Read O‘zbek tilidagi Muqaddas Kitob, 2013 Xaggey 1 Bible Online

Xaggey 1 - O‘zbek tilidagi Muqaddas Kitob, 2013 bible

Xaggey 1

¹Shoh Doro hukmronligining ikkinchi yil, oltinchi oy, birinchi kuni edi. Yahudo hokimi — Shaltiyol o‘g‘li Zarubabelga va oliy ruhoniy — Yohuzadax o‘g‘li Yoshuaga payg‘ambar Xaggey orqali Egamiz quyidagi so‘zlarini ayon qildi:

²[2-3] — Sarvari Olam shunday aytmoqda: “Bu xalq: ‘Hali Egamizning uyini qurishning vaqti kelgani yo‘q’, deb aytadi.

⁴Ey, Isroil xalqi, Mening uyim vayron bo‘lib yotganda sizlarga hashamatli uylarda yashashning vaqtimi?!”

⁵Mana endi Sarvari Olam shunday aytmoqda: “O‘z ahvolingizga qarab, yaxshilab o‘ylab ko‘ringlar–chi!

⁶Ko‘p ekib, kam o‘rasiz. Ovqat yeysiz–u, to‘ymaysiz. Ichasiz, ammo chanqog‘ingiz qonmaydi, ustingizga kiyasiz–u, isinolmaysiz. Kim pul ishlasa, uning puli yirtiq hamyonga tushadi.”

⁷Sarvari Olam shunday demoqda: “O‘z ahvolingizga qarab, yaxshilab o‘ylab ko‘ring, axir!

⁸Tog‘larga chiqib, yog‘och olib tushinglar–da, Mening uyimni quringlar. Men uni ko‘rib zavqlanib, ulug‘lanaman, — deydi Egamiz.

⁹— Ko‘p hosil olishni umid qilgan edingiz, mana kam oldingiz. Uyga olib kelganingizni sochib yubordim. Nima uchun? — demoqda Sarvari Olam. — Mening uyim vayron bo‘lib yotgan paytda, sizlar faqat o‘z uyingiz haqida o‘ylaganingiz uchun shunday qildim.

¹⁰Sizlarni deb osmondan shudring tushmadi, yer ham hosil bermadi.

¹¹Men dalalar, qirli joylarga qurg‘oqchilik keltirib, don, uzum sharbati va zaytun moyini quritdim. Yerdan chiqqan barcha hosilni yo‘q qildim, odamlar va hayvonlarni qiyinchiliklarga duchor qildim. Insonlar o‘z qo‘llari bilan qilgan mehnatlarini puchga chiqardim.”

¹²Shundan keyin Zarubabel, oliy ruhoniy Yoshua va asirlikdan qaytib kelgan barcha xalq o‘zlarining Egasi Xudoga itoat qilishdi. O‘zlarining Egasi Xudo yuborgan payg‘ambar Xaggeyning so‘zlariga quloq solishdi, chunki ular Egamizdan qo‘rqardi.

¹³Egamizning elchisi Xaggey Uning quyidagi so‘zlarini xalqqa yetkazdi: — Egamizning kalomi shudir: “Men sizlar bilan birgaman.”

¹⁴Yahudo hokimi — Shaltiyol o‘g‘li Zarubabelni, oliy ruhoniy — Yohuzadax o‘g‘li Yoshuani va asirlikdan qaytib kelgan butun xalqni Egamiz ruhlantirdi, shunda ular hammalari kelib, o‘zlarining Xudosi, Sarvari Olamning uyini tiklashni boshlashdi.

¹⁵Shoh Doro hukmronligining ikkinchi yil, oltinchi oy, yigirma to‘rtinchi kunida qayta qurilish boshlandi.