Read O‘zbek tilidagi Muqaddas Kitob, 2013 Sahroda 16 Bible Online

Sahroda 16 - O‘zbek tilidagi Muqaddas Kitob, 2013 bible

Sahroda 16

¹[1-2] Bir kuni Levi qabilasining Qohot urug‘idan bo‘lgan Izxor o‘g‘li Ko‘rax Musoga qarshi isyon ko‘tardi. U Ruben qabilasidan Eliyobning o‘g‘illari Datan va Aburamni hamda Palaf o‘g‘li Onni yoniga qo‘shib oldi. Isroil xalqining 250 yo‘lboshchisi ham ularga qo‘shildi. Bu yo‘lboshchilar jamoa kengashining tayinlangan a’zolaridan bo‘lib, obro‘li kishilar edi.

³Ular Muso bilan Horunga qarshi yig‘ilishib, ikkoviga shunday deyishdi: — Sizlar haddingizdan oshib ketdingiz! Axir, butun jamoa va uning har bir a’zosi Egamizga tegishli–ku! Egamiz hammamiz bilan birgadir. Nimaga endi sizlar o‘zingizni Egamizning jamoasidan ustun qo‘yyapsizlar?!

⁴Muso bu gapni eshitib, muk tushdi [1].

⁵So‘ng Ko‘rax va uning sheriklariga shunday dedi: — Ertaga ertalab Egamiz O‘ziga tegishli bo‘lgan odamini ko‘rsatadi. Kim Xudoning tanlangani bo‘lsa, Egam o‘shani O‘ziga yaqinlashtiradi.

⁶Sen, Ko‘rax, hamtovoqlaring bilan birga otashkuraklaringizni olib,

⁷ertaga Egamiz oldida o‘sha otashkuraklaringizda tutatqi tutatinglar. O‘shanda Egamiz kimni tanlab olganini, kim Unga tegishli ekanligini ko‘ramiz [2]. Ey, levilar, sizlar haddingizdan oshib ketdingizlar!

⁸Keyin Muso: — Ey, levilar, eshitib olinglar! — dedi Ko‘raxga.

⁹— Isroil xalqining Xudosi sizlarni Isroil jamoasidan ajratib oldi. Muqaddas chodirdagi yumushlarni bajarishingiz uchun sizlarni O‘ziga yaqinlashtirdi. Jamoa vakili sifatida butun xalqqa xizmat qilishingiz uchun sizlarni tanlab oldi. Nahotki shunisi sizlarga kamlik qilsa?!

¹⁰Egamiz sizlarni, hamma levi birodarlaringizni O‘ziga yaqinlashtirgan bo‘lsa, yana ruhoniylikni ham talab qilishingiz nimasi?

¹¹Horun kim bo‘ptiki, sizlar undan ming‘irlab nolisangiz? Sizlar asli Horunga emas, Egamizga qarshi yig‘ilgansiz!

¹²Muso Eliyobning o‘g‘illari Datan va Aburamni chaqirib kelgani odam yubordi. Lekin ular: — Bormaymiz! — deb javob berishdi,

¹³— Sen bizni sut va asal oqib yotgan yurtdan [3] olib chiqib, sahroda halok qilmoqchi bo‘lding. Shunisi yetmaganday, endi bizga xon bo‘lmoqchimisan?!

¹⁴Sen bizni sut va asal oqib yotgan yurtga olib kirmading, mulk qilib dalalaru uzumzorlarni bermading. Shu paytgacha bizni laqillatib kelyapsan. Yo‘q, oldingga bormaymiz!

¹⁵Muso qattiq g‘azablanib, Egamizga aytdi: — Ularning nazrlarini qabul qilma. Men ularning birortasiga yomonlik qilmadim–ku, ularning birontasidan hatto eshagini ham olmadim–ku!

¹⁶So‘ng Muso Ko‘raxga aytdi: — Ertaga o‘zing ham, hamma sheriklaring ham Egamiz oldida hozir bo‘linglar. Horun ham shu yerda bo‘ladi.

¹⁷250 ta yo‘lboshchining hammasi otashkuraklariga tutatqi solib, Egamizning huzuriga olib kelishsin. Sen ham otashkuragingni olib kel, Horun ham o‘zinikini olib keladi.

¹⁸Shunday qilib, ertasi kuni har bir odam o‘z otashkuragini oldi. Otashkurakka cho‘g‘ solib, cho‘g‘ ustiga tutatqi tashladi. Ular Muso va Horun bilan birga Uchrashuv chodiri kiraverishiga kelib turishdi.

¹⁹Ko‘rax butun jamoani Uchrashuv chodiri kiraverishi oldiga — Muso va Horunning ro‘parasiga to‘plagach, Egamiz ulug‘vorligini butun jamoaga zohir qildi.

²⁰Keyin Egamiz Muso bilan Horunga:

²¹— Bu jamoadan nari turinglar, — dedi. — Men ularni bir zumda yo‘q qilib yuboraman.

²²Ikkovi esa muk tushib: — Ey, Xudoyim! Ey, odamzod ruhlarining Xudosi! — deb iltijo qilishdi. — Gunoh qilgan bitta odamu Sen esa butun jamoadan g‘azablanyapsanmi?!

²³Egamiz Musoga dedi:

²⁴— Jamoaga ayt, ular Ko‘rax, Datan va Aburamning chodirlaridan uzoqroq turishsin.

