Read O‘zbek tilidagi Muqaddas Kitob, 2013 Doniyor 6 Bible Online

Doniyor 6 - O‘zbek tilidagi Muqaddas Kitob, 2013 bible

Doniyor 6

¹Shoh Doro [1] butun shohligidagi yerlarni 120 viloyatga bo‘lib, har bir viloyat ustidan noib tayinlashga qaror qildi.

²Noiblarni nazorat qilish uchun esa uchta amirni tayinladi, ularning biri Doniyor edi. Shohni urintirmaslik uchun ular noiblardan barcha hisobotni olishlari kerak edi.

³Doniyor boshqa amiru noiblarga qaraganda o‘z ishini yuksak mahorat bilan bajarar edi. Shuning uchun shoh butun saltanat boshqaruvini Doniyorga topshirishni rejalashtirib qo‘ygandi.

⁴Buni ko‘ra olmagan amiru noiblar qildan qiyiq axtarib, Doniyorning boshqaruv ishlaridagi nuqsonlarni topishga harakat qilishdi. Ammo Doniyor o‘z ishini puxta bajarib, hech qanday mas’uliyatsizlik va nohaqlikka yo‘l qo‘ymaganligi uchun uni ayblashga biron–bir bahona ham topa olmadilar.

⁵Oxiri ular bir–birlariga shunday dedilar: “Doniyorni faqatgina o‘z Xudosining qonuni bilan bog‘liq bo‘lgan holda ayblashimiz mumkin, bundan boshqa choramiz yo‘qqa o‘xshaydi.”

⁶Shunda amiru noiblar shohning huzuriga borib: “Shoh Doro hazratlarining umri boqiy bo‘lsin! — dedilar.

⁷— Shohlikning barcha amirlari, beklari, noiblari, a’yonlari va hokimlari shunday deb kelishdilar: shohimiz farmon joriy qilsinlar. Ey, shoh hazratlari, bu farmon bo‘yicha hamma odam o‘ttiz kun mobaynida faqatgina sizga sajda qilsin. Kimki boshqa bir xudo yoki odamga sajda qilsa, sherlar uyasiga tashlansin. Bu farmon qat’iy ravishda amalga oshirilsin.

⁸Ey, shoh hazratlari, farmon chiqarib uni imzolang. Bu farmoningiz Midiya va Fors qonunlariga binoan o‘zgarmas bo‘lsin.”

⁹Shoh Doro farmonni imzoladi.

¹⁰Doniyor farmon imzolanganligini bila turib uyiga bordi. Boloxonasiga chiqib, har doim qilganiday, kuniga uch mahal tiz cho‘kib Xudoga iltijo qildi, Uni madh etib ulug‘ladi. Boloxonaning derazalari esa Quddus tomon ochilgan edi.

¹¹Amaldorlar bir to‘da bo‘lib Doniyorning uyiga borganlarida, Doniyor o‘z Xudosiga iltijo qilayotganini ko‘rib qoldilar.

¹²Ular zudlik bilan bu haqda shohni xabardor qilish uchun shoh qoshiga bordilar. — Ey, shoh hazratlari! — deya murojaat qildi ular. — Siz farmon chiqarib, kimki o‘ttiz kun ichida mendan boshqa bironta xudo yoki odamga sajda qilsa, sherlarning uyasiga tashlanadi, deb aytmaganmidingiz? — Ha, chiqargan bu farmonim Midiya va Fors shohligining qonunlariga binoan, qat’iydir, — deya javob berdi shoh.

¹³— Ey, shoh hazratlari, Yahudo asirlaridan bo‘lmish Doniyor sizni ham, siz chiqargan farmoningizni ham mensimay, kuniga uch marta o‘z Xudosiga iltijo qilyapti, — dedi ular.

¹⁴Shoh buni eshitgach, qattiq tashvishga tushdi. U Doniyorni saqlab qolish niyatida kun botgunga qadar, qo‘lidan kelganicha harakat qildi.

¹⁵Ammo amaldorlar shohning oldiga kelib: — Shoh hazratlari, Midiya va Fors qonunlariga binoan, siz chiqargan har bir farmon o‘zgarmas ekanligini esingizda tuting, — dedilar.

¹⁶Shoh Doniyorni sherlarning uyasiga tashlashni buyurdi. Doniyorning o‘ziga esa: “Seni Xudoying qo‘liga topshirdim, sen doim sajda qiladigan o‘sha Xudo seni asrasin”, — dedi.

¹⁷Tosh keltirilib, chuqurlikning og‘zi berkitib qo‘yildi. Hech kim Doniyorni sherlardan qutqara olmasin, deb shoh o‘zining va amaldorlarining tamg‘alari bilan toshni muhrlab qo‘ydi.

¹⁸So‘ng saroyiga qaytib, kechasi bilan ro‘za tutdi. Kechqurungi vaqti chog‘lik ham ko‘ngliga sig‘may, tuni bilan uxlamay chiqdi.

¹⁹Ertasi kuni tong otgach, shoh shosha–pisha sherlar uyasi tomon yugurdi.

²⁰U yerga borgach: — Hoy Doniyor, barhayot Xudoning xizmatkori! — deya kuyinib xitob qildi u. — Sen doimo sajda qilib yurgan Xudoying seni sherlardan qutqara oldimi?

²¹— Shoh hazratlarining umri boqiy bo‘lsin! — dedi shohga Doniyor.

²²— Xudoyimning nazarida begunoh bo‘lganim uchun, U farishtasini yuborib sherlarning og‘izlarini berkitib qo‘ydi va sherlar menga hech qanday zarar yetkazmadilar. Sizning oldingizda ham, ey, shoh hazratlari, men biron bir aybli ish qilgan emasman.

²³Xursandchiligi ichiga sig‘magan shoh Doniyorni chuqurlikdan chiqarishni buyurdi. Doniyorni chuqurlikdan chiqargan odamlar unga hech qanday zarar yetmaganini ko‘rishdi, chunki Doniyor Xudoga inongan edi.

²⁴Shohning buyrug‘iga binoan, Doniyorni qoralagan odamlarni xotinu bola–chaqalari bilan birga sherlar uyasiga tashladilar. Ular chuqurlikning tubiga yetmagan ham ediki, sherlar ularga tashlanib g‘ajib tashlashdi.

²⁵Shoh Doro butun dunyo bo‘ylab barcha xalqlar, elatlar va urug‘larga shunday maktub yo‘lladi: “Xonadoningizdan baraka arimasin!

²⁶Shohligimdagi barcha odamlar Doniyorning Xudosidan qo‘rqib titrasin, chunki U barhayot va mangu Xudodir. Uning shohligi aslo qulamas, Hukmronligi hech ham tugamas,

²⁷Najotkoru Xaloskor Udir. Yeru ko‘kda alomatu mo‘jizalar ko‘rsatgan, Udir Doniyorni sherlardan qutqarib olgan.”

²⁸Shoh Doro va Fors shohi Kurushning hukmronlik davrlarida [2] Doniyorning martabasi yana ham oshdi.