Read O‘zbek tilidagi Muqaddas Kitob, 2013 Sahroda 12 Bible Online

Sahroda 12 - O‘zbek tilidagi Muqaddas Kitob, 2013 bible

Sahroda 12

¹Muso Habashistonlik [1] ayolga uylangani uchun, Maryam va Horun Musoga qarshi gapirdilar.

²Ikkovi: “Egamiz yolg‘iz Muso orqali gapiribdimi?! U biz orqali ham gapirmaganmi?!” deyishdi. Egamiz ularning bu gapini eshitdi.

³Muso juda kamtar odam edi, yer yuzida kamtarlikda unga teng keladigani yo‘q edi.

⁴Egamiz birdan Muso, Horun va Maryamga: — Uchovingiz ham Uchrashuv chodiriga kelinglar! — deb amr berdi. Shundan so‘ng uchovlari Uchrashuv chodiriga kelishdi.

⁵Egamiz ustun shaklidagi bulutda tushib, chodirga kiraverishda turdi va Horun bilan Maryamni chaqirdi. Ikkovi oldinga chiqdi.

⁶Egamiz ularga dedi: — Mening so‘zlarimni eshitib olinglar. Orangizda payg‘ambar bo‘lganda, Men, Egangiz, O‘zimni ularga vahiyda ayon qilaman, ular bilan tushlarida gaplashaman.

⁷Lekin qulim Muso bilan boshqacha gaplashaman. Mening butun xalqim orasida ishonchlisi Musodir [2].

⁸Men u bilan jumboqli bashoratlar orqali emas, balki yuzma–yuz, ochiq–oydin gaplashaman. Muso Men, Egangizning sharpasini ko‘radi. Nahotki sizlar Mening qulim Musoga qarshi gapirishdan qo‘rqmadingizlar?!

⁹Egamiz ulardan qattiq g‘azablanib, uzoqlashdi.

¹⁰Bulut chodir tepasidan ketishi bilanoq, Maryam teri kasalligiga [3] chalinib, qorday oppoq bo‘lib qoldi. Horun buni ko‘rib,

¹¹Musoga yolvordi: — Ey, hazratim, biz ahmoqlik qilib qo‘ydik! O‘tinaman, gunohimizdan o‘ting!

¹²Maryam ona qornidayoq chiriy boshlagan o‘lik chaqaloqqa o‘xshab qolmasin!

¹³Shunda Muso Egamizga iltijo qilib: — Ey, Xudo, unga shifo ber! — deb yolvordi.

¹⁴Egamiz esa Musoga shunday javob berdi: — Agar Maryamning o‘z otasi uning yuziga tupurganda, u yetti kun sharmanda bo‘lib yurmasmidi?! Maryamni qarorgohdan chiqarib yuboringlar, u yetti kundan keyingina qarorgohga qaytib kelishi mumkin.

¹⁵Shunday qilib, Maryam qarorgohdan haydab chiqarildi. U yetti kun qarorgohdan tashqarida bo‘ldi. U qaytib kelmaguncha xalq yo‘lga chiqmay turdi.