Read O‘zbek tilidagi Muqaddas Kitob, 2013 Yunus 2 Bible Online

Yunus 2 - O‘zbek tilidagi Muqaddas Kitob, 2013 bible

Yunus 2

¹Yunusni yutsin deb, Egamiz nahang baliqni yubordi. Yunus uch kechayu uch kunduz baliq qornida qoldi.

²Yunus baliqning qornida ekan, o‘zining Egasi Xudoga shunday deb ibodat qildi:

³“Ey Egam, qayg‘uli damlarimda Senga qildim iltijo, Iltijolarimni Sen eshitding. O‘liklar diyorining [1] qa’ridan faryod ko‘tardim, Sen eshitding ovozlarimni.

⁴Meni otganding tubsiz chuqurga, Dengiz bag‘riga, Meni qurshab olgandi suvning girdobi. Sening to‘lqinlaring O‘tgandilar ustimdan bosib.

⁵Sening huzuringdan Quvilganman, dedim o‘shanda, Lekin muqaddas Ma’badingni Yana ko‘raman!

⁶Suvlar meni bo‘g‘zimgacha ko‘mgandi, Tubsiz dengiz atrofimni o‘radi. Dengiz o‘tlari boshimga o‘ralib qoldi.

⁷Tog‘larning tubiga [2] cho‘kkandim — Zanjirlari bilan to abad menga to‘siq qo‘ygan joyga [3]. Sen esa, Ey Egam Xudo, Jonimni o‘sha joydan qutqarding!

⁸Ey Egam, hayotim onlari tugay deganda, Men Seni esladim. Iltijolarim Sengacha, Muqaddas Ma’badinggacha yetib bordi.

⁹Soxta, bema’ni butlarga sig‘inadiganlar Senga bo‘lgan sadoqatidan voz kechdilar!

¹⁰Men esa shukrona aytib, Senga qurbonlik keltiraman. Atagan nazrlarimni ado etaman. Ey Egam, najot faqat Sendandir!”

¹¹Egamiz shundan keyin nahang baliqqa amr bergan edi, nahang baliq Yunusni quruqlikka chiqarib qo‘ydi.