Read O‘zbek tilidagi Muqaddas Kitob, 2013 Sahroda 6 Bible Online

Sahroda 6 - O‘zbek tilidagi Muqaddas Kitob, 2013 bible

Sahroda 6

¹[1-2] Muso orqali Isroil xalqiga Egamiz quyidagi qonunlarni berdi: agar erkak yoki ayol ont ichib, o‘zini Egamizga nazr qilib [1] bag‘ishlashga qaror qilgan bo‘lsa,

³u sharob va o‘tkir ichimliklardan o‘zini tiysin. Uzum sirkasini ham, boshqa o‘tkir ichimliklarni ham iste’mol qilmasin. Uzumdan tayyorlangan biror ichimlikni zinhor ichmasin. Mayizni va uzumni hech og‘ziga olmasin.

⁴U o‘zini nazr qilgan davr mobaynida uzumdan tayyorlangan biror narsani iste’mol qilmasin, hatto uzumning doni va po‘stlog‘ini ham og‘ziga olmasin.

⁵Ont ichib, belgilagan davr mobaynida sochiga ham, soqoliga ham ustara tegmasin. U Egamizga bag‘ishlanganligi uchun, nazr qilingan kunlari tugagunga qadar sochlarini o‘stirib yursin.

⁶[6-7] Soch o‘sha odamning Egamizga bag‘ishlanganligi belgisidir. Shuning uchun o‘sha odam Egamizga nazr qilingan kunlari davomida murdaga yaqinlashmasin. Otasi, onasi, aka–ukasi yoki opa–singillaridan birortasi vafot etib qolganda ham, u murda yoniga borib o‘zini bulg‘amasin.

⁸Nazr qilingan kunlari davomida u Egamizga bag‘ishlangandir.

⁹Bordi–yu, uning oldida kimdir to‘satdan vafot etib qolsa, nazr qilingan odamning boshi harom bo‘lgan hisoblanadi. Shuning uchun nazr qilingan odam yetti kundan keyin sochini oldirsin. Shunda u yana pok bo‘ladi.

¹⁰Sakkizinchi kuni esa Uchrashuv chodiri kiraverishiga ikkita kaptar yoki ikkita musichani olib kelib ruhoniyga bersin.

¹¹Ruhoniy bu qushlardan bittasini gunoh qurbonligi qiladi, ikkinchisini esa kuydiriladigan qurbonlik qiladi. Shunday qilib, murda tufayli harom bo‘lgan o‘sha odamni gunohidan poklaydi. Nazr qilingan odam o‘sha kuniyoq o‘zini qaytadan Egamizga bag‘ishlashi kerak.

¹²U bulg‘anganligi uchun oldingi kunlar hisobga kirmaydi. U Egamizga bag‘ishlangan nazr kunlarini boshqatdan boshlashi lozim. Buning uchun u bir yoshli qo‘chqor qo‘zini ayb qurbonligi qilsin.

¹³Nazr qilinganlar uchun qonun quyidagichadir: nazr qilingan odam Egamizga bag‘ishlagan kunlari tugaganda, Uchrashuv chodiri kiraverishiga kelsin.

¹⁴U Egamizga atab quyidagi qurbonligu nazrlarni keltirsin: kuydiriladigan qurbonlik uchun bir yoshli nuqsonsiz qo‘chqor qo‘zini, gunoh qurbonligi uchun bir yoshli nuqsonsiz sovliq qo‘zini, tinchlik qurbonligi uchun nuqsonsiz qo‘chqorni,

¹⁵ularga qo‘shib qilinadigan don bilan sharob nazrini, bir savat xamirturushsiz nonlarni — zaytun moyi aralashtirilgan sifatli undan tayyorlangan nonlar va zaytun moyi surtilgan chalpaklarni.

¹⁶Ruhoniy bularning hammasini Egamizga taqdim qilib, gunoh qurbonligi va kuydiriladigan qurbonlik qilsin.

¹⁷So‘ng qo‘chqorni don va sharob nazri bilan birga Egamizga tinchlik qurbonligi qilsin. Shuningdek, savatdagi xamirturushsiz nonlarni ham keltirsin.

¹⁸Nazr qilgan odam Uchrashuv chodiriga kiraverishda nazr qilingan sochini oldirsin. Keyin sochlarini yig‘ishtirib olib, tinchlik qurbonligi kuydirilayotgan olovga tashlasin.

¹⁹U sochini oldirib bo‘lgandan so‘ng, ruhoniy qo‘chqorning pishirilgan yelkasini, savatdan bir dona xamirturushsiz nonni, bitta chalpakni olib, nazr qilingan odamning qo‘liga tutqizsin.

²⁰Keyin ruhoniy o‘sha narsalarni Egamizga bag‘ishlaganini ko‘rsatib, yuqoriga ko‘tarsin. Bu narsalar ruhoniyning muqaddas ulushi bo‘ladi. Bular — ruhoniy yuqoriga ko‘tarishi uchun beriladigan qo‘chqor to‘shi va nazr qilingan qo‘chqor sonidan tashqari beriladi. Shundan so‘ng nazr qilingan odam sharob ichishi mumkin.

²¹Nazr qilinganlar uchun qonun shundan iboratdir. Agar nazr qilingan odam Egamizga bulardan tashqari yana biron narsani va’da qilgan bo‘lsa, bergan va’dasi ustidan chiqsin.

²²Egamiz Musoga dedi:

²³— Horun va uning o‘g‘illari Isroil xalqini duo qilganlarida, shunday deb aytishlari kerak:

²⁴“Egam senga baraka bersin, Seni O‘z panohida asrasin!

²⁵Egam senga ochiq yuz bilan boqsin, Senga iltifot qilsin.

²⁶Egam nazarini senga solsin, Senga tinchlik ato etsin!”

²⁷Horun va uning o‘g‘illari Isroil xalqini Mening nomim bilan duo qilishsin [2]. Shunda Men Isroil xalqiga baraka beraman.