Read O‘zbek tilidagi Muqaddas Kitob, 2013 Zakariyo 9 Bible Online

Zakariyo 9 - O‘zbek tilidagi Muqaddas Kitob, 2013 bible

Zakariyo 9

¹Bashorat. Egamizning so‘zi Xadrax yurtiga qarshidir. Damashq shahriga qaratilgandir. Barcha Isroil qabilalarining hamda insoniyatning ko‘zlari Egamizdadir.

²Xadraxga chegaradosh bo‘lgan Xomat ham, Donolarga to‘la bo‘lgan Tir va Sidon ham Egamizga ko‘z tikkan.

³Tir shahri o‘ziga qal’a qurib olgan, Shunchalik ko‘p kumush va oltin yiqqanki, Ular ko‘chadagi chang va loydaydir.

⁴Lekin endi Egamiz ularning mulkini olib qo‘yadi, Boyliklarini dengizga uloqtiradi. Shaharning o‘zi esa olovga yem bo‘ladi.

⁵Ashqalon shahri buni ko‘rib, qo‘rquvga tushadi, G‘azo ham dahshatga tushib qaltiraydi, Umidi puchga chiqqan Exron ham shu ahvolga tushadi. G‘azoning shohi halok bo‘ladi, Ashqalonda esa hech bir zot qolmaydi.

⁶Egamiz shunday deydi: “Ashdodda duragay xalqlar yashaydi. Ha, Men Filistlarning takabburligiga chek qo‘yaman.

⁷Men Filistlarning og‘zidan qonli go‘shtni, Tishlaridagi harom ovqatlarni olib tashlayman. Filistlarning tirik qolganlari Menga tegishli bo‘ladi, Ular Yahudoning avlodiday bo‘lib qoladi. Exron ham Yobus xalqiday O‘z xalqimning bir qismi bo‘ladi.

⁸Bosqinchilardan asray, deb Men O‘zim uyimni qo‘riqlayman. Xalqimning yurtini hech kim bosib ololmas, Ha, Men hammasini ko‘rib turibman.

⁹Xursand bo‘lib, quvoning, Ey Quddus xalqi! Shodlik–la hayqiring, Ey Sion xalqi! Mana shohingiz kelyapti. U zafar qozongan g‘olibdir. Shunga qaramay, Kamtarindir shohingiz, U eshakning ustida, Ha, eshakning bolasini — ho‘tikni minib kelyapti.

¹⁰Men Efrayimning jang aravalarini yo‘qotaman, Quddusning jang otlarini olib qo‘yaman. Urush kamonlari ham yo‘q qilinadi, Shohingiz xalqlarga tinchlik keltiradi. Men bir dengizdan ikkinchisiga qadar, Furot daryosidan tortib, Yer yuzining to‘rt tomoniga hukmronlik qilaman.

¹¹Men sizlar bilan qilgan, qurbonlik qoni bilan mustahkamlangan ahdim tufayli, Asirlaringizni suvsiz chuqurlikdan ozod qilaman.

¹²Ey umidvor asirlar, O‘z qal’angizga qayting. Bugun Men aytyapman, Yo‘qotganlaringizni ikki barobar qilib tiklayman.

¹³Men Yahudoni O‘z kamonimdek qayirdim, Efrayimni esa kamonim o‘qi qildim. Ey Quddus, Men sening o‘g‘illaringni Yunon o‘g‘illariga qarshi qo‘zg‘ataman. Mening qo‘limda jangchining qilichiday o‘ynaysan.”

¹⁴Shundan keyin Egamiz O‘z xalqi uzra zohir bo‘ladi, Uning o‘qi yashinday otiladi. Egamiz Rabbiy burg‘uni chalib, Janubdan kelgan quyunlar orasida hujum qiladi.

¹⁵Sarvari Olam O‘z xalqini himoya qiladi, Ular dushmanlarini qirib, Palaxmonlarini ezib tashlashadi. Ha, Uning xalqi sharobdan mast bo‘lganday jangda o‘kiradi. Ular tog‘oracha singari, Qurbongohning to‘rt burchagi kabi Qonga to‘la bo‘ladi.

¹⁶O‘sha kuni ularning Egasi — Xudo O‘z xalqini qutqaradi. Axir, ular Egamizning suruvidir. Egamizning yurtida ular Toj gavharlariday porlaydilar.

¹⁷Uning xalqi qanday go‘zal va ajoyib! Yangi sharobu donlar Yigit–qizlarni baquvvat qilar.