Read O‘zbek tilidagi Muqaddas Kitob, 2013 Amos 7 Bible Online

Amos 7 - O‘zbek tilidagi Muqaddas Kitob, 2013 bible

Amos 7

¹Egamiz Rabbiy menga shunday vahiy ko‘rsatdi: Dehqonlar shoh saroyi uchun bug‘doy o‘rib olganlaridan keyin, kechki ekinlar unib chiqishni boshlabdi. Shu paytda Egamiz gala–gala chigirtkalarni paydo qildi.

²Chigirtkalar yer yuzida ko‘karib turgan hamma narsani yeb bitirishibdi. Shunda men yolvordim: “Ey Egam Rabbiy, o‘tinaman, gunohimizdan o‘t! Yoqub nasli bunga bardosh bera olarmidi?! O‘zi kichkina bir xalq bo‘lsa!”

³Egamiz shaxtidan qaytdi: “Bunday qilmayman”, deb aytdi.

⁴Egamiz menga yana bir vahiy ko‘rsatdi: Egamiz Rabbiy xalqini olov bilan jazolamoqchi bo‘libdi. Olov buyuk dengizni yamlabdi, keyin yurtni yondira boshlabdi.

⁵Shunda men yolvordim: “Ey Egam Rabbiy, o‘tinaman, bas qil! Yoqub nasli bunga bardosh bera olarmidi?! O‘zi kichkina bir xalq bo‘lsa!”

⁶Egamiz shaxtidan qaytdi. “Xo‘p, bunday ham qilmayman”, deb aytdi Egamiz Rabbiy.

⁷Men yana bir vahiy ko‘rdim: shoqul yordamida qurilgan devorning oldida Rabbiy turgan ekan. Uning qo‘lida bir shoqul bor edi.

⁸Egamiz mendan: — Nimani ko‘ryapsan, Amos? — deb so‘radi. — Shoqulni, — deb javob berdim men. So‘ng Rabbiy shunday dedi: “Qara, Men mana shu shoqul yordamida Xalqim Isroilni tekshiraman. Endi ularga shafqat qilmayman.

⁹Is’hoqning sajdagohlari vayron bo‘ladi, Isroilning qadamjolari yo‘q qilinadi, Men shoh Yorubom xonadoniga qilich bilan hujum qilaman.”

¹⁰Baytildagi ruhoniy Emoziyo Isroil shohi Yorubomga xabar yuborib, shunday dedi: — Amos Isroil xalqi orasida sizga qarshi fitna uyushtirmoqda. Uning bunday so‘zlarini xalqimiz ko‘tara olmaydi.

¹¹Amos shunday deb aytib yuribdi: “Yorubom qilichdan halok bo‘ladi, Isroil xalqi o‘z yurtidan albatta surgun qilinadi.”

¹²Emoziyo Amosning o‘ziga esa shunday dedi: — Ey valiy, bu yerdan chiqib ket! Yahudo yurtiga bor. Noningni o‘sha yerdan topib yegin. Bashoratlaringni ham o‘sha yerda ayt.

¹³Ammo Baytilda qayta bashorat qila ko‘rma, chunki bu shohning qutluq joyidir, shohligimizning sajdagohidir.

¹⁴Amos esa Emoziyoga shunday javob berdi: — Mening mashg‘ulotim payg‘ambarlik emas, payg‘ambarlarga shogird ham tushmaganman. Men podani boqib yuradigan oddiy bir cho‘ponman, shikamora–anjir daraxtlarini parvarish qilaman.

¹⁵Bir kuni suruvni haydab ketayotganimda Egamiz meni chaqirib: “Bor, xalqim Isroilga bashorat qil”, deb aytdi.

¹⁶Ey Emoziyo, endi Egamizning so‘zlarini eshit! Sen menga: “Isroil haqida bashorat qilma, Is’hoq xonadoniga qarshi gap gapirma”, deb aytyapsan.

¹⁷Shu sababdan Egamiz shunday demoqda: “Sening xotining shaharda fohishalik qiladi, O‘g‘il–qizlaring qilichdan halok bo‘ladi. Yering boshqalarga bo‘lib beriladi. O‘zing esa harom bir yurtda o‘lasan. Isroil xalqi o‘z yurtidan albatta surgun qilinadi.”