Read O‘zbek tilidagi Muqaddas Kitob, 2013 Sahroda 20 Bible Online

Sahroda 20 - O‘zbek tilidagi Muqaddas Kitob, 2013 bible

Sahroda 20

¹Birinchi oyda [1] butun Isroil jamoasi Zin cho‘liga [2] yetib keldi va Kadeshda [3] o‘rnashdi. Maryam o‘sha yerda vafot etib, dafn qilindi.

²U yerda jamoa uchun ichishga suv yo‘q edi. Shu sababli xalq Muso bilan Horunga qarshi yig‘ilib,

³Musoga ta’na qila boshlashdi: — Biz ham qarindoshlarimiz bilan birga Egamiz oldida qirilib ketsak bo‘lmasmidi–ya! [4]

⁴Nimaga sizlar Egamizning jamoasini mana shu sahroga olib keldingizlar? Biz mol–holimiz bilan birga qirilib ketishimiz uchunmi?!

⁵Nimaga bizni Misrdan olib chiqib, mana shu kasofat joyga olib keldingizlar o‘zi? Bu yerda ekin ekib bo‘lmasa, birorta anjir daraxti, uzum yoki anorlar bo‘lmasa. Bu yerda hatto ichishga suv ham topib bo‘lmaydi–ku!

⁶Muso bilan Horun jamoa oldidan ketishdi. Ular Uchrashuv chodiri kiraverishiga borib, muk tushishdi. Shunda Egamiz ulug‘vorligini ularga zohir qildi.

⁷Egamiz Musoga dedi:

⁸— Tayog‘ingni ol. Akang Horun bilan birgalikda jamoani yig‘inglar. So‘ng jamoaning ko‘zi oldida qoyaga buyruq beringlar. Shunda qoyadan suv chiqadi. Shu yo‘sinda sizlar qoyadan suv chiqarib, jamoaga ham, ularning mollariga ham suv berasizlar.

⁹Muso Egamizning aytganini qilib, Egamiz huzuridagi tayoqni oldi.

¹⁰So‘ng Muso bilan Horun jamoani qoya yoniga yig‘ishdi. Muso ularga: — Quloq solinglar, ey, isyonchilar! Mana shu qoyadan biz sizlarga suv chiqarib berishimiz kerakmi? — dedi.

¹¹Muso qo‘lini ko‘tarib, qoyaga tayog‘i bilan ikki marta urgan edi, qoyadan sharillab suv oqdi. Jamoaning o‘zi ham, ularning mollari ham suv ichdi.

¹²Shunda Egamiz Muso bilan Horunga dedi: — Menga yetarlicha inonmaganingiz uchun, Isroil xalqiga Mening muqaddasligimni namoyon qilmaganingiz uchun, bu jamoani Men ularga beradigan yurtga sizlar boshlab kirmaysiz.

¹³Isroil xalqi bu yerda Egamizdan noligani uchun bu joy Mariva [5], deb nom oldi. O‘sha joyda Egamiz Isroil xalqiga O‘zining muqaddasligini namoyon qildi.

¹⁴Muso Kadeshdan Edom [6] shohiga choparlar orqali quyidagi mazmunda bir xabar jo‘natdi: “Biz, Isroil xalqi, sizning jigaringizmiz [7]. Bizning boshimizga tushgan kulfatlardan sizlar xabardorsiz.

¹⁵Bizning otalarimiz Misrga ko‘chib borgan edilar. Biz Misrda uzoq vaqt yashadik. Misrliklar otalarimizga ham, bizga ham zulm o‘tkazishdi.

¹⁶Keyin biz Egamizga yolvorib iltijo qilgan edik, U bizning iltijoimizni eshitdi. U farishtasini jo‘natib, bizni Misrdan olib chiqdi. Mana endi biz Kadeshda — yurtingiz chegarasidagi shaharda turibmiz.

¹⁷Bizga yurtingiz orqali o‘tib ketishga ijozat bersangiz. Biz ekinzorlaringiz va uzumzorlaringizga kirmaymiz, quduqlaringiz suvidan ichmaymiz. Sizning yurtingizdan o‘tib ketgunimizcha, faqat Shoh yo‘lidan [8] yuramiz, yo‘ldan o‘ngga ham, chapga ham chiqmaymiz.”

¹⁸Lekin Edom shohi Musoga: “Mening yurtimdan o‘ta ko‘rma, aks holda ustingga qilich yalang‘ochlab bostirib boraman”, — deb javob yubordi.

¹⁹Isroil xalqi esa Edom shohidan iltimos qildi: “Biz katta yo‘ldan ketamiz. Agar suvingizdan o‘zimiz yoki mollarimiz ichsa, haqini to‘laymiz. Biz bor–yo‘g‘i yurtingizdan o‘tib ketmoqchimiz, xolos.”

²⁰Lekin Edom shohi: “O‘tmaysizlar!” — deb turib oldi. U Isroil xalqiga qarshi tish–tirnog‘igacha qurollangan katta lashkarini boshlab chiqdi.

²¹Xullas, Edom shohi Isroil xalqiga o‘z yurtidan o‘tib ketishga ijozat bermadi. Isroil xalqi Edom yurtini chetlab o‘tib ketdi.

²²Butun Isroil jamoasi Kadeshdan jo‘nab, Xo‘r tog‘iga yetib keldi.

²³Egamiz Muso bilan Horunga Xo‘r tog‘ida — Edom yurti chegarasida shunday dedi:

²⁴— Horunning bu olamdan ko‘z yumadigan vaqti keldi. Men Isroil xalqiga beradigan yurtga u kirmaydi. Chunki sizlar ikkovingiz Mariva suvlari yonida Mening amrimga qarshi chiqdingizlar.

²⁵Endi sen Horun bilan uning o‘g‘li Elazarni Xo‘r tog‘iga boshlab chiq.

²⁶Horunning ustidan ruhoniylik kiyimlarini yechib olib, o‘g‘li Elazarga kiygiz. Horun o‘sha yerda vafot etadi.

²⁷Muso Egamiz amr berganday qildi. Uchalovi Xo‘r tog‘iga chiqishdi, butun jamoa buni ko‘rib turdi.

²⁸Muso Horunning ustidan kiyimlarini yechib olib, uning o‘g‘li Elazarga kiygizdi. Horun o‘sha yerda — tog‘ tepasida vafot etdi. Shundan so‘ng Muso bilan Elazar tog‘dan qaytib tushishdi.

²⁹Butun jamoa Horunning vafot etganini bildi. Jamiki Isroil xalqi Horun uchun o‘ttiz kun aza tutdi.