Read O‘zbek tilidagi Muqaddas Kitob, 2013 Sahroda 35 Bible Online

Sahroda 35 - O‘zbek tilidagi Muqaddas Kitob, 2013 bible

Sahroda 35

¹Mo‘ab tekisligida, Yerixo shahrining ro‘parasidagi Iordan daryosi bo‘yida Egamiz Musoga dedi:

²“Isroil xalqiga buyur, ular mulk qilib oladigan yeridan levilarga yashash uchun shaharlar berishsin. Shuningdek, shaharlarning atrofidagi yaylovlarni ham berishsin.

³Shaharlar levilarga vatan bo‘ladi, yaylovlar esa mol–holi uchun yaraydi.

⁴Levilarga beriladigan yaylovlar shahar devoridan 1000 tirsak [1] masofada bo‘lgan tevarakdagi hamma yaylovlarni o‘z ichiga olsin.

⁵Shahar tashqarisidan sharq, janub, g‘arb, shimol tomonga 2000 tirsak [2] o‘lchanglar, shahar o‘rtada bo‘lsin. Shahar atrofi esa ularning yaylovlari bo‘ladi.

⁶Sizlar levilarga beradigan shaharlaringizning oltitasi panoh shaharlar bo‘lsin. Birortangiz bilmasdan odam o‘ldirib qo‘ysangiz, o‘sha shaharlarning biriga qochib borishingiz mumkin. Bu oltita shahardan tashqari levilarga yana qirq ikkita shahar beringlar.

⁷Hammasi bo‘lib levilarga qirq sakkizta shahar va ular atrofidagi yaylovlar berilsin.

⁸Isroil xalqi mulkidan har bir qabila olgan ulushining hajmiga ko‘ra, levilarga shaharlar ajratib beringlar. Kattaroq ulush olgan qabila ko‘proq, kichikroq ulush olgan qabila esa kamroq shahar bersin.”

⁹[9-10] Isroil xalqiga quyidagi amr va qonunlarni yetkaz, deb Musoga Egamiz shunday amr berdi: “Sizlar Iordan daryosining narigi tomoniga o‘tib, Kan’on yurtiga kirganlaringizdan keyin,

¹¹o‘zlaringiz uchun panoh shaharlarni tanlanglar. Birortasi bilmasdan odam o‘ldirib qo‘ysa, o‘sha shaharlarning biriga qochib bora oladigan bo‘lsin.

¹²Qotil jamoa oldida hukm qilinishdan oldin o‘ldirilib qo‘yilmasligi uchun, bu shaharlar qotilga qasoskordan panoh bo‘ladi.

¹³Oltita panoh shahringiz bo‘lsin.

¹⁴Uchta shaharni Iordan daryosining sharq tomonidan, qolgan uchtasini Kan’on yurtidan tanlanglar.

¹⁵Ana shu oltita shahar sizlar uchun ham, orangizda vaqtincha yoki doimiy ravishda istiqomat qilayotgan musofirlar uchun ham panoh bo‘ladi. Birortasini tasodifan o‘ldirib qo‘ygan odam o‘sha yoqqa qochib borsin.

¹⁶Agar birorta odam boshqasini temir asbob bilan urib o‘ldirib qo‘ysa, urgan odam qotil hisoblanadi va o‘sha odamning jazosi o‘limdir.

¹⁷Odamni tosh bilan urib o‘ldirgan kishi ham qotildir. Qotilning jazosi o‘limdir.

¹⁸Odamni yog‘och qurol bilan urib o‘ldirgan kishi ham qotildir. Qotilning jazosi o‘limdir.

¹⁹Marhumning xunini oladigan odam qotilni o‘ldirsin. Qotilni uchratib qolganda uning jonini olsin.

²⁰Shuningdek, agar birortasi boshqasini yomon ko‘rgani uchun itarib yoki qasddan unga biror narsani otib o‘ldirib qo‘ysa,

²¹yoxud adovatdan unga musht tushirib o‘ldirsa, urgan odamning jazosi o‘limdir. U qotildir. Marhumning xunini oladigan odam qotilni uchratganda o‘ldirsin.

²²Bordi–yu, biri boshqasini bexosdan, xusumat qilmay, turtib yuborsa yoki qasd qilmay biror narsa otsa

²³[23-24] yo ko‘rmay turib ustiga tosh tushirib yuborsa va o‘sha odam o‘lsa, jamoa qasoskor bilan odam o‘ldirgan kishining orasidagi mojaroni hal qilsin. Chunki odam o‘ldirganning va marhumning orasida hech qanday adovat bo‘lmagan edi.

²⁵Jamoa qotilni qasoskorning qo‘lidan xalos qilib, uni qaytarib panoh shaharga jo‘natsin. Moy surtib tanlangan oliy ruhoniy vafot etguncha, qotil o‘sha yerda qolsin.

²⁶Lekin qotil panoh shahar chegarasidan chiqsa

²⁷va qasoskor uni panoh shahardan tashqarida tutib olib o‘ldirsa, qasoskor qotillikda ayblanmaydi.

²⁸Chunki oliy ruhoniy vafot etguncha, qotil panoh shaharda qolishi lozim edi. Oliy ruhoniyning vafotidan so‘nggina u o‘z uyiga qaytib borishi mumkin edi.

²⁹Mana shular sizlar uchun avlodlaringiz osha, qayerda yashasangiz ham, qonun bo‘lib qolsin.

³⁰Odam o‘ldirgan kishi faqat guvohlarning ko‘rsatmalari asosidagina qotillikda ayblanib, o‘limga mahkum qilinsin. Bitta odamning guvohligi asosida hech kim o‘ldirilmasin.

³¹O‘limga hukm qilingan qotilning joni evaziga pul olmanglar. Qotilni albatta o‘ldiringlar.

³²Panoh shaharga qochib ketgan odamdan ham pul olmanglar, u oliy ruhoniyning vafotidan oldin o‘z yeriga qaytib kelib yashashi uchun yo‘l qo‘ymanglar.

³³O‘zingiz yashab yurgan yerni bulg‘amanglar. Yer to‘kilgan qon tufayli bulg‘anadi. Qotillik tufayli bulg‘angan yerni faqat qotilning qoni bilan tozalab bo‘ladi.

³⁴O‘zlaringiz yashaydigan va Men istiqomat qiladigan yerni bulg‘amanglar, zotan Men, Egangiz, Isroil xalqi orasida istiqomat qilaman.”