Read O‘zbek tilidagi Muqaddas Kitob, 2013 Doniyor 7 Bible Online

Doniyor 7 - O‘zbek tilidagi Muqaddas Kitob, 2013 bible

Doniyor 7

¹Bobil shohi Belshazar hukmronligining birinchi yilida [1] Doniyor bir tush ko‘rdi. U ko‘rgan tushi haqida shunday yozdi:

²“Men tushimda bir vahiy ko‘rdim. Osmonning to‘rt tomonidan esayotgan qattiq shamol ulkan bir dengizni to‘lqinlantirayotgan edi.

³O‘sha dengizdan bir–biriga o‘xshamaydigan to‘rtta bahaybat maxluq [2] chiqdi.

⁴Birinchisi sherga o‘xshagan edi, uning burgut qanotlariga o‘xshagan qanotlari bor edi. Men maxluqni tomosha qilib turgan edim, birdaniga qandaydir bir kuch uning qanotlarini uzib tashladi, o‘zini esa ko‘tarib odamzodga o‘xshatib ikki oyog‘ida turg‘izib qo‘ydi. O‘sha maxluqqa inson ongi berilgan edi [3].

⁵Ikkinchi maxluq ayiqqa o‘xshar edi. U og‘ziga uchta qovurg‘a suyaklarini tishlab olgan edi. U hamlaga shaylana boshlaganda, unga shunday buyruq berildi: — Qani, ol, to‘yguningcha go‘sht ye!

⁶So‘ng qoplonga o‘xshagani paydo bo‘ldi. Bu maxluqning to‘rtta boshi va orqasida qush qanotiga o‘xshagan to‘rtta qanoti bor edi. Unga hukmronlik qilish huquqi berilgan edi.

⁷Bundan keyin tundagi vahiyda men qo‘rqinchli, dahshatli va benihoya kuchli bo‘lgan to‘rtinchi maxluqni ko‘rdim. U o‘z qurbonlarini temir tishlari bilan g‘ajib, parchalab tashlardi. Qoldiqlarini esa oyoqlari bilan bosib ezardi. Uning o‘nta shoxi bo‘lgani uchun, u oldingi maxluqlardan ajralib turar edi.

⁸Men maxluqning shoxlarini tomosha qilib turganimda, ularning orasidan o‘sib chiqayotgan yana bir shoxchani [4] ko‘rdim. Unga joy berish uchun oldingi o‘nta shoxdan uchtasi tag–tugi bilan uzilib tushdi. Bu yangi o‘sib chiqqan shoxning inson ko‘zlariga o‘xshagan ko‘zlari va takabburona gapiradigan og‘zi bor edi.

⁹Men taxtlarning joy–joyiga o‘rnatilganini tomosha qilib turdim, Azaliy Nuroniy [5] o‘z joyiga o‘tirdi. Uning kiyimi qorday oq, sochlari esa oppoq momiqday edi. Uning taxti otashin alanga, taxtining g‘ildiraklari lovullagan olov edi.

¹⁰Uning huzuridan olovli daryo oqib chiqdi. Minglar Unga xizmat qilar edi, million–millionlar amriga muntazir edi. Sud majlisi boshlandi, hamma kitoblar [6] ochildi.

¹¹Kichkina shoxning kibrlanib shang‘illashi mening e’tiborimni tortgan edi. Men uni tomosha qilayotganimda o‘sha to‘rtinchi maxluq o‘ldirildi, uning jasadi olovga tashlanib, kuydirib yuborildi.

¹²Qolgan maxluqlarga kelsak, ularning hukmronligi yo‘q qilindi, ammo hayotlari ma’lum bir vaqtgacha [7] saqlab qolindi.

¹³Tunda kelgan o‘sha vahiyda men osmon bulutlarida kelayotgan inson qiyofasidagi bittasini [8] ko‘rdim. U Azaliy Nuroniy oldiga keldi.

