Read O‘zbek tilidagi Muqaddas Kitob, 2013 Sahroda 10 Bible Online

Sahroda 10 - O‘zbek tilidagi Muqaddas Kitob, 2013 bible

Sahroda 10

¹Egamiz Musoga aytdi:

²“Sen ikkita kumush karnay yasattir, karnaylar zarb urib yasalgan bo‘lsin. Bu karnaylar jamoani yig‘ish hamda yo‘lga chiqish vaqtini e’lon qilish uchun kerak bo‘ladi.

³Karnaylarning ikkalasi chalinganda, butun jamoa sening oldingga — Uchrashuv chodiri kiraverishi oldiga to‘plansin.

⁴Karnayning bittasi chalinganda esa, Isroil qabilalarining yo‘lboshchilari sening oldingga yig‘ilib kelishsin.

⁵Karnay qisqa chalinganda, sharqdagi qarorgohda turgan qabilalar yo‘lga chiqishsin.

⁶Ikkinchi marta qisqa chalinganda esa, janubdagi qarorgohda turgan qabilalar yo‘lga chiqishsin. Karnayning qisqa sadosi yo‘lga chiqish kerakligini bildiradi [1].

⁷Jamoani yig‘ish lozim bo‘lganda esa, karnaylar boshqacha sado chiqarib chalinsin.

⁸Karnayni Horunning o‘g‘illari, ruhoniylar chalishlari lozim. Bu amr sizlar uchun va sizlarning avlodlaringiz uchun doimiy qonun–qoidadir.

⁹Yurtingizga bostirib kelgan dushmanga qarshi jangga otlanayotganingizda, xatardan darak berib karnaylarni chalinglar. Shunda Men, Egangiz Xudo, sizlarga yordam berib, sizlarni dushmanlaringiz qo‘lidan xalos qilaman.

¹⁰Shuningdek, xursandchilik kunlaringizda — belgilangan bayramlaringizda va oy boshida qurbonliklar kuydirganingizda hamda tinchlik qurbonliklarini keltirganingizda karnaylarni chalinglar. Shunda Men, Egangiz Xudo, sizlarga yordam beraman. Zotan, Men Egangiz Xudoman.”

¹¹Isroil xalqi Misrdan chiqqandan keyin ikkinchi yilning ikkinchi oyi [2] yigirmanchi kunida bulut Muqaddas ahd chodiri [3] tepasidan ko‘tarildi.

¹²Shundan so‘ng Isroil xalqi Sinay sahrosidan safarga chiqdi [4]. Nihoyat, bulut Poron sahrosida [5] to‘xtadi.

¹³Ular birinchi marta Egamizning Muso orqali bergan amriga ko‘ra, yo‘lga chiqqan edilar.

¹⁴Birinchi bo‘lib, Ominadov o‘g‘li Naxsho‘n boshchiligida Yahudo qarorgohida turgan qabilalar o‘z bayrog‘i ostida guruh–guruh bo‘lib yo‘lga chiqishdi.

¹⁵Issaxor qabilasiga Zuvor o‘g‘li Natanil boshchilik qilar edi.

¹⁶Zabulun qabilasiga Xalon o‘g‘li Eliyob boshchilik qilar edi.

¹⁷Shundan keyin Muqaddas chodir yig‘ishtirib olindi. Gershon va Marori urug‘lari chodirni ko‘tarib, yo‘lga chiqishdi.

¹⁸Keyin Shaduvor o‘g‘li Elizur boshchiligida Ruben qarorgohida turgan qabilalar o‘z bayrog‘i ostida guruh–guruh bo‘lib yo‘lga chiqishdi.

¹⁹Shimo‘n qabilasiga Zurishaday o‘g‘li Shalumiyol boshchilik qilar edi.

²⁰Gad qabilasiga Duvel o‘g‘li Eliasaf boshchilik qilar edi.

²¹Keyin chodirning muqaddas ashyolarini ko‘targan Qohot urug‘i yo‘lga chiqdi. Ular qarorgoh quriladigan joyga yetib borgunlaricha, Muqaddas chodir o‘rnatib bo‘linishi kerak edi.

²²Keyin Omihud o‘g‘li Elishama boshchiligida Efrayim qarorgohida turgan qabilalar o‘z bayrog‘i ostida guruh–guruh bo‘lib yo‘lga chiqishdi.

²³Manashe qabilasiga Padozur o‘g‘li Gamaliel boshchilik qilardi.

²⁴Benyamin qabilasiga Gido‘nax o‘g‘li Avidon boshchilik qilardi.

²⁵Eng oxirida Omishaday o‘g‘li Oxazar boshchiligida Dan qarorgohidagi qabilalar o‘z bayrog‘i ostida guruh–guruh bo‘lib yo‘lga chiqishdi. Ular Isroil qarorgohlarining qorovullar bo‘linmasini tashkil qilishgan edi.

²⁶Osher qabilasiga Oxron o‘g‘li Paxiyol boshchilik qilardi.

²⁷Naftali qabilasiga Enan o‘g‘li Oxir boshchilik qilardi.

²⁸Isroil xalqi doim shu tartibda guruh–guruh bo‘lib yo‘lga chiqar edi.

²⁹Muso o‘zining qaynag‘asi, Midiyonlik Yatro [6] o‘g‘li Xo‘vovga dedi: — Egamiz, sizlarga beraman, deb va’da qilgan yurtga biz ketyapmiz, siz ham biz bilan yuring. Egamiz bizga ko‘p yaxshiliklarni va’da qilgan, agar biz bilan borsangiz, biz ham sizga yaxshilik qilamiz.

³⁰— Bormayman, — dedi Xo‘vov, — men o‘z yurtimga — o‘zimning qarindoshlarim oldiga qaytib ketaman.

³¹— Iltimos, bizni tashlab ketmang! — dedi unga Muso. — Sahroning qaysi joyiga chodir tikish kerakligini siz bilasiz. Siz bizning ko‘zimiz bo‘lasiz.

³²Agar biz bilan birga borsangiz, Egamiz bizga qilgan hamma yaxshiliklarni siz bilan baham ko‘ramiz.

³³Ular Egamizning muqaddas tog‘ini [7] tark etganlaridan so‘ng, uch kun yo‘l yurishdi. Chodir tikadigan joyni topish uchun Egamizning ahd sandig‘i doimo oldinda borardi.

³⁴Ular kunduz kuni yo‘l yurganlarida, Egamizning buluti ularning ustida borar edi.

³⁵Sandiq yo‘lga chiqqanda, Muso shunday derdi: “Qo‘zg‘al, ey, Egam, Sening g‘animlaring tumtaraqay bo‘lsin. Seni ko‘rolmaganlar oldingdan qochib ketsin.”

³⁶Ahd sandig‘i to‘xtaganda esa Muso shunday derdi: “Qayt, ey, Egam, Ming–minglab Isroil xalqi orasiga!”