²⁵Muso o‘rnida turib, Datan bilan Aburamning oldiga ketdi. Isroil oqsoqollari ham Musoga ergashishdi.

²⁶Muso jamoaga dedi: — Bu qabih odamlarning chodirlaridan uzoqroq turinglar. Ularning biror narsasiga ham tegmanglar. Aks holda ularning hamma gunohlari uchun sizlar nobud bo‘lasizlar.

²⁷Jamoa Ko‘rax, Datan va Aburamning chodirlaridan uzoqroqqa borib turishdi. Datan va Aburam esa xotinlari, bola–chaqalari bilan chodirlarining kiraverishiga chiqib turgan edilar.

²⁸— Bu ishlarning hammasini ado etishim uchun meni Egamiz yuborganini, bularni o‘zimcha qilmaganimni shundan bilasizlar, — dedi Muso.

²⁹— Agar Ko‘rax va uning sheriklari o‘z ajali bilan, hamma odamlar kabi o‘lishsa, meni Egamiz jo‘natmagan bo‘ladi.

³⁰Bordi–yu, Egamiz favqulodda biror yangi narsa qilsa — yer yorilib ularni bor narsasi bilan yutib yuborsa, ular o‘liklar diyoriga [4] tiriklayin kirib ketishsa, bilinglarki, o‘sha odamlar Egamizni xo‘rlagan bo‘ladi.

³¹Muso gapini endi tugatgan ham ediki, ularning oyog‘i ostidagi yer yorilib ketdi.

³²Yerning og‘zi katta ochilib, ularni oila a’zolari, Ko‘raxning hamma sheriklari, mol–mulki bilan birga yutib yubordi.

³³Shunday qilib, ular jamiki mol–mulki bilan birga tiriklayin o‘liklar diyoriga kirib ketishdi. Yer yopilib, ularni jamoa orasidan g‘oyib qildi.

³⁴Ularning faryodidan atrofda turgan Isroil xalqi: “Bizni ham yer yutib yubormasin”, deb tum–taraqay bo‘ldi.

³⁵Shu payt Egamiz alanga yuborib, tutatqi tutatgan 250 ta odamni kuydirib yubordi.

³⁶Egamiz yana Musoga dedi:

³⁷[37-38] — Horunning o‘g‘li ruhoniy Elazarga ayt. U gunohlari uchun o‘ldirilganlarning otashkuraklarini yong‘in orasidan yig‘ishtirib olsin. Otashkuraklardagi cho‘g‘larni bir chetga chiqarib tashlasin, chunki otashkuraklar muqaddasdir. Bu otashkuraklar Menga nazr qilish uchun foydalanilganda, muqaddas bo‘lgan. Bu otashkuraklarni yoyib, qurbongohni qoplash uchun tunuka qilinglar. Bular Isroil xalqini ogohlantiruvchi bir belgi bo‘ladi.

³⁸

³⁹Ruhoniy Elazar kuyib o‘lganlarning tutatqi tutatgan bronza otashkuraklarini yig‘ishtirib oldi. Ular otashkuraklarni yoyib, qurbongohni qoplash uchun tunuka holiga keltirishdi.

⁴⁰Horunning naslidan bo‘lmagan birorta odam Egamizning oldida tutatqi tutatib, Ko‘rax va uning sheriklari kabi halok bo‘lmasligi uchun, bular Isroil xalqini ogohlantirib turar edi. Shunday qilib, Egamizning Muso orqali bergan ko‘rsatmalari amalga oshirildi.

⁴¹Ertasiga jamiki Isroil jamoasi Muso bilan Horundan norozi bo‘lib: “Egamizning xalqini sizlar o‘ldirdingizlar”, deb ming‘irlay boshladi.

⁴²Jamoa ularga qarshi yig‘ilgan paytda Muso bilan Horun Uchrashuv chodiri tomon burilib qarashsa, chodirni bulut qoplab olgan, Egamiz ulug‘vorligini zohir qilgan ekan.

⁴³Ular Uchrashuv chodirining old tomoniga borib turishganda,

⁴⁴Egamiz Musoga dedi:

⁴⁵— Bu jamoadan nari tur, Men ularni hozirning o‘zidayoq yo‘q qilib yuboraman. Ammo Muso bilan Horun yerga muk tushdi.

⁴⁶Muso Horunga dedi: — Qani, bo‘l, otashkuragingni ol! Qurbongohdan otashkurakka cho‘g‘ solib, ustiga tutatqi tashla–da, tezroq jamoaning oldiga bor. Ularni gunohlaridan pokla. Egamiz g‘azabini sochdi, odamlar o‘latdan nobud bo‘lyapti.

⁴⁷Horun Muso buyurganday qilib, jamoaning orasiga yugurib bordi. Odamlar haqiqatan ham o‘latdan nobud bo‘lishayotgan edi. Horun tutatqi tutatib, Isroil xalqini gunohlaridan pokladi.

⁴⁸U tiriklar bilan marhumlarning o‘rtasiga turgan edi, o‘lat to‘xtadi.

⁴⁹Lekin o‘latdan 14.700 kishi nobud bo‘lgan edi. Ko‘raxning qilmishi tufayli o‘lganlar bu hisobga kirmasdi.

⁵⁰O‘lat to‘xtagandan keyin Horun Uchrashuv chodiriga kiraverishda turgan Musoning yoniga qaytib keldi.