Read O‘zbek tilidagi Muqaddas Kitob, 2013 Hizqiyol 7 Bible Online

Hizqiyol 7 - O‘zbek tilidagi Muqaddas Kitob, 2013 bible

Hizqiyol 7

¹Egamiz menga O‘z so‘zini ayon qildi:

²“Ey inson, Egang Rabbiy Isroil yurti haqida shunday deb aytmoqda: Kuni bitdi! Butun yurtning kuni yetdi!

³Ey Isroil, sening kuning bitdi, Men qahrimni ustingga sochaman. Tutgan yo‘ling uchun seni hukm qilaman, jirkanch odatlaring uchun jazolayman.

⁴Senga achinmayman, rahm ham qilmayman. Tutgan yo‘ling uchun, jirkanch odatlaring uchun adabingni beraman. O‘shanda Egang Men ekanligimni bilib olasan.”

⁵Egamiz Rabbiy shunday deb aytmoqda: “Dahshatli kulfat! Mana, kulfat kelmoqda!

⁶Kuning bitdi! Evoh, kuning bitdi! Mana, balo boshingga yetdi!

⁷Ey, yurtda yashovchi odam, halokating keldi! Tog‘larda xursandchilik emas, sarosima hukm suradigan kun keldi.

⁸Ko‘p o‘tmay seni g‘azabimga giriftor etaman, jahlimdan tushmagunimcha qahrimni ustingga sochaman. Tutgan yo‘ling uchun seni hukm qilaman, jirkanch odatlaring uchun jazolayman.

⁹Senga achinmayman, rahm qilmayman. Tutgan yo‘ling uchun, jirkanch odatlaring uchun adabingni beraman. O‘shanda seni jazolagan Egang Men ekanligimni bilib olasan.

¹⁰Ana, kulfat kuni yetib keldi! Halokat boshingga tushdi! Zo‘ravonlik gulladi, mag‘rurlik kurtakladi.

¹¹Zo‘ravonlik fosiqlikni jazolaydigan xivichga aylandi. Bu odamlarning birontasi omon qolmaydi. To‘kinligu boyligi, dabdabasi yo‘q bo‘ladi.

¹²O‘sha vaqt keldi! O‘sha kun yaqinlashdi! Xaridor xarid qilgan narsasidan quvonmasin, sotuvchi ko‘rgan zararidan g‘am chekmasin. Mening g‘azabim butun olomon ustiga birday yog‘iladi.

¹³Sotuvchi bilan xaridor tirik qolgan taqdirda ham, sotuvchi sotgan yerini qaytarib ololmaydi. Butun olomonga tegishli bu bashoratni qaytarib bo‘lmaydi. Gunoh qilganlari uchun ularning birortasi o‘z hayotini saqlab qololmaydi.

¹⁴Burg‘ular chalindi, hammasi tayyor bo‘ldi. Ammo jangga hech kim kirmadi, chunki Mening g‘azabim butun olomon ustiga yog‘iladi.

¹⁵Ko‘chada jang bo‘lmoqda. Ichkarida ocharchiligu o‘lat hukm surmoqda. Daladagilar jangda halok bo‘ladilar, shahardagilar ocharchiligu o‘latdan o‘ladilar.

¹⁶Omon qolganlar dashtdagi kabutarlarday tog‘larga qochadi. Ular gunoh qilganlari uchun ingraydi.

¹⁷Odamlarning qo‘llarida mador qolmaydi, ishtonlari ho‘l bo‘ladi.

¹⁸Ular qanorga o‘ranishadi, dahshat ularning yopinchig‘i bo‘ladi. Yuzlari shuvut, boshi kal bo‘ladi.

¹⁹Kumushlarini ko‘chaga uloqtirishadi, oltini axlat kabi bo‘ladi. Egamizning g‘azab kunida kumushu oltini ularga najot bera olmaydi. Ularning nafsini qondirmaydi, och qorinlarini to‘yg‘izmaydi. Ha, oltinu kumush xalqimga to‘g‘onoq bo‘ldi.

²⁰Ular ko‘z–ko‘z qilib yurgan chiroyli oltin bezaklaridan makruh xudolaru jirkanch butlarni yasadilar. Shu sababdan Men boyliklarini ular uchun axlat kabi qilaman.”

²¹“Men o‘sha boyliklarni kelgindilarga o‘lja qilib beraman, dunyoning fosiqlariga talataman. Ular xalqimning bisotini harom qiladilar.

²²Men xalqimdan yuzimni o‘giraman. Shunda ular aziz uyimni bulg‘aydilar. Ha, zo‘ravonlar bostirib kelib, uni bulg‘aydilar.”

²³“Xalqim uchun zanjirlar tayyorlang! Zero, yurtda qotillik avjga chiqqan. Quddus shahri zo‘ravonlikka to‘lgan.

²⁴Men yurtimga eng vahshiy xalqlarni boshlab kelaman. Ular xalqimning uylariga egalik qilishadi. Men kuchlilarning mag‘rurligiga chek qo‘yaman. Xalqimning sajdagohlari harom qilinadi.

²⁵Dahshatu alam xalqimni qamrab oladi. Ular tinchlikka intilishadi, ammo tinchlik bo‘lmaydi.

²⁶Kulfat ketidan kulfat keladi, mish–mish ketidan mish–mish tarqaladi. Odamlar bashorat qidirib, payg‘ambar oldiga behuda borishadi. Ruhoniylar ta’limot berishga, oqsoqollar maslahat berishga ojiz bo‘ladilar.

²⁷Shunda shoh qayg‘uga botadi, shahzodalar tushkunlikka tushadilar. Qo‘rqqandan yurt ahlining qo‘li titraydi. Men ularni qilgan qilmishlariga yarasha jazolayman. Ular boshqalarni qanday hukm qilgan bo‘lsa, Men ham ularni xuddi shunday hukm qilaman. O‘shanda Egasi Men ekanligimni bilib oladilar.