Read O‘zbek tilidagi Muqaddas Kitob, 2013 Doniyor 8 Bible Online

Doniyor 8 - O‘zbek tilidagi Muqaddas Kitob, 2013 bible

Doniyor 8

¹Doniyor shunday deb yozdi: “Shoh Belshazar hukmronligining uchinchi yilida [1] menga yana bir vahiy keldi [2].

²Bu vahiyda men Elam viloyatidagi Shushan qal’asida [3], Uloy daryosining bo‘yida turgan ekanman.

³Men daryo bo‘yida bir qo‘chqor turganini ko‘rdim. Uning ikkita uzun–uzun shoxlari bor ekan [4]. Ikkinchi bo‘lib chiqqan shox birinchisiga qaraganda uzunroq ekan [5].

⁴Qo‘chqor o‘zini g‘arb, shimol va janubga urib, yo‘lida duch kelgan hamma narsani suzar edi. Hech qanday hayvon unga bas kela olmas, uning qurbonlarini qutqara olmas edi. Qo‘chqor xohlagan ishini qilar, kuchi tobora oshib borar edi.

⁵Buni tomosha qilib turganimda, g‘arb tomondan bir taka ko‘rindi. Yelday uchib kelayotgan bu takaning tuyoqlari go‘yo yerga tegmayotganday tuyular edi. Uning ko‘zlari orasida ulkan bir shox bor edi [6].

⁶U quturganicha qo‘chqor tomon yugurdi–da,

⁷qahr–g‘azab bilan unga tashlanib, suzdi. Takaning zarbasi zo‘rligidan, qo‘chqorning ikkala shoxi sinib tushdi. Qo‘chqor takaga bas kela olmadi. Taka uni yerga yiqitib toptadi, hech kim qo‘chqorni undan qutqara olmas edi.

⁸Taka nihoyatda kuchayib ketdi, ammo kuch–qudrat cho‘qqisida uning ulkan shoxi sinib tushdi. Sinib tushgan shoxning o‘rniga dunyoning to‘rt tomoniga qayrilgan to‘rtta katta shox o‘sib chiqdi [7].

⁹Ularning biridan yana bitta shoxcha chiqdi. Uning kuch–qudrati oshib, janub, sharq va go‘zal Isroil o‘lkasi [8] tomon yoyildi.

¹⁰Qudrati osmonu falakka yetgan bu shox samoviy lashkarlarga hujum qildi. Samoviy lashkarlar bo‘lmish yulduzlarning ayrimlarini yerga tushirib toptadi.

¹¹Hatto samoviy lashkarning sarkardasini mensimay, unga keltiriladigan kundalik qurbonliklarni to‘xtatdi. Ma’badni esa vayron qilib,

¹²samoviy lashkarlarni mag‘lub qildi. Kundalik qurbonliklar o‘rniga haddan tashqari jirkanch bir narsani o‘rnatdi. Haqiqatni oyoq osti qilgan bu shox har bir ishida muvaffaqiyat qozonar edi [9].

¹³Keyin men farishtalar o‘zaro gaplashayotganini eshitib qoldim. Ularning biri boshqasidan shunday deb so‘raganini eshitdim: — Vahiydagi bu narsalar qachongacha davom etar ekan–a? Qachongacha bu jirkanch narsa kundalik qurbonliklar o‘rnini egallaydi? Qachongacha Ma’bad va samoviy lashkarlar oyoq osti bo‘ladi?

¹⁴Sherigi unga shunday javob berdi: — Bunday ahvol 2300 kechayu kunduz [10] davom etadi. O‘sha vaqt mobaynida qurbonliklar keltirilmaydi. Shundan so‘ng Ma’bad poklanib, asl holiga qaytariladi.

¹⁵Men ko‘rgan vahiyning mag‘zini chaqmoqchi bo‘lib, boshimni qotirib turganimda, birdaniga oldimda odam qiyofasidagi allakim paydo bo‘ldi.

¹⁶Shu paytda men Uloy daryosi tomonidan: — Ey, Jabroil, bu odamga vahiyning ma’nosini tushuntirib ber, — deb xitob qilayotgan inson ovozini eshitdim.

¹⁷Jabroil menga yaqinlashganda, men qo‘rqqanimdan yuz tuban yerga yiqilib tushdim. Ammo u menga: — Tushungin, ey, banda [11], bu oxirzamon vahiysi, — dedi.

¹⁸U gapirayotganda men hushimdan ketib, yuz tuban yerda cho‘zilib yotgan edim. Ammo u qo‘lini tekkizib, meni turg‘izib qo‘ydi–da,

¹⁹shunday dedi: — Eshit, men senga oxirzamon paytida sodir bo‘ladigan narsalarni ayon qilaman, o‘sha davrda Xudo o‘z g‘azabini yer yuziga sochishni belgilagandir.

²⁰Sen ko‘rgan ikki shoxli qo‘chqor — bu Midiya va Fors shohliklaridir.

²¹Taka esa Yunoniston shohligidir. Ko‘zlarining orasidagi ulkan shox — bu Yunoniston taxtida o‘tiradigan birinchi shohdir.

²²Sinib tushgan shoxning o‘rniga chiqqan to‘rtta shox — Yunoniston to‘rt qismga bo‘linishini bildiradi. Taxtga o‘tirgan to‘rtta shoh oldingi shohga qaraganda zaifroq bo‘ladi.

²³Ularning hukmronlik paytlari oxirlab, gunohlari to‘lib–toshganda, makr–hiylaga usta, vajohati xunuk bir shoh taxtga o‘tiradi.

²⁴U nihoyatda kuchayib ketadi, biroq o‘zining kuchi bilan emas. U hamma yoqni vayron qilib, barcha ishlarida muvaffaqiyat qozonadi. Zabardast yo‘lboshchilaru Xudoning aziz odamlarini qirib tashlaydi.

²⁵Ustalik bilan ishlatgan makkorligi tufayli ko‘p yutuqlarga erishadi. Ko‘zini yog‘ bosgan bu shoh ogohlantirmasdan ko‘p odamlarni halok qiladi. U hatto eng buyuk Shohga qarshi bosh ko‘taradi. Oqibatda esa yo‘q qilib tashlanadi, ammo bu insonning kuchi bilan qilinmaydi.

²⁶Doniyor, men hozir senga tushuntirib bergan ertalabki va kechqurungi qurbonliklarga oid bo‘lgan bu vahiy albatta amalga oshadi. Sen vahiyni sir tutgin, chunki bu uzoq kelajakka oid narsadir.

²⁷Bu voqeadan so‘ng tobim qochib, bir necha kun betob bo‘lib yotdim. Keyin turib shohning xizmatiga qaytdim. Ammo vahiy meni tamomila esankiratib qo‘ygan edi. Men uning ma’nosini tushunmagan edim.