Read O‘zbek tilidagi Muqaddas Kitob, 2013 Noxum 3 Bible Online

Noxum 3 - O‘zbek tilidagi Muqaddas Kitob, 2013 bible

Noxum 3

¹Holingga voy, ey qo‘li qon shahar! O‘taketgan makkor, o‘ljaga to‘lgan shahar! U yerdagi qotilliklar hech tugamas!

²Quloqqa chalinar qamchilarning vizillashi, G‘ildiraklarning taraq–turug‘i, Yelayotgan ot tuyoqlarining tovushi, Jang aravalarning gumburlashi!

³Jangga kirmoqda otliq sipohlar, Yalt–yult etmoqda qilichlar, Yarqiramoqda nayzalar, Uyilib ketdi o‘liklar, Uyum–uyum bo‘ldi jasadlar, Murdalarning son–sanog‘i yo‘q. Qoqilishar jasadlarga odamlar!

⁴Ey Naynavo, o‘zingni buzuq fohishaday tutding, Suyuqoyoq jodugarday odamlarni rom qilding, Buzuqliging bilan xalqlarni qul qilding, Sehr–jodularing bilan o‘zingga og‘dirding.

⁵“Men senga qarshiman! — deb aytmoqda Sarvari Olam. — Men ko‘ylagingni ko‘tarib, Xalqlarga yalang‘och tanangni ko‘rsataman, Ellar oldida sharmandangni chiqaraman.

⁶Ustingdan axlat yog‘dirib, seni xo‘rlayman. Odamlarga sen tomosha bo‘lasan.

⁷Seni ko‘rganlar orqaga chekinib, shunday deyishar: ‘Naynavo vayron bo‘ldi! Kim unga achinar ekan?!’ Seni yupatadigan hech kim yo‘q!”

⁸No‘ shahridan sening ortiq joying bormidi?! O‘sha shahar Nil daryosi bo‘yida joylashgandi, Suvlar qurshovida turgandi, Daryo — uning istehkomi, Suvlar — himoyasi bo‘lgandi.

⁹Habashistonu Misr uning ustidan hukmronlik qilardi, Kuchining chek–chegarasi yo‘q edi. Fut bilan Liviya uning ittifoqdoshlari edi.

¹⁰Shunday bo‘lsa–da, No‘ shahrining aholisi surgun qilindi, Odamlari asirlikka olib ketildi, Har bir ko‘chaning boshida Toshga urib o‘ldirildi go‘daklari, Aslzodalari uchun qur’a tashlandi, Barcha zodagonlari zanjirband bo‘ldi.

¹¹Ey Naynavo, sen ham mast bo‘lib, gandiraklab qolasan, Bekinasan, dushmanlaringdan qochib, panoh izlaysan.

¹²Sening hamma qal’alaring Mevasi pishgan anjir daraxtiga o‘xshar. Anjirni silkitsang, Anjirlar xo‘randaning og‘ziga tushar.

¹³Lashkaringga bir qarasang–chi! Xotin kishidan farqi yo‘q–ku ularning. Yurtingning darvozalari yov uchun keng ochildi, Darvozalarning tambalarini olov yo‘q qildi.

¹⁴Qamalga tayyorlangin! Suvga to‘ldir idishlaringni! Mustahkamla qo‘rg‘onlaringni! Oyoq bilan ezgin loyni, Tayyorla tezroq qoliplaringni!

¹⁵Baribir olov seni yamlab yuborar, Chigirtka ekinlarni qirtishlaganday, Qilich seni qirib tashlar. Chigirtkaday ko‘payaver!

¹⁶Savdogarlaringni osmondagi yulduzlardan ham ko‘p qilding, Biroq ular chigirtkaday yurtingni talashar, So‘ng qanot qoqib uchib ketishar.

¹⁷Sovuq kunda devorlarga qo‘nadigan, Quyosh chiqqach esa uchib yo‘q bo‘ladigan Chigirtkadaydir sening posbonlaring, Chigirtka galasidaydir sening a’yonlaring. Ular qayerga g‘oyib bo‘lganini bilmaydi hech kim.

¹⁸Ey Ossuriya shohi, Cho‘ponlaringning ko‘zi yumilgan, Yo‘lboshchilaring abadiy uyquga ketgan, Sening xalqing tog‘larga tarqalgan, Ularni yig‘adigan biror kimsa yo‘q.

¹⁹Sening yarangni davolab bo‘lmas, Jarohating halokatlidir. Bu haqda xabar topgan hamma odamlar Xursandligidan chapak chalar. Zotan hech kim cheksiz zulmingdan Qochib qutula olmagan.