Read O‘zbek tilidagi Muqaddas Kitob, 2013 Sahroda 28 Bible Online

Sahroda 28 - O‘zbek tilidagi Muqaddas Kitob, 2013 bible

Sahroda 28

¹Egamiz Musoga aytdi:

²“Isroil xalqiga shunday deb buyur: ular taom nazrlarini Menga har doim belgilangan vaqtda keltirishsin. Kuydiriladigan bu nazrlardan Menga yoqimli hid keladi.”

³Egamiz davom etib, Isroil xalqiga olovda kuydiriladigan nazrlar to‘g‘risida quyidagi qonunlarni yetkaz, deb Musoga amr berdi: “Har kuni ikkita nuqsonsiz bir yoshli qo‘chqor qo‘zini Egamizga kunda kuydiriladigan qurbonlik qilinglar.

⁴Bitta qo‘zini ertalab, ikkinchisini kechqurun qurbonlik qilinglar.

⁵Har bir qo‘ziga qo‘shib, ikki kosa [1] toza zaytun moyi aralashtirilgan to‘rt kosa [2] sifatli unni don nazri qilib keltiringlar.

⁶Egamizga yoqimli hid borishi uchun olovda kunda kuydiriladigan qurbonliklar ilk bor Sinayda joriy qilingan edi.

⁷Har bir qo‘ziga qo‘shib ikki kosa sharob nazrini ham keltiringlar. Sharobni Egamizga atab Muqaddas chodirda nazr qilib quyinglar.

⁸Ikkinchi qo‘zini kechqurun qurbonlik qilinglar. Ertalabki qurbonlik singari, bu qurbonlikka qo‘shib, belgilangan miqdorda don bilan sharob nazri qilinglar. Olovda kuydiriladigan bu qurbonliklardan Egamizga yoqimli hid boradi.

⁹Shabbat kuni esa ikkita bir yoshli nuqsonsiz qo‘chqor qo‘zini qurbonlik qilinglar. Bu qurbonliklar bilan birga belgilangan miqdorda sharob nazrini va zaytun moyi aralashtirilgan sakkiz kosa [3] sifatli unni don nazri qilib keltiringlar.

¹⁰Bu kuydiriladigan qurbonliklarni har Shabbatda kunda kuydiriladigan qurbonliklardan va unga qo‘shib qilinadigan sharob nazridan tashqari keltiringlar.

¹¹Har oyning boshida ikkita buqani, bitta qo‘chqorni va yettita bir yoshli qo‘chqor qo‘zini Egamizga atab kuydiriladigan qurbonlik qilinglar. Hamma jonivorlar nuqsonsiz bo‘lsin.

¹²Bu qurbonliklarga qo‘shib quyidagi miqdorda zaytun moyi aralashtirilgan sifatli unni don nazri qilib keltiringlar: har bir buqa bilan o‘n ikki kosa [4] un, qo‘chqor bilan sakkiz kosa un,

¹³har bir qo‘chqor qo‘zi bilan to‘rt kosa un. Olovda kuydiriladigan bu qurbonliklardan Egamizga yoqimli hid boradi.

¹⁴Har bir buqa bilan to‘rt kosa [5] sharob, har bir qo‘chqor bilan uch kosa [6] sharob, har bir qo‘chqor qo‘zi bilan esa ikki kosa [7] sharobni nazr qilinglar. Bu kuydiriladigan nazrlarni har oyning birinchi kunida ado etinglar.

¹⁵Bundan tashqari, bitta takani Egamizga gunoh qurbonligi qilinglar. Bu hamma qurbonligu nazrlarni kunda kuydiriladigan qurbonliklar [8] va ularga qo‘shib qilinadigan sharob nazridan tashqari keltiringlar.

¹⁶Birinchi oyning [9] o‘n to‘rtinchi kuni Egamizga bag‘ishlangan Fisih [10] qurbonligini nazr qilinglar.

¹⁷O‘n beshinchi kuni esa yetti kunlik bayram boshlanadi, sizlar yetti kun davomida xamirturushsiz non yeyishlaringiz lozim.

¹⁸Bayramning birinchi kuni butun xalq muqaddas yig‘inga kelsin. Har kungi ishlaringizni qilmanglar.

¹⁹Egamizga atab ikkita buqani, bitta qo‘chqorni va yettita bir yoshli qo‘chqor qo‘zini olovda kuydiriladigan qurbonlik qilinglar. Hamma jonivorlar nuqsonsiz bo‘lsin.

²⁰Bu qurbonliklarga qo‘shib quyidagi miqdorda zaytun moyi aralashtirilgan sifatli unni don nazri qilib keltiringlar: har bir buqa bilan o‘n ikki kosa un, qo‘chqor bilan sakkiz kosa un,

²¹har bir qo‘chqor qo‘zi bilan to‘rt kosa un.

²²O‘zlaringizni gunohdan poklash uchun takani gunoh qurbonligi qilinglar.

²³[23-24] Bu nazrlarni kunda ertalab kuydiriladigan qurbonlikdan [11] tashqari, yetti kun davomida keltiringlar. Bu taom nazrlarni Egamizga yoqimli hid bo‘lishi uchun olovda kuydiringlar. Bular kunda kuydiriladigan qurbonliklar va ularga qo‘shib qilinadigan sharob nazridan tashqari keltirilsin.

²⁵Yettinchi kuni ham butun xalq muqaddas yig‘inga kelsin. O‘sha kuni odatdagi ishlaringizni qilmanglar.

²⁶Hosil bayramining [12] birinchi kuni, Egamizga yangi hosilingizning donini nazr qilganingizda, butun xalq muqaddas yig‘inga kelsin. O‘sha kuni odatdagi ishlaringizni qilmanglar.

²⁷Egamizga yoqimli hid borishi uchun ikkita buqa, bitta qo‘chqor, yettita bir yoshli qo‘chqor qo‘zini kuydiriladigan qurbonlik qilinglar.

²⁸Bu qurbonliklarga qo‘shib quyidagi miqdorda zaytun moyi aralashtirilgan sifatli unni don nazri qilib keltiringlar: har bir buqa bilan o‘n ikki kosa un, qo‘chqor bilan sakkiz kosa un,

²⁹har bir qo‘chqor qo‘zi bilan to‘rt kosa un.

³⁰O‘zlaringizni gunohdan poklash uchun bitta takani qurbonlik qilinglar.

³¹Bu nazrlarni va ularga qo‘shib qilinadigan sharob nazrini — kunda kuydiriladigan qurbonliklar [13] va ularga qo‘shib qilinadigan don nazridan tashqari keltiringlar. Qurbonlik qilinadigan hamma jonivorlaringiz nuqsonsiz bo‘lsin.