Read O‘zbek tilidagi Muqaddas Kitob, 2013 Sahroda 21 Bible Online

Sahroda 21 - O‘zbek tilidagi Muqaddas Kitob, 2013 bible

Sahroda 21

¹Nagav cho‘lida [1] istiqomat qilayotgan Arod shohi: “Isroil xalqi Otorim yo‘lidan kelyapti ekan”, degan xabarni eshitib jangga otlandi. Kan’on naslidan bo‘lgan bu shoh Isroil xalqi bilan jang qilib, ulardan bir nechtasini asir oldi.

²Bu voqeadan so‘ng Isroil xalqi Egamizga qasam ichib, shunday dedi: — Ey, Egamiz! Agar Sen shu xalqni bizning qo‘limizga bersang, ularning hamma shaharlarini butunlay vayron qilamiz [2].

³Egamiz Isroil xalqining iltijosini eshitib, Kan’on xalqini ularning qo‘liga berdi. Ular Kan’onliklarning o‘zlarini qirib tashlab, shaharlarini butunlay vayron qilishdi. Shuning uchun bu joyga Xo‘rmax [3], deb nom berildi.

⁴Isroil xalqi Xo‘r tog‘ini tark etib, Edom yerlarini chetlab o‘tish uchun Qizil dengizga [4] boradigan yo‘ldan ketdi. Lekin xalq yo‘lda ketayotib, yana sabrsizlik qildi.

⁵Ular ming‘irlab Xudodan va Musodan noliy boshladilar: — Nimaga bizni Misrdan olib chiqdingizlar? Sahroda o‘lib ketishimiz uchunmi?! Bu yerda na non bor, na suv. Mana bu bo‘lmag‘ur manna me’damizga tegib ketdi–ku!

⁶Shu voqeadan keyin Egamiz xalq orasiga zaharli ilonlarni jo‘natdi, ilonlar Isroil xalqining ko‘pchiligini chaqib o‘ldirdi.

⁷Oxiri xalq Musoning oldiga kelib: — Biz Egamizga ham, senga ham qarshi gapirib gunoh qildik, — dedi, — Egamizga iltijo qil, U bizning oramizdan ilonlarni daf qilsin. Muso xalq uchun Egamizga iltijo qildi.

⁸Shunda Egamiz Musoga dedi: — Ilon yasab, uni xodaga mahkamlab qo‘y. Ilon chaqqan odam o‘shanga qarab tirik qoladi.

⁹Muso bronzadan ilonni yasab [5], uni xodaga mahkamlab qo‘ydi. Ilon chaqqan odam bronzadan yasalgan ilonga qaraganda, o‘lmasdan tirik qolardi.

¹⁰Isroil xalqi safarini davom ettirib, Obo‘tda qarorgoh qurdi.

¹¹So‘ng ular Obo‘tdan ham ketib Ivay–Aborimga qo‘nishdi. Ivay–Aborim Mo‘ab yurtining sharqidagi sahroda joylashgan edi.

¹²U yerdan ham ketib, Zarad soyligida to‘xtashdi.

¹³So‘ng yana yo‘lga chiqib, Arnon soyligining shimoliy qirg‘og‘iga — Amor yurtining chegarasiga tutash bo‘lgan sahroga joylashishdi. Arnon soyligi [6] Amor va Mo‘ab yurtlarining o‘rtasida chegara edi.

¹⁴Shu sababdan “Egamizning jangnomasi” kitobida [7] Sufa yerlaridagi Vohib shahri va soyliklar eslanadi. Shuningdek, Arnon soyligi

¹⁵va Mo‘ab chegarasidagi Or shahrigacha cho‘zilgan daryoning irmoqlari eslanadi.

¹⁶Isroil xalqi u yerdan chiqib, Ber [8] degan joydagi quduqqa yo‘l oldi. O‘sha quduq yonida Egamiz Musoga: “Xalqni yig‘, Men ularga suv beraman”, dedi.

¹⁷O‘shanda Isroil xalqi shu qo‘shiqni kuyladi: “To‘lib–tosh, ey, quduq, Quduq haqida kuylang!

