Read O‘zbek tilidagi Muqaddas Kitob, 2013 Yo‘el 3 Bible Online

Yo‘el 3 - O‘zbek tilidagi Muqaddas Kitob, 2013 bible

Yo‘el 3

¹Egamiz shunday deydi: “O‘sha kunlarda Men Yahudo va Quddusning oldingi mavqeini tiklayman.

²So‘ng barcha xalqlarni yig‘ib, Hukm vodiysiga olib tushaman. U yerda xalqim Isroil haqi uchun ular bilan da’volashaman, chunki ular Mening xalqimni turli ellarga tarqatib yubordilar. Yurtimni esa o‘zaro bo‘lishib oldilar.

³Ular xalqim uchun qur’a tashlab, o‘g‘il–qizlarimni sotib yubordilar. Tushgan pulga fohishabozligu aysh–ishrat qildilar.

⁴Ey Tir, Sidon va butun Filist xalqi, Menda nima qasdingiz bor?! Sizlar hali Mendan o‘ch olmoqchimisiz?! Bordi–yu, niyatingiz shu bo‘lsa, Men o‘sha zahotiyoq qilmishingizga yarasha jazoingizni beraman.

⁵Sizlar oltinu kumushlarimni tortib oldingiz, qimmatbaho xazinalarimni sajdagohlaringizga olib ketdingiz.

⁶Yahudo va Quddus xalqini yunonlarga sotib, o‘z vatanidan yiroq qildingiz.

⁷Endi Men Yahudo va Quddus xalqini sizlar sotgan yurtlardan olib chiqaman. Qilmishingizga yarasha jazoingizni beraman.

⁸O‘g‘il–qizlaringizni Yahudo xalqiga sotaman, ular esa farzandlaringizni olisdagi bir xalqqa — Savoliklarga sotishadi.” Zotan, bu so‘zlarni Egamiz aytdi.

⁹Xalqlar orasida shunday deb e’lon qiling: “Jangga tayyorlanib, jangchilarni safarbar qiling! Sipohlaringiz hujum qilsin!

¹⁰Omochlaringizdan yasang qilichlar, O‘roqlaringizdan qiling nayzalar. Zaiflar ham qo‘liga qurol tutsin.

¹¹Ey tevarakdagi xalqlar, shoshiling, Qani, hammangiz vodiyda to‘planing.” O‘z sipohlaringni, ey Egam, chaqir!

¹²Egamiz shunday deydi: “Barcha xalqlar bo‘lsin safarbar, Hukm vodiysiga kelishsin ular. Men u yerda o‘tirurman, Hamma xalqlar ustidan hukm chiqarurman.

¹³Qani kelinglar, Yetilgan bug‘doyni o‘rganday ularni o‘ringlar, Pishgan uzumni ezganday, bosib yo‘q qilinglar, Xumlar to‘lgan, Ularning qabihliklari bilan to‘lib–toshgan.”

¹⁴Ming–minglab olomon To‘plangan Hukm vodiysida! Zotan, yaqinlashgandir Egamizning kuni Hukm vodiysiga.

¹⁵Quyosh ham, oy ham qoraygan, Yulduzlar nuri so‘ngan.

¹⁶Egam Siondan turib hayqirar, Quddusdan gulduros ovozi yangrar, Yeru osmon larzaga kelar. Ammo Egam O‘z xalqini panohiga olar, U Isroil xalqining qo‘rg‘oni bo‘lar.

¹⁷Egamiz shunday deydi: “Ey xalqim, shunda sizlar Egangiz Xudo Men ekanligimni bilasizlar. Men muqaddas tog‘im Sionda qurganman maskan. Tabarruk bir shahar bo‘ladi Quddus, Bosqinchilar endi aslo unga qilmas tajovuz.

¹⁸O‘sha kuni sut oqar qirlardan, Uzum sharbati kelar tog‘lardan, Yahudodagi o‘zanlar suvga to‘lar, Mening uyimdan buloq otilib chiqar, Qaqroq Shitim vodiysini sug‘orar.

¹⁹Misr huvullab, Edom bo‘m–bo‘sh sahroga aylanar. Oh, Yahudo xalqiga zulm o‘tkazdi ular, Begunoh odamlarning qonin to‘kdilar.

²⁰[20-21] Men albatta jazolayman ularni! Aslo oqlamayman jinoyatchilarni! Yahudo esa abadiy yashar, Quddus avlodlar osha barqaror bo‘lar. Men, Egangiz, Sionda qurganman maskan.”