Read O‘zbek tilidagi Muqaddas Kitob, 2013 Mixo 2 Bible Online

Mixo 2 - O‘zbek tilidagi Muqaddas Kitob, 2013 bible

Mixo 2

¹Ey to‘shagida yotib, yovuzlikni rejalashtirganlar! Sizning holingizga voy! Tong otganda siz Rejalaringizni amalga oshirasiz. Ha, bu sizning qo‘lingizdan keladi.

²Sizlar birovning ekinzoriga ko‘z olaytirib, Uni tortib olasiz. Birovning uyini yoqtirib qolib, Uni o‘zingizniki qilib olasiz. Birini o‘z uyidan, Boshqasini — meros qilib olgan yeridan mahrum etasiz.

³Shu sababdan Egamiz demoqda: “Men sizlarga qarshi falokatni reja qilyapman. Sizlar bo‘yinturuqdan qochib qutulolmaysiz, Burningizni osmonga ko‘tarib yurmaysiz. Bu og‘ir damlar bo‘ladi.”

⁴O‘sha vaqt kelganda Odamlar sizlarni masxara qilishadi, Siz haqingizda shunday achchiq marsiya kuylashadi: “Biz merosimizdan mahrum bo‘ldik! Dalalarimiz yovlarga bo‘lib berildi. Endi biz butunlay xarob bo‘ldik!”

⁵Shunday ekan, Egamizning xalqi qaytadan bo‘lganda yurtni, Ulush qilib olmaysiz siz bir parcha yerni.

⁶Sizlar menga aql o‘rgatib deyapsiz: “Bizga aql o‘rgatma! Nafasingni issiq qil, Biz sharmanda bo‘lmaymiz.”

⁷Ey Yoqub nasli, sizlar aytasiz: “Nahotki, Egamizning sabri tugagan bo‘lsa?! Nahotki, Xudo shunday ishlarni qilsa?!” Bu so‘zlarni aytishingiz joizmi?! Axir, Xudoning so‘zlari to‘g‘ri odamga yaxshilik keltiradi–ku!

⁸Egamiz demoqda: “Sizlar o‘z xalqingizga zulm qildingiz! Jangdan xotirjam qaytgan odamni poyladingiz, Uning egnidagi to‘nini tortib oldingiz.

⁹Xalqimning ayollarini shinam uylaridan chiqarib yubordingiz, Yosh bolalarning nasibasini Mening yurtimdan uzdingiz.

¹⁰Qani turinglar, ketinglar bu yerdan! Orom topa olmaysiz endi bu yurtda! Axir, qilgan gunohlaringiz yurtimni harom qildi, Uning xarob bo‘lishiga sababchi bo‘ldi.

¹¹Bordi–yu, oldingizga yolg‘onchi odam kelsa, — Sharob, bo‘zadan va’z aytaman, — deb aytsa, Sizlar uni payg‘ambar deya qabul qilasiz!

¹²Ey Yoqub nasli, Men sizlarni albatta yig‘aman, Ey Isroilning omon qolganlari, Men sizlarni to‘plab olaman. Qo‘radagi qo‘ylarday, yaylovdagi suruvday, Sizlarni Men bir joyga yig‘aman. O‘shanda yurtingiz odamlarga to‘lib–toshadi.

¹³Men Yo‘lboshchingiz bo‘lib, sizlarga yo‘l ochaman, Sizlarni asirlikdan olib chiqaman. Sizlar shahar darvozasidan chiqib ketasiz. Men, Shohingiz sizlarni boshlab boraman. Men, Egangiz oldinda yuraman.”