¹⁴Unga hukmronlik, ulug‘vorlik va shohlik berildi. Barcha xalqlar, elatlar va urug‘lar unga bo‘ysunishdi. Uning hukmronligi bitmas–tuganmas, abadiy hukmronlikdir. Uning shohligi hech qachon buzilmasdir.

¹⁵Men ko‘rgan bu vahiy yuragimga g‘ulg‘ula solib, allanechuk vahimaga tushirgan edi.

¹⁶Men taxt yonida turganlarning bittasiga yaqinlashib, bularning hammasini tushuntirib berishini so‘radim. U menga vahiyning ma’nosini ochib, dedi:

¹⁷— Sen ko‘rgan to‘rtta maxluq — bu yer yuzida hukmronlik qiladigan to‘rtta shohlikdir.

¹⁸Ammo Xudoyi Taoloning aziz odamlari shohlikni qabul qilib, unga to abad ega bo‘ladilar.

¹⁹Men to‘rtinchi maxluq [9] haqida ko‘proq ma’lumot olishni xohlar edim, chunki u boshqa maxluqlardan ajralib turar edi. Temir tishlari va bronza changallari bo‘lgan bu badbashara maxluq qurbonlarini g‘ajib tilka–pora qilar, qoldiqlarini bosib ezardi.

²⁰Uning boshidagi o‘nta shoxi, ayniqsa yangi o‘sib chiqqan shox meni juda qiziqtirib qolgan edi. O‘sha shox o‘sib chiqayotganda o‘rnidagi uchta shoxni tushirib yuborgan edi. Ko‘zlari va kibrlanib gapiradigan og‘zi bo‘lgan bu shox boshqa shoxlarga qaraganda ko‘proq ahamiyatga egaday bo‘lib ko‘rinar edi.

²¹Bundan tashqari, vahiyda men o‘sha shoxning Xudoning aziz odamlari bilan jang qilayotganini va ularni yengayotganini ko‘rgan edim.

²²Shu orada Azaliy Nuroniy kelib, O‘zining aziz odamlari foydasiga hukm chiqardi. Xudoning aziz odamlari uchun shohlikni o‘z tasarrufiga olish vaqti yetib kelgan edi.

²³Suhbatdoshim menga shunday dedi: — To‘rtinchi maxluq — bu yer yuzida hukmronlik qiladigan to‘rtinchi shohlikning timsolidir. Bu shohlik boshqa shohliklardan ajralib turadi. U butun dunyoni g‘ajib, ezib parcha–parcha qiladi.

²⁴Maxluqning o‘nta shoxi — shohlikni boshqaradigan o‘nta shohdir. Keyinchalik taxtga yangi bir shoh o‘tiradi. Bu shoh oldingi o‘nta shohdan ajralib turadi va uchta shohni taxtdan tushiradi.

²⁵U kufr ketib, Xudoyi Taoloning aziz odamlarini ayovsiz ezadi. Muqaddas bayramlar va qonunlarni o‘zgartirishga urinadi. Xudoning aziz odamlari uch yarim yil [10] davomida, o‘sha shohning zulmi ostida bo‘ladilar.

²⁶Bu muddat tugagach, samoda sud majlisi boshlanadi. Zolim shoh taxtdan tushirilib, butunlay yo‘q qilinadi.

²⁷Xudoyi Taoloning aziz odamlariga esa shohlik, hukmronlik va yer yuzidagi barcha saltanatlarning ulug‘vorligi beriladi. Hamma hukmdorlar ularga bo‘ysunib, xizmat qiladilar, ularning shohligi abadiy shohlik bo‘ladi.

²⁸Ko‘rgan, eshitganlarim mana shudir. Bu tushimdan shu qadar vahimaga tushgan edimki, rangimda rang qolmagan edi. Ammo bular to‘g‘risida og‘iz ochmay, hammasini ichimga yutdim.”