Read O‘zbek tilidagi Muqaddas Kitob, 2013 Sahroda 31 Bible Online

Sahroda 31 - O‘zbek tilidagi Muqaddas Kitob, 2013 bible

Sahroda 31

²— Isroil xalqi uchun Midiyonlardan qasos ol [1]. Shundan keyin sen olamdan ko‘z yumasan.

³Shundan keyin Muso xalqqa aytdi: — Odamlaringizning bir qismini qurollantiringlar. Ular Midiyon xalqi bilan jang qilib, ulardan Egamizning qasosini olishsin.

⁴Har bir Isroil qabilasidan mingtadan odamni urushga jo‘natinglar.

⁵Har bir Isroil qabilasidan mingtadan odam tanlab olindi, jami o‘n ikki ming odam qurollanib jangga shay bo‘ldi.

⁶Muso ularni va ular bilan birga Elazar o‘g‘li ruhoniy Finxazni urushga jo‘natdi. Finxaz o‘zi bilan muqaddas ashyolarni [2] va karnaylarni olib ketdi. Bu karnaylar xatardan darak berish uchun chalinardi.

⁷Egamiz Musoga amr qilganday, Isroil sipohlari Midiyonlar bilan jang qilishdi. Ular Midiyon xalqining butun erkak zotini qirib tashlashdi.

⁸Midiyon xalqining beshala shohini — Evi, Raxem, Zur, Xur, Rabani ham boshqalar qatori o‘ldirib yuborishdi. Bavo‘r o‘g‘li Balomni ham qilichdan o‘tkazishdi [3].

⁹Midiyon xalqining ayollariyu bolalarini asir qilib, jamiki podalarini, suruvlarini va mol–mulkini o‘lja qilib olishdi.

¹⁰Midiyon xalqi istiqomat qilgan hamma shaharu qarorgohlarga o‘t qo‘yishdi.

¹¹Olgan hamma o‘ljalarini — odamidan tortib moligacha

¹²qarorgohga — Muso, ruhoniy Elazar va Isroil jamoasi huzuriga olib kelishdi. Qarorgoh Mo‘ab tekisligida, Yerixo shahri ro‘parasidagi Iordan daryosi bo‘yida joylashgan edi.

¹³Muso, ruhoniy Elazar va jamoaning hamma yo‘lboshchilari ularni kutib olish uchun qarorgohdan tashqariga chiqishdi.

¹⁴Muso urushdan qaytib kelgan mingboshi va yuzboshilardan qattiq g‘azablandi.

¹⁵— Nimaga hamma ayollarni tirik qoldirdingiz? — deb so‘radi ulardan Muso.

¹⁶— Balomning maslahati bilan Piyor tog‘ida [4] Isroil xalqini Egamizga xiyonat qilishga undagan shular–ku! O‘shalarning dastidan Egamizning jamoasi orasida o‘lat paydo bo‘lgan edi!

¹⁷Qani, bo‘linglar, hamma o‘g‘il bolalarni va er ko‘rgan ayollarni o‘ldiringlar.

¹⁸Faqat er ko‘rmagan qizlarni o‘zingiz uchun tirik qoldiringlar.

¹⁹So‘ng yetti kun davomida qarorgohdan tashqarida bo‘linglar. Qaysi biringiz odam o‘ldirgan yoki jasadga qo‘l tekkizgan bo‘lsangiz, uchinchi va yettinchi kunlari poklaninglar. Sizlar bilan birga asirlar ham poklanishsin.

²⁰Hamma kiyimlarni, barcha charm va yog‘och buyumlarni, echki junidan to‘qilgan hamma narsalarni poklanglar.

²¹Ruhoniy Elazar urushga borgan sipohlarga aytdi: — Musoga Egamiz amr etgan qonun shundan iborat:

²²oltin, kumush, bronza, temir, qalay va qo‘rg‘oshin

²³— olovda yonmaydigan hamma narsalarni olovdan o‘tkazib poklanglar. Bundan tashqari, poklanish suvi [5] bilan ham poklanglar. Olovda yonadigan buyumlarni esa suvning o‘zi bilan poklanglar.

²⁴Yettinchi kuni kiyimlaringizni yuvinglar. Shunda pok bo‘lasizlar. Keyin qarorgohga kirsangiz bo‘ladi.

