Read O‘zbek tilidagi Muqaddas Kitob, 2013 Xo‘sheya 12 Bible Online

Xo‘sheya 12 - O‘zbek tilidagi Muqaddas Kitob, 2013 bible

Xo‘sheya 12

¹Efrayim garmsel boqib yurar, Kun bo‘yi sharqdan esgan shamol ketidan quvar. Yolg‘onu zo‘ravonlikni u orttirar. Ossuriya bilan sulh tuzib, Zaytun moyini Misrga jo‘natar.

²Yahudoga Egamiz da’vo qiladi. Yoqub naslining ta’zirini U beradi, Tutgan yo‘liga yarasha uni jazolaydi.

³Onasining qornidayoq Yoqub akasi bilan talashgan, Ulg‘aygach esa Xudo bilan olishgan.

⁴Farishta bilan olishib, uni yenggan edi, Keyin yig‘lab, iltifot qilishini so‘ragandi. Baytilda Yoqub Xudoni topgandi, O‘sha yerda Xudo bilan suhbat qurgandi.

⁵Sarvari Olam — Xudo O‘shadir, Egamizdir Uning nomi!

⁶Ey Yoqub nasli, Xudoyingizga qayting. Sevgi va adolatga intiling, Sabr–toqat ila Xudodan umid qiling.

⁷Egamiz shunday deydi: “Xalqim tarozidan urgan savdogarga o‘xshaydi, Firibgarlik qilishni ular xo‘p yaxshi ko‘radi.

⁸‘O, men boyman’, deb maqtanasan, ey Efrayim. ‘Men o‘zimga davlat orttirdim, Borimni peshana terim bilan topdim. Hech kim meni gunohda ayblay olmas.’

⁹Ammo Egangiz Xudo — Menman, Seni Misrdan olib chiqqanman. Men senga sahroda zohir bo‘lar edim, O‘sha davrdagiday seni yana chodirlarda yashattiraman.

¹⁰Men payg‘ambarlarga gapirgandim, O‘zim ularga ko‘p vahiylar bergandim, Ular orqali matallar aytgandim.”

¹¹Giladda butparastlik qilindi. Uning ahli albatta barham topadi. Gilgalda buqalar qurbonlik qilindi, Qurbongohlar egatlardagi behisob tosh uyumlarga o‘xshaydi.

¹²Yoqub Oram yurtiga qochib bordi, Xotin olish uchun u xizmat qildi, Qalin evaziga qo‘ylar boqdi.

¹³So‘ng Egamiz payg‘ambar orqali Isroilni Misrdan olib chiqdi, Payg‘ambar ularga g‘amxo‘rlik qildi.

¹⁴Ammo Efrayim Egamizni qattiq ranjitdi. To‘kkan qon uchun Efrayimni Rabbiy jazolaydi, Uni haqoratlagani uchun adabini beradi.