Read O‘zbek tilidagi Muqaddas Kitob, 2013 Zakariyo 7 Bible Online

Zakariyo 7 - O‘zbek tilidagi Muqaddas Kitob, 2013 bible

Zakariyo 7

¹Shoh Doro hukmronligining to‘rtinchi yili, to‘qqizinchi oyi edi. Mana shu Xislav oyining to‘rtinchi kunida Egamiz O‘z so‘zini Zakariyoga ayon qildi.

²Bundan oldin Baytil aholisi Egamizdan iltifot so‘rash uchun Sarizar, Raxemmalek va ularning odamlarini Ma’badga yuborib, shunday degan edi:

³— Borib, Sarvari Olamning uyida bo‘lgan ruhoniy va payg‘ambarlardan so‘ranglar: “Biz ancha yillardan beri Egamizning uyi vayron qilingan oyda qayg‘urib, ro‘za tutib kelamiz. Shunday qilishda davom etaveraylikmi?”

⁴Sarvari Olam Zakariyoga ayon qilgan so‘zida shunday dedi:

⁵— Bu yurtdagi barcha odamlarga va ruhoniylarga ayt: “Ha, sizlar mana shu o‘tgan yetmish yil davomida beshinchi va yettinchi oylarda ro‘za tutib, qayg‘urdingizlar. Ammo buni Men uchun emas, o‘zingiz uchun qilgan edingizlar!

⁶Qorningizni to‘ydirish uchun yeb–ichganingizday, o‘z manfaatingiz uchun ro‘za tutib qayg‘urgansizlar.

⁷Men o‘tgan payg‘ambarlar orqali ham sizlarni shu haqda ogohlantirganman–ku! O‘sha paytlarda Quddus va uning atrofidagi qishloqlar odamga to‘la edi. U yerda farovonlik hukm surar edi. Nagav cho‘li va Yahudo qir etaklarida ham odamlar yashardilar.”

⁸Egamiz Zakariyoga quyidagi so‘zlarni ayon qildi:

⁹— Men, Sarvari Olam shunday degan edim: “Adolatli hukm qilinglar. Bir–biringizga mehribon bo‘linglar, rahm–shafqat qilinglar.

¹⁰Bevalarga, yetimlarga, musofirlarga, kambag‘allarga zulm qilmanglar. Bir–biringizga qarshi yovuz rejalar tuzmanglar.”

¹¹Ammo xalqim quloq solishdan bosh tortdi. O‘jarlik qilib, eshitmaslik uchun quloqlarini berkitdilar.

¹²Men, Sarvari Olam, O‘z Ruhim bilan payg‘ambarlar orqali so‘zlarimni ayon qilganman. Ammo xalqim yuragini tosh qilib, qonun va o‘gitlarga quloq solmadi. Shuning uchun Men juda qattiq g‘azablandim.

¹³“Men chaqirganimda ular eshitmagandek, ular chaqirganda Men ham eshitmadim, — deydi Sarvari Olam.

¹⁴— Men ularni o‘zlari tanimagan, bilmagan xalqlar orasiga sochib tashladim. Shunday qilib, ularning yurti vayron bo‘ldi. Na u yerga birov boradi, na u yerdan birov keladi. O‘sha ajoyib yurt vayron bo‘ldi.”