Read O‘zbek tilidagi Muqaddas Kitob, 2013 Zakariyo 11 Bible Online

Zakariyo 11 - O‘zbek tilidagi Muqaddas Kitob, 2013 bible

Zakariyo 11

¹Ey, Lubnon, och darvozalaringni! Sadr daraxtlaringni olov yondirib tashlasin.

²Ey, sarv daraxti, dod solib, yig‘lagin, Axir, sadr daraxtlari quladi. O‘sha ulug‘vor daraxtlar vayron bo‘ldi. Bashan yurti emanlari, dod solib, yig‘lang, Qalin–qalin o‘rmonlarning daraxtlari Kesib tashlandi axir.

³Ana, eshiting! Cho‘ponlarning yig‘isin, Axir, ko‘m–ko‘k yaylovlar nobud bo‘ldi. Quloq soling sherlarning o‘kirishiga, Axir, Iordan butazorlari nobud bo‘ldi.

⁴Egam Xudo menga shunday dedi: — Bo‘g‘izlanishga olib ketilayotgan qo‘y suruviga cho‘ponlik qilgin.

⁵Qo‘ylarni sotib olganlar ularni o‘ldirib, jazosiz yuribdilar. Qo‘ylarni sotganlar esa: “Xudoga hamdu sanolar bo‘lsin! Biz boymiz”, deydilar. Qo‘ylarga hatto o‘z cho‘ponlarining ham rahmi kelmaydi.

⁶Men, Egangiz shunday aytmoqdaman: “Endi Yahudo yurtidagi odamlarga rahm qilmayman. Men ularni bir–birining qo‘liga va hukmdorlarining qo‘liga topshiraman. Hukmdorlari yurtni vayron qiladi. Men esa hech kimni bu hukmdorlarning qo‘lidan qutqarmayman.”

⁷Shunday qilib, men bo‘g‘izlanishga olib ketilayotgan qo‘y suruviga cho‘pon bo‘ldim. Men ikkita tayoq oldim. Ulardan birini “Iltifot”, ikkinchisini esa “Ahillik”, deb atab, qo‘ylarni boqdim.

⁸Bir oy ichida ularning uchta cho‘ponini haydab yubordim. Ammo suruvga bo‘lgan sabr–toqatim ham tugadi, ular ham meni yomon ko‘rar edilar.

⁹Shundan keyin men suruvga: — Endi sizlarning cho‘poningiz bo‘lmayman, — dedim. — O‘ladigani o‘lsin, halok bo‘ladigani halok bo‘lsin, qolganlari esa bir–birining go‘shtini yesin.

¹⁰Men “Iltifot” nomli tayog‘imni oldim–da, uni sindirib tashladim. Shu orqali Egamizning butun Isroil xalqi bilan qilgan ahdini bekor qildim.

¹¹Shunday qilib, o‘sha kuni bu ahd bekor bo‘ldi. Meni kuzatib turgan, qattiq zulm ko‘rgan suruv bu ish Egamizning so‘zi ekanligini tushundilar.

¹²Keyin men ularga shunday dedim: — Agar sizlar ish haqimni berishni lozim ko‘rsangiz beringlar, bo‘lmasa bermay qo‘yaveringlar. Shunda ular menga bor–yo‘g‘i o‘ttiz kumush tanga berdilar.

¹³Shundan keyin Egamiz menga: — Bu kumushni kulolga bergin, — dedi. Meni baholab, berilgan bu arzimas kumush tangalarni olib, Egamiz uyidagi kulolga berdim.

¹⁴Keyin “Ahillik”, deb atalgan ikkinchi tayog‘imni sindirdim. Shunday qilib, Yahudo va Isroil orasidagi birodarlikni bekor qildim.

¹⁵Shundan keyin Egamiz menga aytdi: “Bor, yana bir marta cho‘ponlik qilgin. Ammo bu safar foydasiz cho‘ponday bo‘lgin.

¹⁶Ha, men bu yurtga shunday bir cho‘pon beramanki, u halok bo‘layotganlarga qaramaydi. Yo‘qolganlarni izlamaydi, yaradorlarga shifo bermaydi, sog‘ bo‘lganlarni oziqlantirmaydi. Semiz qo‘ylarni so‘yib yeydi, tuyoqlarini ham kesib tashlaydi.

¹⁷Ey suruvni tark etadigan qadrsiz cho‘ponim, Holingga voy! Qilich sening qo‘lingni chopib, O‘ng ko‘zingni chiqarib tashlasin! Sening qo‘ling butunlay qurib qolsin, O‘ng ko‘zing esa ko‘r bo‘lsin.”