Read O‘zbek tilidagi Muqaddas Kitob, 2013 Sahroda 3 Bible Online

Sahroda 3 - O‘zbek tilidagi Muqaddas Kitob, 2013 bible

Sahroda 3

¹Egamiz Sinay tog‘ida Muso bilan so‘zlashganda, Muso va Horunning nasli quyidagilardan iborat edi:

²Horunning to‘rtta o‘g‘li bor edi: Nadov, Abihu, Elazar va Itamar. Nadov to‘ng‘ich o‘g‘il edi.

³Muso Horunning bu o‘g‘illariga moy surtib, ularni ruhoniylikka tayinlagan edi.

⁴Lekin Nadov bilan Abihu Sinay sahrosida Egamiz amr etmagan olovni Uning huzuriga olib kelganlari uchun o‘sha yerda nobud bo‘lgan edilar. Ikkovi ham befarzand edi. Shuning uchun faqat Elazar bilan Itamar otalari Horunning hayotligida ruhoniy bo‘lib xizmat qilgan edilar.

⁵Musoga Egamiz shunday amr berdi:

⁶“Levi qabilasini ruhoniy Horun huzuriga boshlab kel. Ular Horunga yordam berishsin.

⁷Levilar Horun va butun Isroil jamoasiga xizmat qilib [1], Muqaddas chodirga oid bo‘lgan barcha yumushlarni bajarishsin.

⁸Ular Isroil xalqi uchun Muqaddas chodirda xizmat qilib, chodirdagi hamma ashyolar uchun mas’ul bo‘lishsin.

⁹Levilarni Horun va uning o‘g‘illari ixtiyoriga ber. Isroil xalqining bu qabilasi to‘liq ularning ixtiyorida bo‘lishi shart.

¹⁰Horun va uning o‘g‘illarini ruhoniylik xizmatiga tayinla. Ruhoniylik vazifasini bajargan har qanday boshqa odamning jazosi o‘limdir.”

¹¹Musoga Egamiz yana dedi:

¹²“Men levilarni Isroil xalqining onadan tug‘ilgan barcha to‘ng‘ich o‘g‘illari o‘rnida qabul qilganman. Levilar Menikidir.

¹³Zotan, hamma to‘ng‘ich o‘g‘illar Menga tegishli. Men Misrliklarning hamma to‘ng‘ich o‘g‘illarini nobud qilgan kunim Isroil xalqining barcha to‘ng‘ich o‘g‘illarini — odamidan tortib hayvoniga qadar — O‘zim uchun ajratib olganman [2]. Ularning hammasi Meniki bo‘lishi shart. Zotan, Men Egangizman.”

¹⁴Musoga Egamiz Sinay sahrosida yana aytdi:

¹⁵“Levi qabilasini urug‘i va xonadonlari bo‘yicha sanab chiq. Bir oylik va undan yuqori yoshdagi hamma erkak zotini sanab chiq.”

¹⁶Egamizning amri bo‘yicha Muso ularni sanab chiqdi.

¹⁷Levining uchta o‘g‘li bo‘lib, ismlari Gershon, Qohot va Marori edi.

¹⁸Gershonning Lubnax va Shimax degan o‘g‘illari bo‘lib, har qaysisidan bittadan urug‘ kelib chiqdi.

¹⁹Qohotning Imrom, Izxor, Xevron va Uziyol degan o‘g‘illari bo‘lib, ulardan ham bittadan urug‘ kelib chiqdi.

²⁰Marorining Maxli va Mushi degan o‘g‘illari bo‘lib, ulardan ham bittadan urug‘ kelib chiqdi. Levi urug‘larining ota xonadoni bo‘yicha ro‘yxatga olinganlari ana shular edi.

²¹Gershondan Lubnax va Shimax urug‘lari kelib chiqdi.

²²Gershon urug‘iga qarashli bir oylik va undan yuqori yoshdagi erkaklar sanalganda, 7500 ta chiqdi.

²³Gershon urug‘i chodirlarini Muqaddas chodirning orqa tomonida, g‘arbda o‘rnashtirishlari kerak edi.

²⁴Gershon urug‘ining oqsoqoli Loyol o‘g‘li Eliasaf edi.

²⁵Gershon urug‘i chodirning quyidagi ashyolari uchun mas’ul edi: chodirning ichki qavati va qoplamalari, chodirga kiraverishdagi parda,

²⁶chodir bilan qurbongoh atrofini to‘sib turadigan pardalar, hovliga kiraverishdagi parda va uning arqonlari. Chodirning bu ashyolar bilan bog‘liq bo‘lgan barcha xizmat Gershon urug‘i zimmasida edi.

²⁷Qohotdan Imrom, Izxor, Xevron va Uziyol urug‘lari kelib chiqdi.

