Read O‘zbek tilidagi Muqaddas Kitob, 2013 Sahroda 23 Bible Online

Sahroda 23 - O‘zbek tilidagi Muqaddas Kitob, 2013 bible

Sahroda 23

¹Balom Boloqqa dedi: — Shu yerda men uchun yettita qurbongoh qurib, yettita buqa va yettita qo‘chqorni tayyorlab qo‘y.

²Boloq Balom aytganday qildi. So‘ng ikkovlari har bir qurbongohda bittadan buqa va bittadan qo‘chqorni qurbonlik qilishdi.

³Keyin Balom Boloqqa dedi: — Sen kuydirilgan qurbonliklaring yonida qol, men esa borib ko‘ray, Egamiz menga peshvoz chiqarmikin. U menga nimani ayon qilsa, shuni senga aytaman. Balom tepalikka chiqdi.

⁴Xudo Balom bilan uchrashgach, Balom Xudoga dedi: — Men yettita qurbongoh qurdirib, har bir qurbongohda bittadan buqa va bittadan qo‘chqorni qurbonlik qildim.

⁵Egamiz Balomning og‘ziga so‘z solib: — Boloqning oldiga qaytib bor, unga Men aytgan so‘zlarimni yetkaz, — dedi.

⁶Balom Boloqning oldiga qaytib keldi. Boloq hamma Mo‘ab a’yonlari bilan birga kuydirilgan qurbonliklarning yonida turgan edi.

⁷Balom quyidagicha bashorat qildi: “Meni Mo‘ab shohi Boloq sharqiy tog‘lardan, Oramdan [1] olib kelib, dedi: “Kel, men uchun Yoqub naslini la’natla, Kel, Isroil xalqini sen qarg‘a!”

⁸Xudo la’natlamaganni men qanday la’natlayin?! Egamiz qarg‘amaganni qanday qilib qarg‘ayin?!

⁹Qoyaning tepasida turib men ularni ko‘ryapman, Tepalikdan ularga qarab turibman, Yashaydi bu xalq hammadan alohida. O‘zgachadir ular xalqlar orasida.

¹⁰Qumday sanoqsiz bo‘lgan Yoqub naslini kim sanab chiqar?! Isroilning choragini kim hisoblab chiqa olar?! Men ham to‘g‘ri odam kabi olamdan o‘tay, Iloyim, bo‘lsin ularnikiday oxiratim baxayr.”

¹¹— Sen nima qilyapsan o‘zi? — dedi Boloq Balomga. — Men seni, dushmanlarimni la’natlaydi, deb chaqirtirib kelgan edim, sen esa ularni duo qilyapsan–ku!

¹²— Men faqat Egamiz og‘zimga solgan so‘zni aytishim kerak–ku! — deb javob berdi Balom.

¹³— Kel, men bilan birga boshqa joyga bora qol, — dedi unga Boloq. — Sen o‘sha joydan Isroil xalqining bir qismini ko‘rasan. O‘sha joydan turib Isroilni men uchun la’natla.

¹⁴Boloq Balomni Fisgax tog‘ tizmasi [2] tepasidagi Zo‘fim degan yassi joyga boshlab keldi. U yerda ham yettita qurbongoh qurib, har bir qurbongoh ustida bittadan buqa va bittadan qo‘chqorni qurbonlik qildi.

¹⁵So‘ng Balom Boloqqa dedi: — Sen shu yerda — kuydirilgan qurbonliklaring yonida qol, men esa hov anavi yerga borib, Egamiz bilan uchrashib kelaman.

¹⁶Egamiz Balomga peshvoz chiqib, uning og‘ziga so‘z soldi. So‘ng: — Boloqning oldiga qaytib bor, unga Men aytgan so‘zlarimni ayt, — dedi.

¹⁷Balom Boloqning oldiga qaytib keldi. Boloq Mo‘ab a’yonlari bilan birga kuydirilgan qurbonliklarning yonida turgan edi. — Egang nima dedi? — deb so‘radi undan Boloq.

¹⁸Balom quyidagicha bashorat qildi: “Menga qara, ey, Zippur o‘g‘li Boloq, Gaplarimni eshit, yaxshilab solgin quloq.

¹⁹Xudo inson emaski, U yolg‘on gapirsa, U odam emaski, fikrini o‘zgartirsa. U doim va’dasi ustidan chiqar! O‘z aytganlarin albatta bajarar!

²⁰Xudo menga berdi duo so‘zlarini, O‘zgartira olmayman men Xudoning barakasini.

²¹Men Isroilning kelajagini ko‘ryapman, Yoqub nasli boshiga kulfat tushmas, Bu xalq biror ko‘rgilik ko‘rmas. Egasi Xudo ularning orasida, Shoh, deya olqishlar Uni hamma.

²²Yovvoyi buqaning kuchi bilan Xudo ularni Misrdan olib chiqqan.

²³Yoqub nasliga qarshi sehr–jodu yo‘q, Isroilga qarshi [3] folbinlik yo‘q. Odamlar Yoqub nasli haqida, Isroil to‘g‘risida: “Qaranglar, Xudo nimalarni qilgan”, deb aytishar.

²⁴Isroil xalqi sher kabi qo‘zg‘alar, Arslonday sakrab turar, O‘ljasini yeb bitirmaguncha, Qurbonlarning qoniga to‘ymaguncha yotmas.”

²⁵Shundan so‘ng Boloq Balomga aytdi: — Isroil xalqini la’natlamagin ham, duo ham qilmagin!

²⁶Lekin Balom Boloqqa: — Men sizga, faqat Egamizning aytganini qilaman, deb aytmaganmidim?! — dedi.

²⁷— Yur, endi men seni boshqa joyga olib boraman, — dedi Boloq. — Balki shunda Xudo mamnun bo‘lib, o‘sha yerdan turib men uchun Isroilni la’natlashingga yo‘l qo‘yar.

²⁸Boloq Balomni Piyor tog‘ining [4] tepasiga boshlab olib chiqdi. Bu tog‘dan sahroning manzarasi ko‘rinib turardi.

²⁹Balom Boloqqa dedi: — Shu yerda menga yettita qurbongoh qurib, yettita buqa bilan yettita qo‘chqorni tayyorlab qo‘y.

³⁰Boloq Balom aytganday qilib, har bir qurbongohda bittadan buqa va bittadan qo‘chqorni qurbonlik qildi.