Read O‘zbek tilidagi Muqaddas Kitob, 2013 Zafaniyo 3 Bible Online

Zafaniyo 3 - O‘zbek tilidagi Muqaddas Kitob, 2013 bible

Zafaniyo 3

¹Bulg‘angan, buzuq shaharning holiga voy! Zolimlarga to‘lib ketgan shaharning holiga voy!

²U hech kimning gapiga quloq solmaydi, O‘ziga hech qanday saboq olmaydi. O‘z Xudosi tomon yuz burmaydi, Umidini Egamizga bog‘lamaydi.

³Shahar a’yonlari o‘kirayotgan sherlarga o‘xshaydi. Hakamlari ham kechasi och qolgan bo‘rilarga o‘xshab, Ertalabgacha o‘ljasidan hech narsa qoldirmaydi.

⁴Payg‘ambarlari katta ketadi, Hammasi qalloblik qiladi. Ruhoniylari Xudoning uyini harom qiladi, Ular Tavrot qonunini buzadi.

⁵Ammo Egamiz hamon shahardadir. U doim to‘g‘ri ish qiladi, U nohaqlik qilmaydi aslo! U har kuni ertalabdan adolat o‘rnatadi, Tong sahardan odillik bilan ish tutadi, Fosiqlar esa uyalmay yomonlik qilaveradi.

⁶Egamiz shunday deydi: “Men xalqlarni qirib tashladim, Ularning shaharlarini vayron qildim, Qal’alarini qulatdim. Ana, ko‘chalari huvullab qoldi, Shaharlarida inson zoti qolmadi.

⁷Endi xalqim Mendan qo‘rqar, Bundan o‘ziga saboq olar, deb o‘ylagan edim. Quddusni vayron qilmayman, Aytganlarimni boshiga solmayman, degan edim. Ammo ular shunda ham, Qabihliklar qilish ishtiyoqidan voz kechmadilar.”

⁸Egamiz shunday demoqda: “Mening kelishimni kutinglar, Men xalqlarga hamla qilib, Ularni talon–taroj qiladigan kunni kutinglar. Men qaror qildim: xalqlarni yig‘aman, Barcha ellarni to‘plab olaman. Ularning ustiga g‘azabimni sochaman, Alangali qahrimni ularga yog‘diraman. Rashkim o‘ti butun dunyoni kuydirib tashlaydi.

⁹Keyin Men barcha xalqlarning nutqini o‘zgartiraman, Shunda ular butlarga iltijo qilmay, faqat Menga iltijo qilishadi. Birgalikda Menga xizmat etishadi.

¹⁰Olis yurtlardan ixlosmandlarim kelishadi, Habashistondagi daryolarning narigi tomonidan, Menga nazrlar olib kelishadi.

¹¹Ey xalqim, o‘sha kuni sizlar uyalib qolmaysizlar, Oldinlari Menga bo‘ysunmaganingizdan shunda xijolat tortmaysizlar. Axir, Men orangizdagi takabbur odamlarni yo‘q qilaman. Shunda Muqaddas tog‘imda o‘zlaringizni katta tutmaydigan bo‘lasizlar.

¹²Men faqat kamtarin va itoatkor odamlarni qoldiraman. Ular Men, Egangizda panoh topadilar.

¹³Isroil xalqining omon qolganlari Hech yomonlik qilmaydilar. Ular hech kimni aldamaydilar, Og‘izlaridan yolg‘on so‘z chiqmaydi. Ular yaylovda o‘tlab yurgan qo‘ylarday orom oladilar, Hech kim ularni bezovta qilmaydi.”

¹⁴Ey Isroil xalqi, sevinch ila hayqiring! Ey Quddus aholisi, kuylang! Ey Sion ahli, butun qalbingizdan shodlaning!

¹⁵Egamiz sizlarni jazolab bo‘ldi, Dushmanlaringizni U quvib yubordi. Isroilning Shohi — Egamiz orangizdadir. Siz endi kulfatdan qo‘rqmang.

¹⁶O‘sha kuni Quddusga shunday so‘zlar aytiladi: “Ey, Sion aholisi, qo‘rqmang! Aslo bo‘shashmang!

¹⁷Egangiz Xudo sizning orangizdadir, Sizga zafar keltiruvchi jangchi O‘shadir. U sizni deb xursand bo‘lib sevinadi. O‘z sevgisi ila qo‘rquvlaringizni olib tashlaydi. Ha, sizni deb shod bo‘lib kuylaydi.”

¹⁸Egamiz shunday deydi: “Ey surgun bo‘lgan Quddusliklar, Sizlar tayinlangan bayramlarda Qatnasha olmaganingizdan xafasizlar, Men sizlarni o‘z yurtingizga olib kelaman, Bundan buyon xor bo‘lishingizga yo‘l qo‘ymayman.

¹⁹Sizlarga zulm o‘tkazgan xalqlar bilan O‘shanda O‘zim hisob–kitob qilaman. Men cho‘loqlarni qutqaraman, Haydab yuborilganlarni yig‘ib olaman. Ular sharmanda bo‘lgan har bir yurtda Obro‘ va shuhrat topadilar.

²⁰Ha, o‘sha vaqtda sizlarni yig‘ib olaman, Uylaringizga eltib qo‘yaman. Sizlarni yana farovonlikka erishtiraman, Buni o‘z ko‘zingiz bilan ko‘rasiz, Xalqlarning hurmatu maqtovlariga sazovor bo‘lasiz.” Egamizning kalomi shudir.