muqaddas Kitob, 2013 Hizqiyol 14 Bible Online

Hizqiyol 14 - O‘zbek tilidagi Muqaddas Kitob, 2013 bible

Hizqiyol 14

¹Isroil oqsoqollaridan ba’zi birlari meni ko‘rgani keldilar.

²Shu onda Egamiz menga O‘z so‘zini ayon qildi:

³“Ey inson, bu odamlar butlarga ko‘ngil qo‘yganlar, gunohni o‘zlariga to‘g‘onoq qilganlar. Shunday ekan, Menga maslahat solishlariga qanday yo‘l qo‘yay?!

⁴Sen ularga ayt: — Egamiz Rabbiy shunday demoqda: Butlarga ko‘ngil qo‘ygan, gunohni o‘ziga to‘g‘onoq qilgan, Isroil xalqidan birorta odam payg‘ambar oldiga kelsa, Men, Egangiz, o‘sha odamning sanoqsiz butlariga yarasha javobini beraman.

⁵O‘sha butlari tufayli butun Isroil xalqi Mendan uzoqlashib ketdi, ammo Men beradigan javobim bilan ularning sadoqatini qozonaman.”

⁶Isroil xalqiga ayt: — Egamiz Rabbiy shunday demoqda: “Tavba qilinglar, butlaringizdan voz kechinglar. Jirkanch odatlaringizdan yuz o‘giringlar.

⁷Bilib qo‘yinglar, agar Isroil xalqidan bo‘lgan birorta odam yoki xalqim orasida yashab yurgan birorta musofir Mendan yuz o‘girsa, butlarga ko‘ngil ko‘yib, gunohni o‘ziga to‘g‘onoq qilsa, so‘ng payg‘ambar oldiga kelib, Menga maslahat solsa, o‘sha odamga javobni O‘zim beraman.

⁸Men bunday odamlarga qarshi chiqaman. Boshqalar ularni misol qilib, masallar aytadi. Men ularni xalqim orasidan yo‘q qilaman. O‘shanda Egangiz Men ekanligimni bilib olasizlar.”

⁹“Agar payg‘ambar yanglishib, noto‘g‘ri maslahat bersa, o‘sha payg‘ambarni Men, Egangiz yanglishtirgan bo‘laman. Men unga qarshi qo‘limni ko‘taraman, uni Isroil xalqi orasidan daf qilaman.

¹⁰Men payg‘ambarni ham, uning oldiga maslahat so‘rab kelgan odamni ham birday jazolayman.

¹¹Shunda Isroil xalqi yo‘limdan ozmaydigan bo‘ladi, gunohlari bilan o‘zini bulg‘amaydi. Ular Mening xalqim, Men ularning Xudosi bo‘laman”, deb aytmoqda Egamiz Rabbiy.

¹²Egamiz menga O‘z so‘zini ayon qildi:

¹³“Ey inson, agar biror yurtning aholisi Menga bo‘lgan sadoqatini unutib, gunohga qo‘l ursa, Men ularga qarshi qo‘limni ko‘tarib, butun yurtga ocharchilik yuboraman. Odamlarni bir burda nonga zor qilaman. Yurtdagi odamu hayvonlarni qirib tashlayman.

¹⁴Bunday xalq orasida hattoki Nuh, Doniyor va Ayub payg‘ambarlar yashagan taqdirda ham, ular solihligi bilan faqat o‘z jonlarini saqlab qolgan bo‘lishardi”, deb aytmoqda Egamiz Rabbiy.

¹⁵“Men o‘sha yurt aholisini yirtqich hayvonlarga talatmoqchi bo‘ldim, deylik. Yurt huvullab qolib, hayvonlar tufayli odamlar u yerga oyoq bosmay qo‘ydi ham, deylik.

¹⁶Men barhayot Xudo bo‘lganim haqi ont ichib aytamanki, agar o‘sha uchala payg‘ambar u yerda bo‘lganda edi, ular o‘z bola–chaqasini ham qutqara olmagan bo‘lardi. Ular faqat o‘z jonlarini saqlab qolgan bo‘lardi. Yurt esa xarobazorga aylanardi.

¹⁷Bordi–yu, o‘sha yurtga dushman yuborib, u yerdagi bor jonzotni qilichdan o‘tkazishga qaror qildim, deylik.

¹⁸Men barhayot Xudo bo‘lganim haqi ont ichib aytamanki, agar o‘sha uchala payg‘ambar u yerda bo‘lganda edi, ular o‘z bola–chaqasini ham qutqara olmagan bo‘lardi. Ular faqat o‘z jonlarini saqlab qolgan bo‘lardi.

¹⁹Bordi–yu, Men o‘sha yurtga g‘azabimni yog‘dirib, butun jonzotni o‘lat orqali qirib tashlamoqchi bo‘ldim, deylik.

²⁰Men barhayot Xudo bo‘lganim haqi ont ichib aytamanki, hattoki Nuh, Doniyor va Ayub u yerda bo‘lganda edi, ular o‘z bola–chaqasini ham qutqara olmagan bo‘lardi. Ular faqat o‘z jonlarini saqlab qolgan bo‘lardi.”

²¹Egamiz Rabbiy shunday demoqda: “Men bundan ham battarini qilaman, Quddus ustiga to‘rt xil dahshatli kulfat yog‘diraman. Shahardagi odamlaru hayvonlar urush, ocharchilik, yovvoyi hayvonlar va o‘latdan nobud bo‘ladilar!

²²Ammo ba’zi erkagu ayollar omon qoladilar. Ular qochib, oldingizga keladilar. O‘shanda ularning yurish–turishini, qilmishlarini o‘zlaringiz ko‘rib, Men Quddus ustiga yuborgan hamma kulfatlardan taskin topasizlar.

²³O‘sha odamlarning yurish–turishini, qilmishlarini ko‘rganlaringizdan keyin taskin topasizlar. Qilgan hamma ishlarim bejiz emasligini bilib olasizlar”, deb aytmoqda Egangiz Rabbiy.