Read O‘zbek tilidagi Muqaddas Kitob, 2013 Sahroda 9 Bible Online

Sahroda 9 - O‘zbek tilidagi Muqaddas Kitob, 2013 bible

Sahroda 9

¹Isroil xalqi Misrdan chiqqandan keyin ikkinchi yilning birinchi oyida [1]Egamiz Sinay sahrosida Musoga dedi:

²“Isroil xalqiga ayt, ular Fisih ziyofatini belgilangan vaqtda,

³shu oyning o‘n to‘rtinchi kuni oqshomda nishonlashsin. Bayramning hamma qonun–qoidalariga rioya qilishsin.”

⁴Shunday qilib, Muso Isroil xalqiga: “Fisih ziyofatini nishonlanglar”, deb buyruq berdi.

⁵Isroil xalqi birinchi oyning o‘n to‘rtinchi kuni oqshomda Sinay sahrosida Fisih ziyofatini nishonladi. Ular hamma narsani Egamizning Musoga bergan amri bo‘yicha qilishdi.

⁶Biroq odam murdasiga tegib harom bo‘lganlar o‘sha kuni Fisih ziyofatida ishtirok etisha olmadi. Ular o‘sha kuniyoq Muso bilan Horunning huzuriga kelib shunday deyishdi:

⁷— Biz murdaga tekkanimiz uchun harommiz. Lekin nima uchun biz chetda qolishimiz kerak? Biz ham, Isroil xalqi qatori, belgilangan vaqtda Egamizga qurbonlik keltirmoqchimiz!

⁸Muso ularga: — Kutib turinglar–chi, Egamiz sizlar to‘g‘ringizda qanday amr berar ekan, eshitay, — deb javob berdi.

⁹Musoga Egamiz shunday javob berdi:

¹⁰— Isroil xalqiga Mening shu gapimni yetkaz: “Birortangiz yoki avlodlaringizdan kimdir murdaga tegib harom bo‘lsa yoki safarga ketgan bo‘lsa, Egamizga bag‘ishlangan Fisih ziyofatini nishonlayversin.

¹¹Bunday odamlar bayramni ikkinchi oyning [2] o‘n to‘rtinchi kuni oqshomda nishonlab, qurbonlik [3] go‘shtini xamirturushsiz non va taxir o‘tlar bilan birga yeyishsin.

¹²Ertalabgacha taomdan qoldirishmasin. Qurbonlikning birorta suyagini sindirishmasin. Fisih ziyofatini hamma qonunlarga muvofiq nishonlashsin.

¹³Lekin bironta odam pok bo‘lib, safarda bo‘lmasa va shunga qaramay, Fisih ziyofatini nishonlashdan bosh tortsa, belgilangan vaqtda Egamizga bag‘ishlab qurbonlik qilmagani uchun Isroil xalqi orasidan yo‘q qilinsin. Shunday qilib, u o‘z gunohi uchun jazosini tortadi.

¹⁴Orangizda yashayotgan musofir Egamizga bag‘ishlangan Fisih ziyofatini nishonlamoqchi bo‘lganda, o‘sha qonun–qoidalarga rioya qilishi lozim. Hammangiz uchun — sizlar va musofirlar uchun qonun bitta bo‘lsin.”

¹⁵Muqaddas chodir o‘rnatilgan kuni [4] chodirni [5] bulut qoplab oldi. Oqshomdan ertalabgacha Muqaddas chodir tepasidagi bulutning ko‘rinishi alangaga o‘xshar edi.

¹⁶Har doim shu ahvol yuz berardi: chodirni kunduzi bulut qoplab olar, tunda esa bulut alangaga o‘xshab turardi.

¹⁷Bulut chodir tepasidan ko‘tarilgach, Isroil xalqi yo‘lga chiqardi. Bulut to‘xtagan joyda esa Isroil xalqi chodir tikardi.

¹⁸Isroil xalqi Egamizning amri bilan yo‘lga chiqar va Egamizning amri bilan chodir tikardi. Bulut Muqaddas chodir tepasida turgan vaqt mobaynida, ular ham joylaridan siljimas edilar.

¹⁹Bulut chodir tepasida uzoq kunlar turib qolganda ham, Isroil xalqi Egamizning talabiga rioya qilib, yo‘lga chiqmasdi.

²⁰Ba’zan esa bulut chodir tepasida ozroq kun turardi. Bunday paytda ham Isroil xalqi Egamizning amriga muvofiq to‘xtardi, Uning amri bilan yo‘lga chiqardi.

²¹Ayrim vaqtlarda esa bulut chodir tepasida bor–yo‘g‘i bir kechagina turib, ertalab ko‘tarilar edi. Shunda Isroil xalqi ham yo‘lga chiqardi. Bulut ko‘tarilgan payti, kechasi bo‘ladimi, kunduzi bo‘ladimi, Isroil xalqi ham yo‘lga chiqardi.

²²Ba’zan bulut ikki kun, bir oy yoki uzoqroq vaqt mobaynida chodir tepasida turib qolardi. Shunda Isroil xalqi ham qarorgohda qolib, yo‘lga chiqmasdi. Bulut ko‘tarilgandan so‘ng Isroil xalqi yo‘lga chiqardi.

²³Ular Egamizning amri bilan to‘xtab, Uning amri bilan yo‘lga chiqishardi. Muso orqali Egamiz bergan amrlariga muvofiq hamma talablarni bajarishar edi.