Read O‘zbek tilidagi Muqaddas Kitob, 2013 Xabaqquq 3 Bible Online

Xabaqquq 3 - O‘zbek tilidagi Muqaddas Kitob, 2013 bible

Xabaqquq 3

¹Xabaqquq payg‘ambarning kuyga solingan ibodati:

²“Ey, Egam, men Sening shuhrating haqida eshitdim. Qilgan buyuk ishlaringdan hayratda qoldim. Ey, Egam, bizning davrimizda ham shunday ishlaringni qilgin. Odamlar Sening nimalarga qodir ekanligingni bilib qo‘yishsin. G‘azablanganingda mehr–shafqatni esdan chiqarmagin.

³Xudo keladi Edom yurtidan, Muqaddas Xudo keladi Poron qirlaridan. Uning ulug‘vorligi ko‘kni porlatar, Hamdu sanolariga butun dunyo to‘lar.

⁴Ulug‘vorligi chaqmoqday chaqnar, Nur sochilar Uning qo‘lidan — Kuch yashiringan bilagidan.

⁵Uning oldida yuradi o‘lat, Uning ketidan ergashadi ofat.

⁶To‘xtaganda yer silkinadi, Nazar solganda xalqlarni titroq bosadi. Uning qadimdan yurgan yo‘llaridagi Mangu tog‘lar o‘pirilib tushadi, Abadiy qirlar cho‘kib past bo‘ladi.

⁷Kushondagi odamlarning qo‘rqqanini men ko‘ryapman, Midiyondagi odamlarning dag‘–dag‘ qaltiraganini ko‘ryapman.

⁸Ey, Egam, nahotki g‘azablansang daryolardan?! Nahot Sening jahling chiqsa irmoqlardan?! Yoki Sening qasding bormidi dengizdan?! Shuning uchun otlaringni choptirasanmi, Zafarli jang aravalaringga minib olasanmi?!

⁹Sen g‘ilofdan chiqarasan kamoningni, O‘qlarga to‘ldirasan o‘qdoningni. Daryolar bilan yorasan yer yuzini.

¹⁰Buni ko‘rganda tog‘larni dard tutar, Shiddatli oqim ko‘pirib oqar. Dengiz chuquridan nido yangrar, Dengiz to‘lqinlari ko‘kka intilar.

¹¹Sening o‘qlaring uchib chaqnaydi, Nayzalaring yalt etib yonadi. Bundan quyoshu oy o‘z joyida qotib turadi.

¹²Sen jahl ustida bosib o‘tarsan yer yuzini, G‘azabga minib oyoq osti qilarsan xalqlarni.

¹³Qutqarish uchun kelasan O‘z xalqingni, O‘z tanlaganing orqali ozod qilish–chun ularni. Fosiq xalqning yo‘lboshchisini urasan, Boshdan–oyoq uni shilib tashlaysan.

¹⁴G‘animlarimiz quyun kabi kelyaptilar, Bizni har yoqqa tarqatib yubormoqchi bo‘lyaptilar. O‘z uyasida o‘ljasini g‘ajigan yirtqich hayvonday, Kuchsiz ovidan o‘zida yo‘q sevinyaptilar. Sen esa ularning yo‘lboshchisini o‘z o‘qlari bilan halok qilasan.

¹⁵Otlaring tuyoqlari dengizni bosib ezadi, Bahaybat suvlarni bir joyga yig‘ib qo‘yadi.”

¹⁶Men bularni eshitdim. Shunda uvushdi mening yuragim, Titray boshladi lablarim, Madorim qolmay, qaltiradi tizzalarim. Ammo men sabr–toqat qilaman, Bosqinchilarimiz boshiga tushadigan kulfat kunini kutaman.

¹⁷Bordi–yu, anjir daraxti gullamay qolsa, Uzum toklari meva tugmasa, Zaytun daraxtlari hosil bermasa, Daladagi ekinlar unmay qolsa, Qo‘ralarda qo‘ylar qolmasa, Og‘ilxonalar bo‘m–bo‘sh bo‘lsa,

¹⁸Shunda ham Egamdan shod bo‘lurman, Najotkorim Xudodan quvonurman.

¹⁹Egam Rabbiy mening qudratimdir. U oyoqlarimni kiyik oyog‘iday qiladi, Cho‘qqilar uzra meni bexatar yurg‘izadi.