Read O‘zbek tilidagi Muqaddas Kitob, 2013 Xabaqquq 2 Bible Online

Xabaqquq 2 - O‘zbek tilidagi Muqaddas Kitob, 2013 bible

Xabaqquq 2

¹Men minoraga chiqib olaman. Shahar devoridan olislarga qarab, Egamning javobini kutaman. Shikoyatimga javob berganda, Unga nima aytishimni o‘ylab ko‘raman.

²Egamiz menga shunday javob berdi: “Senga ayon qilgan so‘zlarimni tosh lavhalarga aniq qilib yoz, yugurib ketayotgan odam uni bir qarashdanoq o‘qiy oladigan bo‘lsin.

³Bashorat belgilangan vaqtda amalga oshadi. O‘sha vaqt hademay yetib keladi, bashorat ro‘yobga chiqadi. Bordi–yu, u kechikadigan bo‘lsa, sabr qilgin. U albatta bajo bo‘ladi, kech qolmaydi.

⁴Menga qara! To‘g‘ri yo‘ldan yurmaganlar halok bo‘ladi. Colihlar esa Xudoga bo‘lgan sadoqati tufayli tirik qoladi.”

⁵Boylik aldamchidir. Boylar takabbur, ular hech qachon tinib–tinchimaydilar. Ular o‘liklar diyori kabi ochko‘z, o‘lim kabi to‘ymaslar. Ular xalqlarni o‘zlariga tobe qilishar, ellarni qo‘l ostiga olishar.

⁶Asirlikka tushganlar ularni nafratomuz mazax etadilar, masxara qilib, shunday aytadilar: “Ey, birovning boyligini talab, uyum qilganlar, sizning holingizga voy! Sizlar birovning narsasini qaytarmay, qarzlaringizni orttirib yuribsizlar. Bunday hol uzoqqa cho‘zilarmidi?!

⁷Qarzlaringizni qistaydiganlar to‘satdan paydo bo‘ladi. Ular kelib sizlarni dahshatga solishadi. Shunda sizlar ular uchun o‘lja bo‘lasizlar.

⁸Sizlar ko‘p xalqlarni taladingiz. Odamlarning qonini to‘kdingiz, yurtu shaharlarni vayron qilib, u yerdagilarni nobud qildingiz. Shuning uchun omon qolgan xalqlar endi sizlarni talon–taroj qiladilar.

⁹Ey, harom yo‘l bilan boylik topib, uyiga tashiganlar, sizning holingizga voy! Sizlar uylaringizni balandlikda qurib, o‘zingizni kulfat changalidan asramoqchi bo‘ldingiz.

¹⁰Ammo hiylalaringiz xonadoningizni sharmanda qildi. Sizlar ko‘p xalqlarni nobud qilganingiz uchun o‘z boshingizga yetdingiz.

¹¹Hatto uyingiz devoridagi toshlar zo‘ravonligingizdan dod soladi. To‘sinlarning nolasi aks sado bo‘lib chiqadi.

¹²Ey, qotillik ila shaharlar qurganlar, holingizga voy! Ey, zo‘ravonlik ila qo‘rg‘onlarga asos solganlar, holingizga voy!

¹³Ellar behuda tinkasini quritadi. Xalqlarning ter to‘kib erishganlari olovga yem bo‘ladi. Bu Sarvari Olamning ishi emasmi?!

¹⁴Ha, suvlar to‘ldirganday dengizni, yer yuzi to‘liq biladi Egamizning ulug‘vorligini.

¹⁵Ey, qo‘shni xalqlarga sharobni zo‘rlab ichirganlar, holingizga voy! Yalang‘och badanlarini tomosha qilaylik deb, ularga g‘azabingiz sharobidan ichirdingiz. Ularni mast qildingiz.

¹⁶Biroq sizlar obro‘ topmay o‘zingiz sharmandalikdan mast bo‘lasizlar. Qani, iching! Yalang‘och tanangizni ko‘rsating! Ana, Egamizning o‘ng qo‘lidagi jazo kosasi sizlarga yetib keldi! Obro‘yingiz to‘kilib, sharmandangiz chiqadi.

¹⁷Ha, Lubnonda qilgan zo‘ravonligingiz o‘z boshingizga yetadi. U yerda yovvoyi hayvonlarni qirdingiz, endi hayvonlar sizlarni dahshatga tushiradi. Chunki sizlar yurtu shaharlarni vayron qildingiz. Odamlarning qonini to‘kib, ularni nobud qildingiz.”

¹⁸Inson yasagan butdan ne foyda?! Sanamning foydasi bormi yolg‘ondan boshqa?! Nega odam o‘zi yasagan narsasiga umidini bog‘laydi?! Nega tili yo‘q bir butni yasaydi?!

¹⁹Holingizga voy, ey, bir parcha yog‘ochga “Uyg‘on!” deganlar! Holingizga voy, ey tilsiz toshga “Tur!” deb yolvorganlar! But sizga to‘g‘ri yo‘l ko‘rsatarmidi?! Oltinu kumush bilan qoplangan butning joni bormidi?!

²⁰Egamiz esa O‘zining muqaddas Ma’badidadir. Uning oldida butun dunyo sukut saqlasin!