²⁸Ularga qarashli bir oylik va undan yuqori yoshdagi erkaklar sanalganda, 8600 [3] ta chiqdi. Qohot urug‘i Muqaddas chodir [4] uchun mas’ul edi.

²⁹Qohot urug‘i Muqaddas chodirning janub tomonida chodir qurishi kerak edi.

³⁰Qohot urug‘i oqsoqoli Uziyol o‘g‘li Elizofon edi.

³¹Ular chodirdagi quyidagi ashyolar uchun mas’ul edilar: sandiq, xontaxta, chiroqpoya, qurbongohlar, xizmat paytida ishlatiladigan Muqaddas chodir buyumlari va ichki pardasi. Chodirdagi bu ashyolar bilan bog‘liq bo‘lgan barcha xizmat Qohot urug‘i zimmasida edi.

³²Levi oqsoqollari ustidan ruhoniy Horun o‘g‘li Elazar boshchilik qilardi. Muqaddas chodir uchun mas’ul bo‘lganlar Elazarning nazorati ostida edilar.

³³Maroridan Maxli va Mushi urug‘lari kelib chiqdi.

³⁴Marori urug‘ining bir oylik va undan yuqori yoshdagi erkaklari sanalganda, 6200 ta chiqdi.

³⁵Marori urug‘i oqsoqoli Abuhayil o‘g‘li Zuriyol edi. Ular Muqaddas chodirning shimol tomoniga chodirlarini o‘rnatishlari kerak edi.

³⁶[36-37] Ular chodirdagi quyidagi ashyolar uchun mas’ul edilar: chodirning romlari, tambalari, ustunlar va ustun tagliklari, ularga oid barcha buyumlar, hovlining atrofidagi ustunlar va ustun tagliklari, qoziq va arqonlari, ularga tegishli hamma buyumlar. Chodirdagi bu ashyolar bilan bog‘liq bo‘lgan barcha xizmat Marori urug‘i zimmasida edi.

³⁷

³⁸Muso, Horun va uning o‘g‘illari o‘z chodirlarini sharq tomonda — Muqaddas chodirning oldida [5] o‘rnatishlari kerak edi. Ular Isroil xalqining vakillari sifatida Muqaddas chodirdagi xizmat uchun mas’ul edilar. Ulardan boshqa birontasi chodirga yaqin kelsa, o‘sha odamning jazosi o‘lim edi.

³⁹Muso va Horun, Egamizning amriga ko‘ra, Levi qabilasining bir oylik va undan yuqori yoshdagi hamma erkaklarini urug‘lari bo‘yicha sanab chiqqanda, ularning umumiy soni 22.000 ta chiqdi.

⁴⁰Egamiz shundan keyin Musoga yana aytdi: “Isroil xalqining bir oylik va undan yuqori yoshdagi hamma to‘ng‘ich o‘g‘illarini sanab chiq. Ularning ismlarini ro‘yxat qilib yoz.

⁴¹Men Egangizman. Men Levi qabilasini Isroil xalqining hamma to‘ng‘ich o‘g‘illari o‘rniga qabul qilaman. Isroil xalqining chorvasida birinchi tug‘ilgan bolasi o‘rniga levilarning chorvasini ham olaman.”

⁴²Muso Egamizning amrini bajardi. Isroil xalqining hamma to‘ng‘ich o‘g‘illarini sanab chiqdi.

⁴³Bir oylik va undan yuqori yoshdagi hamma to‘ng‘ich o‘g‘il bittama–bitta sanalganda, 22.273 ta chiqdi.

⁴⁴Musoga Egamiz aytdi:

⁴⁵“Isroil xalqining hamma to‘ng‘ich o‘g‘illari o‘rniga levilarni Menga bag‘ishla, Isroil xalqining chorvasi o‘rniga esa levilarning chorvasini Menga bag‘ishla. Levilar Meniki bo‘ladi. Men Egangizman.

⁴⁶Isroilning to‘ng‘ich o‘g‘illari levilardan 273 ta ortiq. Isroil xalqi ana shu ortiqchasi evaziga tovon to‘lashi kerak.

⁴⁷Har bir ortiq odam evaziga besh bo‘lakdan kumush ol. Har bir kumush bo‘lakning og‘irligi 2,5 misqol bo‘lsin [6].

⁴⁸O‘sha kumushni Horun va uning o‘g‘illariga ber.”

⁴⁹[49-50] Muso ortiq chiqqan Isroil to‘ng‘ich o‘g‘illaridan 1365 ta kumush bo‘lakni yig‘ib oldi [7].

⁵⁰

⁵¹Muso Egamizning amriga ko‘ra, yig‘ib olgan tovon pulini Horun va uning o‘g‘illariga berdi.