Read O‘zbek tilidagi Muqaddas Kitob, 2013 Xo‘sheya 11 Bible Online

Xo‘sheya 11 - O‘zbek tilidagi Muqaddas Kitob, 2013 bible

Xo‘sheya 11

¹Egamiz shunday deydi: “Men Isroilni bolaligida yaxshi ko‘rar edim, O‘z o‘g‘lonimni Misrdan chaqirib olgan edim.

²Uni qancha ko‘p chaqirsam, Mendan shuncha ko‘p uzoqlashardi. Baalga qurbonliklar keltirardi, Butlarga tutatqilar nazr qilardi.

³Efrayimga yurishni Men o‘rgatgan edim, Uni qo‘llarimda ko‘tarib yurgan edim. Ammo qilgan g‘amxo‘rligimni u bilmadi.

⁴Men esa uni mehr ila yetaklagandim, Muhabbat rishtalari ila olib yurgan edim. Bo‘ynidan bo‘yinturuqni olib tashlagandim, Oldiga engashib, uni oziqlantirgandim.

⁵Xalqim tavba qilishdan bosh tortdi. Shuning uchun Men ularni endi Misrga jo‘natib jazolamayman, Zolim Ossuriyaga tobe qilaman.

⁶Shaharlarida qilich hukm suradi, Darvozalarining tambalarini yo‘q qiladi. Yovuz rejalari tufayli xalqim qilichdan haloq bo‘ladi.

⁷Qachon qarasa ular Mendan yuzini o‘girishadi. Yana Menga — Xudoyi Taologa faryod qilishadi, Ammo Men ularni aslo yuksaltirmayman.

⁸Ey Efrayim, qanday qilib sendan voz kechay?! Ey Isroil, qanday qilib seni tashlab ketay?! Admani yo‘q qilganimday seni yo‘q qila olarmikanman?! Zavo‘yimga qilganimni senga qila olarmikanman?! Bunday qilishga yuragim betlamas aslo! Senga bo‘lgan mehrim uyg‘ondi.

⁹Yo‘q, sochmayman senga qahr–g‘azabimni, Ey Efrayim, qayta barbod qilmayman seni, Zero, Men Xudoman, inson emas, Orangizdagi Muqaddas Xudoman, Oldingizga jahl bilan bormayman.

¹⁰Sherday o‘kirganimda xalqim ortimdan ergashadi, Ovozimni eshitgach, farzandlarim g‘arbdan titrab kelishadi.

¹¹Ular Misrdan ham qushlarday titrab kelishadi, Ossuriya yurtidan ham kaptarlarday qaltirab kelishadi. Men ularni uylariga eltib qo‘yaman, — Egamizning kalomi shudir. —

¹²Efrayim atrofimni yolg‘on bilan o‘rab tashladi, Isroil xonadoni Meni hiylaga ko‘mib tashladi. Yahudo xalqi Menga qarshi bosh ko‘tardi, Menga, Muqaddas Xudoga ular itoat qilmayapti.”