Read O‘zbek tilidagi Muqaddas Kitob, 2013 Sahroda 33 Bible Online

Sahroda 33 - O‘zbek tilidagi Muqaddas Kitob, 2013 bible

Sahroda 33

¹[1-2] Muso Egamizning amriga ko‘ra, safar davomida qarorgoh qurilgan joylarning nomlarini birma–bir ro‘yxat qilib yozgan edi. Muso va Horun boshchiligida Misrdan qabila–qabila bo‘lib chiqqan Isroil xalqining to‘xtagan joylari quyidagilardir:

³Birinchi oyning [1] o‘n beshinchi kunida, Fisih ziyofatining ertasiga Isroil xalqi Ramzes shahrini tark etdi. Ular jamiki Misr xalqining ko‘zi oldida shaxdam qadam bilan Misrdan chiqib ketishdi.

⁴Shu vaqtda Misrliklar Egamiz nobud qilgan hamma to‘ng‘ich o‘g‘illarini dafn qilayotgan edilar. Egamiz shu yo‘sinda Misr xudolarini mahkum etgan edi.

⁵Shunday qilib, Isroil xalqi Ramzesni tark etib, Suxo‘tda qarorgoh qurdi.

⁶So‘ng Suxo‘tdan ketib, sahroning chetidagi Etxamda qarorgoh qurdi.

⁷Ular Etxamdan chiqib, orqaga Baal–Zafo‘nning sharqidagi Piy–Xaxiro‘tga yo‘l olib, Migdol yonida qarorgoh qurishdi.

⁸Piy–Xaxiro‘tdan ham chiqib, Qizil dengizdan [2] o‘tishdi–da, sahro tomon yo‘l olishdi. Etxam sahrosini uch kun kezganlaridan keyin, Maroda qarorgoh qurishdi.

⁹Keyin Marodan ketib, Ilimda qarorgoh qurishdi. Ilimda o‘n ikkita buloq va yetmishta xurmo daraxti bor edi.

¹⁰Ular Ilimdan keyin, Qizil dengiz [3] bo‘yida qarorgoh qurishdi.

¹¹Keyin Qizil dengiz bo‘yidan ketib, Sin sahrosida [4] qarorgoh qurishdi.

¹²Sin sahrosidan ketib, Dofkaxda qarorgoh qurishdi.

¹³Dofkaxdan ketib, Elishda qarorgoh qurishdi.

¹⁴Elishdan ketib, Rafidimda qarorgoh qurishdi. Lekin u yerda ichimlik suvi yo‘q edi [5].

¹⁵Rafidimdan ketib, Sinay sahrosida qarorgoh qurishdi.

¹⁶Sinay sahrosidan ketib, Xivrut–Xattavoda qarorgoh qurishdi.

¹⁷Xivrut–Xattavodan ketib, Xazero‘tda qarorgoh qurishdi.

¹⁸Xazero‘tdan ketib, Ritmada qarorgoh qurishdi.

¹⁹Ritmadan ketib, Rimmon–Parazda qarorgoh qurishdi.

²⁰Rimmon–Parazdan ketib, Libnada qarorgoh qurishdi.

²¹Libnadan ketib, Rissada qarorgoh qurishdi.

²²Rissadan ketib, Kaxeletaxda qarorgoh qurishdi.

²³Kaxeletaxdan ketib, Shafer tog‘ida qarorgoh qurishdi.

²⁴Shafer tog‘idan ketib, Xaradaxda qarorgoh qurishdi.

²⁵Xaradaxdan ketib, Makxilo‘tda qarorgoh qurishdi.

²⁶Makxilo‘tdan ketib, Taxatda qarorgoh qurishdi.

²⁷Taxatdan ketib, Terahda qarorgoh qurishdi.

²⁸Terahdan ketib, Mitkada qarorgoh qurishdi.

²⁹Mitkadan ketib, Xashmonaxda qarorgoh qurishdi.

³⁰Xashmonaxdan ketib, Mosaro‘tda qarorgoh qurishdi.

³¹Mosaro‘tdan ketib, Baniyaqonda qarorgoh qurishdi.

