Read O‘zbek tilidagi Muqaddas Kitob, 2013 Hizqiyol 26 Bible Online

Hizqiyol 26 - O‘zbek tilidagi Muqaddas Kitob, 2013 bible

Hizqiyol 26

¹Surgun bo‘lgan paytimizning o‘n birinchi yili, oyning birinchi kunida Egamiz menga O‘z so‘zini ayon qildi:

²“Ey inson, mana, Tir Quddus haqida shunday deb aytmoqda: Aha! Xalqlarning savdo darvozasi buzildi. Menga keng yo‘l ochildi. Endi u vayron bo‘lganda men boyib ketaman.”

³Shuning uchun Egamiz Rabbiy aytmoqda: “Ey Tir, Men senga qarshiman! Men ko‘plab xalqlarni senga qarshi yig‘aman, ular dengiz to‘lqinlari kabi senga yopiriladilar.

⁴Shahringning devorlarini buzib, minoralaringni qulatadilar. Men tuprog‘ingni supurib tashlayman, seni yalang‘och bir toshloq holiga keltiraman.

⁵Dengiz o‘rtasidagi bu orolda baliqchilar to‘rlarini yoyib quritadigan bo‘ladilar”, deb aytmoqda Egamiz Rabbiy. “Bu shahar xalqlarga o‘lja bo‘ladi.

⁶Tirga qarashli sohildagi hamma qishloqlar qilichdan o‘tkaziladi. O‘shanda ular Egasi Men ekanligimni bilib olishadi.”

⁷Egamiz Rabbiy shunday demoqda: “Men Tirga qarshi eng buyuk shohni — Bobil yurtining hukmdori Navuxadnazarni qo‘zg‘ataman. U Tir aholisi ustiga shimoldan otlaru jang aravalarni, suvorilaru katta lashkarni tortib keladi.”

⁸“Ey Tir, Bobil shohi senga qarashli barcha qishloqlaringni qilichdan o‘tkazadi. Shahar atrofiga qamal inshootlarini qurdiradi, shahar devoriga qiyalatib tuproq uydiradi, senga qarshi qalqonlarini o‘rnatadi.

⁹Devorteshar qurollar bilan devorlaringga zarba beradi. Boltalar bilan minoralaringni buzadi.

¹⁰Devordan teshik ochilgan shaharga odamlar bostirib kirganday, Bobil shohi sening darvozalaringdan bostirib kiradi. Suvorilarining, g‘ildiragu jang aravalarining shovqinidan devorlaring titraydi. Son–sanoqsiz otlarining ko‘targan changi seni qoplab oladi.

¹¹Otlarining tuyoqlari hamma ko‘chalaringni toptaydi. Odamlaring qilichdan yiqiladi, ulkan ustunlaring yer bilan yakson bo‘ladi.

¹²Dushman boyliklaringni talab ketadi, mollaringni o‘lja qilib oladi. Devorlaringni yiqitadi, hashamatli uylaringni vayron qiladi, toshlari, yog‘ochlari hatto tuprog‘ini ham dengizga uloqtiradi.

¹³Men qo‘shiqlaringga chek qo‘yaman. Arfangning navolari ham eshitilmaydigan bo‘ladi.

¹⁴Men seni yalang‘och bir toshloqqa aylantiraman, baliqchilar to‘rlarini quritadigan bir yer bo‘lasan. Hech kim shahringni qayta qurmaydi. Axir, bularni Men, Egangiz aytdim”, deb aytmoqda Egamiz Rabbiy.

¹⁵Egamiz Rabbiy Tirga shunday demoqda: “Shahringda qirg‘in bo‘lganda, yaradorlar ingraganda, qulashingning shovqinidan sohildagi barcha xalqlarni titroq bosadi.

¹⁶Dengiz bo‘yidagi saltanatlarning shohlari taxtlaridan tushib, zar choponu naqsh solingan liboslarini yechishadi. Ular vahimaga burkanib, yerga o‘tirishadi. Boshingga tushgan kulfatdan dahshatga tushib, to‘xtovsiz titrashadi.

¹⁷Ular sen haqingda shunday marsiya kuylashadi: Ey dong taratgan dengizchilar shahri, Naqadar vayron bo‘lding–a! Sen va sening aholing dengiz qudrati edilaring, Sohildagi barcha xalqlarni dahshatga solarding.

¹⁸Sen qulagan kuning sohillarni titroq bosdi, Halokatingdan dengizdagi orollar sarosimaga tushdi.

¹⁹Egamiz Rabbiy shunday demoqda: “Men Tir shahrini huvullagan xarobazorga aylantiraman. Dengiz tubidagi ulkan suvlar bilan vayronalarni qoplayman.

²⁰Ey Tir shahri, seni go‘rga, qadimda o‘tib ketgan odamlar oldiga tushiraman. Sen yer osti saltanatida yashaysan, abadiy vayronalar orasidagi marhumlarga hamroh bo‘lasan. Tiriklar dunyosiga hech qachon qaytib kelmaysan, obod bo‘lib ilgarigi mavqeingga erishmaysan.

²¹Ha, Men boshingga dahshatli o‘lim keltiraman, seni yo‘q qilaman. Seni qidirganlar seni hech qachon topa olmaydilar”, deb aytmoqda Egangiz Rabbiy.