¹⁸Yo‘lboshchilar qazigandi bu quduqni, Asilzodalar kovlagandi bu quduqni Saltanat hassalari ila, Saltanat tamg‘alari ila.” So‘ng ular sahrodan Mattono shahriga yo‘l oldilar.

¹⁹Mattonodan esa Nahaliyolga, Nahaliyoldan Bomo‘tga,

²⁰Bomo‘tdan Mo‘ab yerlaridagi vodiyga borishdi. Fisgax tog‘ tizmasi [9] yonidagi bu vodiydan sahroning manzarasi ochilardi.

²¹Keyin Isroil xalqi Amor xalqining shohi Sixo‘nga shu gapni aytish uchun choparlar jo‘natdi:

²²“Bizga yurtingiz orqali o‘tib ketishga ijozat bersangiz. Biz ekinzorlaringizga, uzumzorlaringizga kirmaymiz, quduqlaringiz suvidan ichmaymiz. Sizning yurtingizdan o‘tib ketguncha, faqat Shoh yo‘lidan [10] yuramiz.”

²³Lekin Sixo‘n Isroil xalqiga o‘z yurtidan o‘tib ketishga ijozat bermadi. U jamiki lashkarini yig‘ib, sahrodagi Yaxaz shahri yonida Isroil xalqiga hujum qildi.

²⁴Jangda Isroil xalqi Sixo‘nni mag‘lub etdi va Arnon soyligidan tortib Yavoq daryosigacha [11] bo‘lgan hamma yerlarini egallab oldi. Lekin Ommon xalqining chegarasidan u yog‘iga o‘tmadi, chunki Ommon yurtining chegarasi mustahkam edi.

²⁵Isroil xalqi Amor xalqining hamma shaharlarini, xususan, Xashbon shahri [12] va uning atrofidagi qishloqlarni bosib olib, o‘sha shaharlarda o‘rnashib oldi.

²⁶Xashbon shahri shoh Sixo‘nning poytaxti edi. Sixo‘n Mo‘abning oldingi shohi bilan jang qilib, uning Arnon soyligigacha bo‘lgan hamma yerlarini bosib olgan edi.

²⁷Shuning uchun dostonchilar aytishardi: “Xashbonga kelinglar, qayta quringlar uni, Mustahkam etinglar Sixo‘n shahrini.

²⁸Olov chiqib ketdi–ku Xashbon shahridan, Alanga chiqdi shoh Sixo‘nning shahridan. Yong‘in yakson qildi Mo‘abdagi Or shahrini, Yo‘q qildi Arnon qirlari shohlarini.

²⁹Holingga voy, ey, Mo‘ab xalqi! Tamom bo‘ldingiz, Xamo‘sh [13] ixlosmandlari! Xamo‘sh qochqin qildi o‘g‘illaringizni, Amor xalqining shohi Sixo‘nga asir qildi Sizning qiz–juvonlaringizni.

³⁰Qirib tashladik biz ularni, Xashbondan Dibonga qadar yo‘q qildik hammasini. No‘faxdan Midavoga qadar vayron qildik ularni.”

³¹Shunday qilib, Isroil xalqi Amor xalqining yurtida o‘rnashib oldi.

³²Muso Yazir shahriga ayg‘oqchilar jo‘natdi. Isroil xalqi Yazir va uning atrofidagi qishloqlarni bosib olib, u yerda istiqomat qilayotgan Amor xalqini haydab chiqardi.

³³So‘ng ular Bashanga [14] yo‘l olishdi. Bashan shohi O‘g esa Isroil xalqiga qarshilik ko‘rsatish uchun jamiki lashkarini Edrey shahriga tortib bordi.

³⁴Shunda Egamiz Musoga dedi: — Qo‘rqma undan, Men O‘gni butun yurti va xalqi bilan birga sening qo‘lingga beraman. Sen O‘gning boshiga Xashbonda hukmronlik qilgan Amor xalqining shohi Sixo‘nning kunini solasan.

³⁵Isroil xalqi O‘gni, uning o‘g‘illarini, butun xalqini bitta qoldirmay qirib tashladi. So‘ng ular O‘gning yurtini qo‘lga kiritishdi.