Read O‘zbek tilidagi Muqaddas Kitob, 2013 Xo‘sheya 8 Bible Online

Xo‘sheya 8 - O‘zbek tilidagi Muqaddas Kitob, 2013 bible

Xo‘sheya 8

¹Egamiz shunday deydi: “Qani bo‘ling, bong uring! Dushman kalxatday uyimga yopirilmoqda. Axir, xalqim ahdimni barbod qildi, Ular qonunimni buzdi.

²Isroil xalqi Menga faryod qiladi: ‘Ey Xudoyim, Seni tan olamiz’, deb aytadi.

³O‘zlari esa ezgulikni rad etishdi, Dushmanlar ularni ta’qib qiladi.

⁴Ular roziligimni so‘ramay shohlar tanlashdi, Ijozatimni olmay, mulozimlar tayinlashdi. Oltinu kumushlaridan butlar yasashdi, Shu orqali boshlariga halokat keltirishdi.

⁵Samariyaliklarning buzoqsimon butini Men rad etdim! Ulara qarshi alanga olgandir Mening g‘azabim. Qachon o‘zini poklab oladi?

⁶Butni Isroillik hunarmand yasagan–ku, But Xudo emas! Samariya shahrining buzog‘i parchalanib tashlanadi.

⁷Shamolni ekkan odam bo‘ronni o‘rib olar. Bug‘doy boshoqsiz bo‘lsa, xalq nonga zor bo‘lar. Bug‘doyingiz boshoq tuggan taqdirda ham, Uni begonalar yeb ado qilar.

⁸Boshqa xalqlar orasida Isroil ado bo‘ldi, Qadrsiz sopol idishga u o‘xshab qoldi.

⁹Yolg‘iz daydigan qulonday u, Ossuriyaga yordam so‘rab bordi. Efrayim o‘zini o‘ynashlariga sotdi.

¹⁰U boshqa xalqlarga sotilgan bo‘lsa ham, Men uni yig‘ib olaman. Ossuriya shohining zulmi ostida U tezda xazon bo‘ladi.

¹¹Efrayim gunohlarini yuvmoqchi bo‘ldi, Qurbongohlar qurib tashladi. Qurbongohlar esa gunoh makoni bo‘lib qoldi.

¹²Men bu xalqqa ko‘plab qonunlar yozdim, Biroq qonunlarimni ular yot deb biladi.

¹³Ular Menga, Egasiga a’lo qurbonliklar keltirishsa ham, Qurbonlik go‘shtidan tanovul qilishsa ham, Men ulardan mamnun bo‘lmayman. Men jinoyatlarini esga olaman, Gunohlari uchun jazosini beraman. Ular Misrga qaytib ketadi.

¹⁴Isroil o‘z Yaratuvchisini unutib, saroylar qurdi. Yahudo ko‘plab shaharlarni mustahkam qildi. Men esa shaharlariga o‘t qo‘yaman, Qal’alarini olovga yem qilaman.”