Read O‘zbek tilidagi Muqaddas Kitob, 2013 Amos 4 Bible Online

Amos 4 - O‘zbek tilidagi Muqaddas Kitob, 2013 bible

Amos 4

¹Ey Samariya ayollari, eshiting! Sizlar Bashandagi bo‘rdoqi sigirlarday semirib ketgansiz, Kambag‘allarga jabr qilasiz, yo‘qsilni ezasiz, Erlaringizdan ichkilik talab qilasiz.

²Egamiz Rabbiy O‘z muqaddas nomi haqi ont ichib demoqda: “Shunday kunlar keladiki, Sizlarni ilmoqlar bilan sudrab ketishadi, Orqada qolganlaringizni qarmoqlar bilan tortib ketishadi.

³Har biringiz to‘ppa–to‘g‘ri devordagi teshiklardan chiqib ketasizlar. Sizlarni Xarmonga uloqtirishadi, — deb aytmoqda Egamiz. —

⁴Qani, endi Baytilga borib gunoh qilavering! Gilgalda gunohlaringizni ko‘paytiring! Sahardan qurbonliklar keltiring, Ertasiga ushrlar olib keling!

⁵Xamirturushli nonlarni Menga shukrona nazri qiling, Ko‘ngildan chiqarib bergan qurbonligingiz haqida Jar solib hammaga ayting, Axir, bunday qilishni xo‘p yaxshi ko‘rasiz, ey Isroil xalqi! — deb aytmoqda Egamiz Rabbiy. —

⁶Men hamma shaharlaringizda sizlarga Tishingizning kirini so‘rdirdim, Qishloqlaringizni nonga zor qildim, Shunda ham sizlar Menga qaytmadingizlar, — deb aytmoqda Egamiz. —

⁷Ekinzorlaringizga suv kerak bo‘lganda, Men yomg‘ir yog‘dirmadim. Bir shaharga yomg‘ir yog‘dirib, Boshqasiga yog‘dirmas edim. Bir dalani yomg‘ir suviga to‘ydirardim, Boshqasiga yomg‘ir yog‘dirmay, quritar edim.

⁸Shunda ikki–uch shahar aholisi suv ichgani Boshqa shaharga oyog‘ini sudrab borardi. Lekin sizlar suvga to‘ymadingizlar. Shunda ham Menga qaytmadingizlar, — deb aytmoqda Egamiz. —

⁹Men hosilingizga shira va oqqirov qasalini yubordim. Chigirtkalar qayta–qayta bog‘u uzumzorlaringizni, Anjir va zaytun daraxtlaringizni nobud qildi, Shunda ham sizlar Menga qaytmadingizlar, — deb aytmoqda Egamiz. —

¹⁰Misrda bo‘lgani kabi, orangizga falokat yubordim. Yigitlaringizni qilichdan o‘tkazdim, Otlaringizni dushmanlaringizga berdim. Qarorgohingizdagi jasadlarning qo‘lansa hidi bilan Dimog‘ingizni to‘ldirdim. Shunda ham sizlar Menga qaytmadingizlar, — deb aytmoqda Egamiz. —

¹¹Sado‘m va G‘amo‘rani yo‘q qilganim kabi, Men ko‘plaringizni yo‘q qildim. Sizlar alangadan chiqarib olingan yonayotgan o‘tinday edingizlar. Shunda ham Menga qaytmadingizlar, — deb aytmoqda Egamiz. —

¹²Shunday ekan, ey Isroil, Men seni jazolayman. Xudoning oldida hisob berishga tayyorlangin!”

¹³Zero, Xudo tog‘larga shakl berdi, Shamolni yuzaga keltirdi. U o‘y–fikrini insonlarga ayon qiladi, Tonggi shafaq nurini zulmatga aylantiradi, Tog‘ cho‘qqilari uzra yuradi. Parvardigori Olam — Egamizdir Uning nomi!