Read O‘zbek tilidagi Muqaddas Kitob, 2013 Zakariyo 6 Bible Online

Zakariyo 6 - O‘zbek tilidagi Muqaddas Kitob, 2013 bible

Zakariyo 6

¹Men yana tepaga qarab, ikkita bronza tog‘ orasidan chiqib kelayotgan to‘rtta aravani ko‘rdim.

²Birinchi aravani qizil, ikkinchi aravani esa qora otlar,

³uchinchi aravani oq, to‘rtinchi aravani esa ola–bula otlar tortib kelayotgan edilar. Bu otlarning hammasi kuchli edi.

⁴Men bilan gaplashayotgan farishtadan: — Ey, to‘ram, bular nima? — deb so‘radim.

⁵Farishta shunday javob berdi: — Bular butun olam Rabbiysining huzuridan chiqib kelayotgan to‘rtta samoviy ruhdir.

⁶Qora otli arava shimolga boradi. Oq otlisi esa uning orqasidan ketadi. Ola–bula otli arava janubga boradi.

⁷Ana shu kuchli otlar chiqdilar. Keyin ular borib, yerni aylanib kelishga shoshildilar. Farishta ularga: — Boringlar, yerni ko‘rib chiqinglar, — dedi. Shunda ular borib, aylanib kelishdi.

⁸Keyin farishta meni chaqirib, shunday dedi: — Mana, qara! Otlar shimoliy yurtga borib, u yerda Egamizning Ruhiga tinchlik berishdi.

⁹Egamiz menga quyidagi so‘zlarni ayon qildi:

¹⁰— Bobildagi surgundan qaytib kelgan Xalday, Toviyo va Yodayodan tilla va kumush ol. O‘sha kuniyoq Zafaniyo o‘g‘li Yo‘shiyoning uyiga bor.

¹¹Berilgan kumush va oltindan toj yasagin. Uni Yohuzadax o‘g‘li — oliy ruhoniy Yoshuaning boshiga kiygizgin–da,

¹²unga shunday degin: “Sarvari Olam shunday demoqda: ‘Novda degan odam o‘z turgan joyidan shoxlaydi–da, Mening Ma’badimni quradi.

¹³Mening Ma’badimni quradigan o‘shadir. U shohona ulug‘vorlikka ega bo‘lib, hukmronlik qiladi. Taxtining oldida ruhoniy turadi. Ikkalasi orasida tinchlik, osoyishtalik bo‘ladi.

¹⁴Bu toj Xalday, Toviyo, Yodayo va Zafaniyo o‘g‘li Yo‘shiyoning qaramog‘ida bo‘ladi. U Mening Ma’badimda yodgorlik bo‘lib qoladi.

¹⁵Uzoq joylardan odamlar kelib, Mening Ma’badimni qurishga yordam berishadi.’” Ey surgundan qaytib kelganlar, shunda Sarvari Olam meni yuborganini sizlar anglab yetasizlar. Agar sizlar Egangiz Xudoning so‘zlariga yaxshilab quloq solsangizlar, mana shularning hammasi sodir bo‘ladi.