Read O‘zbek tilidagi Muqaddas Kitob, 2013 Hizqiyol 39 Bible Online

Hizqiyol 39 - O‘zbek tilidagi Muqaddas Kitob, 2013 bible

Hizqiyol 39

¹“Ey inson, Go‘gga qarshi bashorat qilib ayt: Egamiz Rabbiy shunday demoqda: “Ey, Meshex va Tuval bosh hukmdori Go‘g, Men senga qarshiman!

²Men seni orqaga qaytarib, sudrab kelaman. Seni uzoq shimoldan olib chiqib, Isroil tog‘lariga olib kelaman.

³Chap qo‘lingdagi yoying va o‘ng qo‘lingdagi o‘qlaringni urib tushiraman.

⁴Sen Isroil tog‘larida jon berasan! Sening hamma lashkarlaring va senga ergashib kelgan xalqlar u yerda halok bo‘lishadi. Ularning jasadlari turli yirtqich qushlarga va yovvoyi hayvonlarga o‘lja bo‘ladi.

⁵Sen ochiq maydonda o‘lasan. Men shunday dedim”, deb aytmoqda Egamiz Rabbiy.

⁶“Men Mago‘g ustiga va dengiz qirg‘og‘ida osoyishta hayot kechirayotgan barcha xalqlar ustiga olov yog‘diraman. O‘shanda Egasi Men ekanligimni ular bilib oladilar.

⁷Men O‘zimning muqaddas nomimni xalqim Isroilga tanitaman. Meni badnom qilishlariga endi yo‘l qo‘ymayman. Shunda Men Egangiz — Isroil yurtidagi muqaddas Xudo ekanligimni xalqlar bilib oladilar.

⁸Men aytgan o‘sha kun albatta keladi”, deb aytmoqda Egamiz Rabbiy.

⁹“Shunda Isroil xalqi shaharlardan chiqib, mag‘lub bo‘lgan yovning qurol–aslahalarini yig‘adi. Ular yig‘ib olgan kattayu kichik qalqonlarni, yoy va o‘qlarni, tayoq va nayzalarni yoqishadi. Yetti yil davomida ularni o‘tin o‘rniga ishlatishadi.

¹⁰O‘tin yig‘ish, o‘rmonda daraxt chopishga ehtiyoj qolmaydi, chunki bu qurol–aslahalar xalqim uchun yoqilg‘i bo‘ladi. Shu tariqa Isroil xalqi o‘z talonchilaridan o‘ch oladi”, deb aytmoqda Egamiz Rabbiy.

¹¹Bu hodisalar ro‘y bergan kuni Go‘g va uning to‘dasi uchun Men bir qabriston hozirlayman. Bu qabriston O‘lik dengizning sharqiy tomonidagi Sayohatchilar vodiysida joylashgan bo‘ladi. U sayohatchilarning yo‘lini to‘sib qo‘yadi. Shuning uchun sayohatchilar o‘sha vodiyning nomini o‘zgartirib, uni “Go‘g to‘dasining vodiysi”, deb ataydigan bo‘lishadi.

¹²Isroil xalqi yetti oy mobaynida jasadlarni ko‘mib, o‘z yurtini poklaydi.

¹³Butun yurt aholisi jasadlarni ko‘madi. Shu qilganlari uchun Men ulug‘vorligimni namoyon qilgan kunda ular yuksak obro‘ga erishadi”, deb aytmoqda Egamiz Rabbiy.

¹⁴Yetti oy o‘tgach, yurtni poklaydigan maxsus odamlar tayinlanadi. Ular yurtni kezib, ko‘milmay qolib ketgan jasadlarni ko‘madilar.

¹⁵Ular yurtni kezib yurganlarida topgan har bir suyak oldiga belgi qo‘yadilar. Go‘rkovlar bu suyaklarni yig‘ib olib, “Go‘g to‘dasining vodiysi”ga ko‘madilar.

¹⁶Qabriston yonidagi shaharning nomi ham To‘da bo‘ladi. Shunday qilib, ular yurtni poklaydilar.

¹⁷Egamiz Rabbiy shunday demoqda: “Ey inson, turli xil qushlarni va hamma yovvoyi hayvonlarni yig‘ib, ularga shunday deb ayt: Qani, kelinglar! Men sizlar uchun qurbonlik hozirlayman, Isroil tog‘larida katta ziyofat uyushtiraman. Sizlar to‘yguningizcha go‘shtdan yeb, qondan ichasizlar.

¹⁸Bashan o‘lkasida semirtirilgan qo‘chqor, qo‘zichoq, echki va buqalar bo‘g‘izlanganday, bahodir jangchilaru jahon hukmdorlari qurbon qilinadi. Sizlar ularning tanalarini yeb, qonini ichasizlar.

¹⁹Men sizlar uchun uyushtiradigan bu ziyofatda sizlar to‘yguningizcha yog‘dan yeysizlar, mast bo‘lguningizcha qondan ichasizlar.

²⁰Sizlar Mening dasturxonimdan xohlaganingizcha ot va otliqlarning go‘shtidan, sipoh va turli xil jangchilarning go‘shtidan tanovul qilasizlar”, deb aytmoqda Egamiz Rabbiy.

²¹Men O‘z ulug‘vorligimni xalqlar orasida namoyon qilaman. Xalqlarni jazolab, ularga O‘z qudratimni ko‘rsataman.

²²O‘sha kundan boshlab, Isroil xalqi Egasi Xudo Men ekanligimni biladi.

²³Isroil xalqi gunoh qilib, Menga xiyonat qilgani uchun Men ularni begona yurtlarga surgun qilganimni boshqa xalqlar tushunib olishadi. Xalqimning bu qilmishi uchun Men ulardan yuz o‘girib, dushmanlarning qo‘liga topshirgan edim, qirilib ketishlariga to‘sqinlik qilmadim.

²⁴Men ulardan yuz o‘girdim, buzuqligi va qilgan gunohlariga yarasha jazosini berdim.”

²⁵Egamiz Rabbiy shunday demoqda: “Mana endi Men Yoqub naslini yana farovonlikka erishtiraman. Butun Isroil xonadoniga shafqat ko‘rsataman. Obro‘im to‘kilishiga yo‘l qo‘ymayman!

²⁶Ular o‘z yurtiga qaytib kelganlaridan keyin o‘tmishdagi sharmandagarchiligi va Menga qilgan hiyonati uchun javobgar bo‘ladilar. Shunda hech kim ularga tahdid qilmaydi.

²⁷Men ularni g‘animlarning yurtlaridan olib chiqqanimda, xalqlar muqaddasligimni ko‘rishadi.

²⁸Egasi Xudo Men ekanligimni xalqim bilib oladi. Garchi Men ularni o‘zga yurtlarga tarqatib yuborgan bo‘lsam–da, ularni ona yurtiga qaytarib olib kelaman. Xalqimdan birontasi ham begona yurtda qolib ketmaydi.

²⁹Men xalqim Isroil ustiga O‘z Ruhimdan yog‘diraman, endi ulardan yuz o‘girmayman”, deb aytmoqda Egamiz Rabbiy.