Read O‘zbek tilidagi Muqaddas Kitob, 2013 Sahroda 13 Bible Online

Sahroda 13 - O‘zbek tilidagi Muqaddas Kitob, 2013 bible

Sahroda 13

¹Shundan so‘ng xalq Xazero‘tdan yo‘lga chiqib, Poron sahrosiga [1] kelib qarorgoh qurdi.

²Egamiz Musoga dedi:

³“Men Isroil xalqiga berayotgan Kan’on yurtiga ayg‘oqchilar yubor. Har bir qabiladan bittadan yo‘lboshchini jo‘nat.”

⁴Muso, Egamizning amriga muvofiq, qabila yo‘lboshchilarini Poron sahrosidan Kan’on yurtiga jo‘natdi.

⁵Ularning ismi quyidagichadir: Ruben qabilasidan — Zakkur o‘g‘li Shammuva.

⁶Shimo‘n qabilasidan — Xo‘ri o‘g‘li Shofot.

⁷Yahudo qabilasidan — Yafunax o‘g‘li Xolib.

⁸Issaxor qabilasidan — Yusuf o‘g‘li Yixal.

⁹Efrayim qabilasidan — Nun o‘g‘li Xo‘sheya [2].

¹⁰Benyamin qabilasidan — Rofu o‘g‘li Palti.

¹¹Zabulun qabilasidan — So‘di o‘g‘li Gaddiel.

¹²Yusuf qabilasidan, ya’ni Manashe qabilasidan — Susix o‘g‘li Gaddi.

¹³Dan qabilasidan — Gamali o‘g‘li Omiyol.

¹⁴Osher qabilasidan — Mikoyil o‘g‘li Satur.

¹⁵Naftali qabilasidan — Vofsi o‘g‘li Naxbi.

¹⁶Gad qabilasidan — Moxi o‘g‘li Guval.

¹⁷Muso Kan’on yurtiga ayg‘oqchilikka yuborgan odamlarning ismi ana shulardir. Muso Nun o‘g‘li Xo‘sheyaning ismini o‘zgartirib, uni Yoshua, deb atadi [3].

¹⁸Muso ularni Kan’on yurtiga ayg‘oqchilikka yuborar ekan, shunday dedi: “Shimolga qarab yuringlar, Nagav cho‘lini [4] aylanib chiqqaningizdan keyin, cho‘ldan shimolda joylashgan qirli yerlarni ham ko‘rib chiqinglar.

¹⁹U yerlar qanday joy, u yerda yashayotgan xalq kuchlimi yoki zaifmi, ko‘pmi yoki ozmi,

²⁰yurti yaxshimi yoki yomonmi, shaharlari devor bilan o‘ralganmi yoki yo‘qmi,

²¹yerlari unumdormi yoki kamhosilmi, daraxtlari bormi yoki yo‘qmi, bilib kelinglar. O‘sha yurtning mevalaridan olib kelishning ilojini qilinglar.” Uzum mavsumi endi boshlangan edi.

²²Shunday qilib, ayg‘oqchilar shimolga qarab ketishdi. Zin cho‘lidan boshlab, Levo–Xomat [5] yaqinidagi Rexob shahrigacha bo‘lgan hamma joylarni ko‘zdan kechirib chiqishdi.

²³Dastavval ular Nagav cho‘lini kesib o‘tib, Xevron shahriga [6] borishgandi. O‘sha yerda Inoqdan kelib chiqqan [7] Oximan, Sheshay va Talmay urug‘lari yashashardi. Xevron Misrdagi Zo‘van shahridan yetti yil oldin qurilgan edi.

²⁴U yerdan ayg‘oqchilar Eshko‘l soyligiga borib, bir bosh uzumni shoxi bilan qirqib olishgandi. Bu bosh uzumni ikki kishi xodaga osib ko‘tarib ketgandi. Bundan tashqari, ular anor va anjirlardan ham olishgandi.

²⁵Ayg‘oqchilar soylikdan bir bosh uzum qirqib olganlari uchun o‘sha soylikka Eshko‘l [8], deb nom berildi.

²⁶Nihoyat, ular yurtni ko‘rib chiqib, qirqinchi kuni qaytishdi.

²⁷Poron sahrosidagi Kadeshga [9] — Muso, Horun va butun Isroil jamoasi oldiga kelishdi. Ularga ko‘rgan–bilganlarini aytib, o‘sha yurtning mevalarini ko‘rsatishdi.

²⁸Ular Musoga shunday deb aytishdi: — Siz bizni yuborgan yurtga bordik, u yerda chindan ham sut va asal oqib yotibdi [10]. Mana bu mevalar o‘sha yerdan.

²⁹Lekin u yerdagi xalqlar kuchli, shaharlari mustahkam va nihoyatda ulkan ekan. Biz u yerda hatto Inoq avlodini [11] ham ko‘rdik!

³⁰Omolek xalqi — Nagav cho‘lida, Xet, Yobus va Amor xalqlari — qirlarda, Kan’on xalqi esa O‘rta yer dengizi qirg‘oqlarida va Iordan daryosi bo‘ylarida istiqomat qilishar ekan.

³¹Xolib Musoning ro‘parasida turgan xalqni tinchlantirib: — Bo‘la qolinglar, o‘sha yurtga hujum qilib, uni egallab olaylik. O‘sha yurtni bosib olishga albatta kuchimiz yetadi, — dedi.

³²Lekin Xolib bilan birga borganlar: — U xalqqa bas kela olarmidik?! Ular bizdan kuchliroq–ku! — deyishdi.

³³Shunday qilib, ular o‘zlari ko‘rib kelgan yurt to‘g‘risida Isroil xalqi orasida bo‘lmag‘ur mish–mishlar tarqata boshlashdi: “Biz ko‘rib kelgan yurt u yerda yashashga boradiganlarni yutib yuborar ekan. O‘sha yurtdagi hamma odamlar dev qomat ekan.

³⁴Biz u yerda hatto ulkan pahlavonlar [12] urug‘idan bo‘lgan Inoq avlodini ko‘rdik. Ularning oldida o‘zimizni xuddi chigirtkaday his qildik. Ha, ularning nazarida ham biz chigirtkaday edik.”