Read O‘zbek tilidagi Muqaddas Kitob, 2013 Sahroda 25 Bible Online

Sahroda 25 - O‘zbek tilidagi Muqaddas Kitob, 2013 bible

Sahroda 25

¹Isroil xalqi Shitimda [1] o‘rnashganda, Isroil erkaklari Mo‘ab ayollari bilan zino qila boshlashdi.

²Mo‘ab ayollari ularni o‘z xudolariga bag‘ishlangan qurbonlik ziyofatlariga taklif etishdi. Isroil xalqi ularning qurbonligidan tanovul qilib, xudolariga ham sajda etdi.

³Isroil xalqi Piyor tog‘idagi Baalga qattiq bog‘lanib qolgani uchun, Egamiz ulardan g‘azablandi.

⁴U Musoga shunday dedi: — Bu xalqning boshliqlarini ushla, ularni kuppa–kunduzi Men, Egangizning oldida qatl qil, jasadlarini esa tik o‘rnatilgan xodaning uchiga qoqtir. Shunda Men Isroil xalqidan qahr–g‘azabimni qaytaraman.

⁵Muso Isroil hakamlariga [2]: — Piyordagi Baalga sajda qilgan har bir odamingizni o‘ldiringlar, — deb buyruq berdi.

⁶Shu payt Isroil xalqidan bittasi Musoning va butun Isroil jamoasining ko‘zi oldida qarorgohga Midiyonlik [3] bir ayolni boshlab kelib qoldi. Jamoa Uchrashuv chodiriga kiraverishda yig‘lab turgan edi.

⁷Ruhoniy Horunning nabirasi — Elazar o‘g‘li Finxaz buni ko‘rdi–yu, o‘rnidan turib, jamoa orasidan chiqib ketdi. U nayzasini olib,

⁸Isroil xalqidan bo‘lgan o‘sha odamning orqasidan chodirga kirdi–da, nayzasi bilan ikkovini ham o‘ldirdi. Finxazning sanchgan nayzasi o‘sha odamning badanini teshib o‘tib, ayolning qorniga kirgan edi. Shundan keyingina Isroil xalqi orasidagi o‘lat to‘xtadi.

⁹Lekin o‘latdan 24.000 odam o‘lib bo‘lgan edi.

¹⁰Shunda Egamiz Musoga:

¹¹— Ruhoniy Horunning nabirasi — Elazar o‘g‘li Finxaz Mening qahr–g‘azabimni Isroil xalqidan qaytardi, — dedi. — Isroil xalqi orasida u Menga jon kuydirgani uchun, Men g‘azab ustida ularga qirg‘in keltirmadim.

¹²Sen unga ayt: Men Finxaz bilan alohida tinchlik ahdimni tuzaman.

¹³Bu ahdga muvofiq, Finxazning o‘zi va uning avlodi to abad ruhoniy bo‘lishadi, chunki u o‘z Xudosiga — Menga jon kuydirib, qilgan ishi bilan Isroil xalqidan Mening g‘azabimni qaytardi.

¹⁴Midiyonlik ayol bilan birga o‘ldirilgan Isroil odamining ismi Zimri bo‘lib, Shimo‘n qabilasining urug‘boshisi Soluning o‘g‘li edi.

¹⁵O‘ldirilgan ayolning ismi esa Xozbi edi, u Midiyonlikning urug‘boshisi Zurning qizi edi.

¹⁶Egamiz Musoga:

¹⁷— Midiyon xalqini dushman deb bilinglar, ularni qirib tashlanglar! — dedi.

¹⁸— Chunki ular sizlarga dushmanlik qilib, Piyordagi voqea orqali sizlarni yo‘ldan ozdirishdi. Bundan tashqari, Piyorda o‘lat hukmronlik qilgan kuni o‘lgan Midiyonlik yo‘lboshchining qizi Xozbi orqali sizlarni aldashdi.