³²Baniyaqondan ketib, Xor–Xagigadda qarorgoh qurishdi.

³³Xor–Xagigaddan ketib, Yotbotoda qarorgoh qurishdi.

³⁴Yotbotodan ketib, Avro‘nda qarorgoh qurishdi.

³⁵Avro‘ndan ketib, Ezyo‘n–Geberda qarorgoh qurishdi.

³⁶Ezyo‘n–Geberdan ketib, Zin sahrosidagi Kadeshda qarorgoh qurishdi.

³⁷Kadeshdan ketib, Edom yurtining chegarasidagi Xo‘r tog‘ida qarorgoh qurishdi.

³⁸Ruhoniy Horun Egamizning amri bilan Xo‘r tog‘iga chiqib, o‘sha yerda vafot etdi. Bu voqea Isroil xalqi Misrdan chiqqaniga qirq yil bo‘lganda, beshinchi oyning [6] birinchi kunida sodir bo‘ldi.

³⁹Horun Xo‘r tog‘ida vafot etganda 123 yoshda edi.

⁴⁰Kan’onlik Arod shohi shu paytda: “Isroil xalqi kelyapti”, degan xabarni eshitdi. U Kan’ondagi Nagav cho‘lida [7] yashardi.

⁴¹Isroil xalqi Xo‘r tog‘idan ketib, Zalmo‘noda qarorgoh qurdi.

⁴²Ular Zalmo‘nodan ketib, Punonda qarorgoh qurishdi.

⁴³Punondan ketib, Obo‘tda qarorgoh qurishdi.

⁴⁴Obo‘tdan ketib, Mo‘ab hududidagi Ivay–Aborimda qarorgoh qurishdi.

⁴⁵Ivay–Aborimdan [8] ketib, Dibon–Gadda qarorgoh qurishdi.

⁴⁶Dibon–Gaddan ketib, Elmon–Diblatayimda qarorgoh qurishdi.

⁴⁷Elmon–Diblatayimdan ketib, Navo tog‘ining yonidagi Aborim tog‘larida [9] qarorgoh qurishdi.

⁴⁸Aborim tog‘laridan ketib, Mo‘ab tekisligida, Yerixo shahrining ro‘parasidagi Iordan daryosi bo‘yida qarorgoh qurishdi.

⁴⁹Ular Mo‘ab tekisligida Iordan bo‘ylab, Bayt–Yashimo‘tdan tortib Ovil–Shitimgacha qarorgoh qurishdi.

⁵⁰Mo‘ab tekisligida, Yerixo shahrining ro‘parasidagi Iordan daryosi bo‘yida Egamiz Musoga shunday dedi:

⁵¹— Isroil xalqiga ayt: “Sizlar Iordan daryosining narigi tomoniga o‘tib, Kan’on yurtiga borganlaringizdan keyin

⁵²u yerning aholisini haydab chiqaringlar. Ularning hamma tosh va quyma butlarini yo‘q qilinglar, jamiki sajdagohlarini buzib tashlanglar.

⁵³O‘sha yurtga egalik qilinglar, u yerda o‘rnashib olinglar, chunki Men o‘sha yurtni sizlarga berganman.

⁵⁴Yerlarni urug‘laringiz orasida qur’a bo‘yicha [10] bo‘lib beringlar. Katta urug‘ga kattaroq ulush, kichik urug‘ga kichikroq ulush beringlar. Qur’a bo‘yicha kimga qayer chiqsa, o‘sha yer o‘sha urug‘ning ulushi bo‘lib qoladi. Shu yo‘sinda yerlarni qabilalar orasida bo‘lib beringlar.

⁵⁵Agar sizlar o‘sha yurtning aholisini haydab chiqarmasangiz, ularning qolgan–qutganlari sizlar uchun ko‘zga kirgan zirapchaday, biqinga sanchilgan tikanday bo‘ladi. Ular sizlarni yashab turgan yurtingizda siqadi.

⁵⁶Shunda Men ularning boshiga nima solmoqchi bo‘lgan bo‘lsam, sizning boshingizga solaman.”