²⁵Egamiz yana Musoga aytdi:

²⁶— Sen, ruhoniy Elazar va jamoaning urug‘boshilari asir olingan odamlarni, o‘lja olingan hayvonlarni hisoblab chiqinglar.

²⁷Asiru o‘ljalarni teng ikki qismga bo‘lib, bir qismini urushga borgan sipohlarga, ikkinchi qismini butun jamoaga beringlar.

²⁸Urushga borgan sipohlar ulushidan Men, Egangiz, uchun ulush ajratinglar. Asirlar, mol, eshak, qo‘y va echkilarning har besh yuztasidan bittasini Menga ulush qilib beringlar.

²⁹Sipohlardan olingan bu ulushni Menga nazr qilib, ruhoniy Elazarga beringlar.

³⁰Xalqqa tegishli bo‘lgan o‘ljaning ikkinchi qismidan Muqaddas chodir uchun mas’ul bo‘lgan levilarga ulush beringlar. Asirlar, mol, eshak, qo‘y va echkilarning har elliktasidan bittasi levilarga berilsin.

³¹Muso bilan ruhoniy Elazar Egamizning Musoga bergan amrini ado etishdi.

³²Sipohlar qo‘lga kiritgan narsalardan tashqari o‘lja qilib olgan mol–hol va ayollarning umumiy soni quyidagicha edi: qo‘y–echkilar — 675.000 ta,

³³mollar — 72.000 ta,

³⁴eshaklar — 61.000 ta,

³⁵er ko‘rmagan qizlar — 32.000 ta.

³⁶O‘ljaning urushga borgan sipohlarga tegishli qismi quyidagicha edi: qo‘y–echkilar — 337.500 ta,

³⁷shulardan 675 ta qo‘y–echki Egamizning ulushidir,

³⁸mollar — 36.000 ta, shulardan 72 tasi Egamizning ulushidir,

³⁹eshaklar — 30.500 ta, shulardan 61 tasi Egamizning ulushidir,

⁴⁰er ko‘rmagan qizlar — 16.000 ta, shulardan 32 tasi Egamizning ulushidir.

⁴¹Egamiz Musoga amr qilganday, Muso Egamizga ajratilgan ulushni nazr sifatida ruhoniy Elazarga berdi.

⁴²Muso Isroil xalqi uchun sipohlarning o‘ljasidan ajratib olgan qism quyidagilardan iborat edi:

⁴³qo‘y–echkilar — 337.500 ta,

⁴⁴mollar — 36.000 ta,

⁴⁵eshaklar — 30.500 ta,

⁴⁶er ko‘rmagan qizlar — 16.000 ta.

⁴⁷Isroil xalqi ulush qilib olgan odamu hayvonlarning har elliktasidan bittasini Muso Egamizning Muqaddas chodiri uchun mas’ul bo‘lgan levilarga berdi. Egamiz Musoga qanday amr qilgan bo‘lsa, Muso shuni qildi.

⁴⁸Shundan so‘ng mingboshi va yuzboshilar Musoning huzuriga kelishdi.

⁴⁹Ular Musoga: — Biz, qullaringiz, qo‘limiz ostidagi sipohlarni sanab chiqdik, — deyishdi, — bironta odamimizni yo‘qotmabmiz.

⁵⁰O‘zimizni Egamiz hukmidan himoya qilish uchun [6], biz topgan oltin buyumlarimizni — bilaguzuklar, muhr uzuklar, sirg‘alar va zebigardonlarimizni Egamizga nazr qilib olib keldik.

⁵¹Muso bilan ruhoniy Elazar ular olib kelgan hamma oltin zeb–ziynatlarni olishdi.

⁵²Mingboshi va yuzboshilar Egamizga nazr qilgan oltinning umumiy og‘irligi o‘n ikki pudga yaqin [7] chiqdi.

⁵³Oddiy sipohlar esa qo‘lga kiritgan o‘ljalarni o‘zlariga qoldirgan edilar.

⁵⁴Isroil xalqini Egamiz doim esida tutishi uchun, Muso bilan ruhoniy Elazar mingboshi va yuzboshilardan olgan oltin buyumlarni Uchrashuv chodiriga olib kelishdi.