Read O‘zbek tilidagi Muqaddas Kitob, 2013 Sahroda 24 Bible Online

Sahroda 24 - O‘zbek tilidagi Muqaddas Kitob, 2013 bible

Sahroda 24

¹Balom Isroilni duo qilayotgani Egamizga ma’qul kelganini ko‘rib, bu safar fol ochgani bormadi. U sahro tomon nazar tashlab,

²u yerda qabila–qabila bo‘lib qarorgoh qurgan Isroil xalqini ko‘rdi. Shunda Xudoning Ruhi Balomni qamrab oldi,

³Balom shunday bashorat qildi: “Bavo‘r o‘g‘li Balom gapiryapti, Ko‘zi ochiq inson so‘zlayapti.

⁴Xudoning kalomini eshitgan, Qodir Xudodan kelgan vahiyni ko‘rgan, Hushidan ayrilgan, lekin ko‘zlari katta ochiq odam aytyapti.

⁵Ey, Yoqub nasli! Chodirlaringiz qanday ajoyib! Ey, Isroil xalqi! Makoningiz qanday go‘zal!

⁶Chodiru makonlaringiz palmazor [1] singari bepoyon, Bamisoli daryo bo‘yidagi bog‘–rog‘lardir, Egamiz o‘tqazgan aloega o‘xshar, Suv bo‘yidagi sadr daraxti kabidir.

⁷Ularning chelaklari suv bilan to‘lib–toshar, Ekkan urug‘lari miriqib suvga to‘yar. Isroil shohi O‘gaxdan [2] ustun bo‘lar, Isroil shohligi g‘oyat yuksalar.

⁸Yovvoyi buqaning kuchi bilan Xudo Misrdan olib chiqqan ularni. Isroil xalqi yamlamay yutar g‘animlarini, Ularning suyaklarini maydalab tashlar, O‘qlar otib, ularni yakson etar.

⁹Ana, u urg‘ochi sherday egildi–da, yotdi. Uni turg‘izishga kim jur’at etar?! Seni duo qilganlar baraka topar, Seni la’natlaganlar la’nati bo‘lar!”

¹⁰Boloq Balomdan qattiq g‘azablanganidan kaftini kaftiga urib: — Men seni, g‘animlarimni la’natlagin, deb oldirib kelgan edim. Sen esa ularni uch marta duo qilding! — deb do‘q urdi.

¹¹— Yo‘qol! Uyingga jo‘na! Men seni mukofotlamoqchi edim, lekin Egang seni mukofotdan mahrum qildi.

¹²Shunda Balom Boloqqa dedi: — Mening oldimga jo‘natgan choparlaringga:

¹³“Boloq menga saroyidagi hamma oltinu kumushini bersa ham, men Egamizning aytganidan chetga chiqa olmayman. O‘z ixtiyorim bilan biror yaxshi yoki yomon ish qilolmayman. Egamiz menga nima desa, shuni aytaman”, deb aytmaganmidim?!

¹⁴Endi men o‘z xalqim oldiga qaytib ketaman. Lekin ketishimdan oldin, Isroil xalqi kelajakda xalqing boshiga qanday kunlarni solishini senga aytib qo‘yay.

¹⁵Shundan so‘ng Balom quyidagicha bashorat qildi: “Bavo‘r o‘g‘li Balom gapiryapti, Ko‘zi ochiq inson so‘zlayapti.

¹⁶Xudoning kalomini eshitgan, Xudoyi Taolodan ilmu ma’rifat olgan, Qodir Xudoning vahiyini ko‘rgan, Hushidan ayrilgan, lekin ko‘zlari katta ochiq odam aytyapti.

¹⁷Uni ko‘ryapman–u, lekin shu topda yo‘q, Unga qarayapman–u, lekin u yaqin emas. Bir yulduz chiqar Yoqub naslidan, Saltanat hassasi Isroil xalqidan. Vayron qilar u Mo‘ab chegaralarini [3], Yakson etar Shet xalqining [4] yerlarini [5].

¹⁸Edom o‘ljaga aylanar, Ha, Seir [6] g‘animlarning mulki bo‘lar, Isroil xalqi esa zafarni quchar.

¹⁹Yoqub naslidan hukmdor chiqar, Ir [7] xalqini tamom qirib tashlar.”

²⁰So‘ng Balom Omolek xalqini [8] ko‘rib, ular haqida shunday bashorat qildi: “Xalqlarning sardoridir Omoleklar, Lekin oxiri abadiy halokatga yo‘liqar ular.”

²¹Keyin u Xayin xalqini ko‘rib, ular haqida quyidagicha bashorat qildi: “Mustahkamdir sizning boshpanangiz, Tog‘ cho‘qqisida joylashgan sizning iningiz.

²²Oshur xalqi [9] sizni asir qilib olib ketajak, Shunda Xayin xalqi qirilib yo‘q bo‘lajak.”

²³Balom yana bashoratini davom ettirdi: “Evoh! Xudo shu ishlarni amalga oshirgach, kim tirik qolar?!

²⁴Kiprdan [10] suzib kelar kemalar, Oshur va Ibir xalqlarini taslim etishar. Abadiy halokatga uchraydi ular.”

²⁵Shundan keyin Balom yo‘lga chiqib, uyiga jo‘nadi. Boloq ham o‘z yo‘liga ketdi.