Read O‘zbek tilidagi Muqaddas Kitob, 2013 Luqo 10 Bible Online

Luqo 10 - O‘zbek tilidagi Muqaddas Kitob, 2013 bible

Luqo 10

¹Shundan keyin Rabbimiz Iso yetmish ikki odamni tanlab oldi. Ularni ikkita–ikkita qilib, borishni mo‘ljallagan har bir shaharga, har bir joyga O‘zidan oldin jo‘natdi.

²Iso ularga shunday dedi: — Hosil mo‘l, ammo ishchilar oz. Hosil Egasidan: “Hosilingni yig‘ib olishga yana ishchilar yubor”, deb so‘ranglar.

³Boringlar! Sizni bo‘rilar orasiga qo‘zilarday yuboryapman.

⁴O‘zlaringiz bilan hamyon, to‘rva, choriq olmanglar. Yo‘lda hech kim bilan salomlashmanglar.

⁵Biror xonadonga kirganlaringizda, avvalo: “Xonadoningizda tinchlik–omonlik bo‘lsin”, deb aytinglar.

⁶Agar o‘sha xonadonda tinchliksevar odam yashayotgan bo‘lsa, siz tilagan tinchlik o‘sha odamda qoladi. Bo‘lmasa, o‘zingizga qaytib keladi.

⁷Bir xonadondan boshqa xonadonga ko‘chib yurmanglar. Kirgan xonadoningizda qolinglar. Oldingizga nima qo‘yishsa, o‘shani yeb–ichinglar. Chunki mehnatkash ish haqini olishga munosibdir.

⁸Bir shaharga kirganingizda, shahar aholisi sizlarni qabul qilsa, oldingizga qo‘yganlarini yenglar.

⁹O‘sha yerdagi xastalarga shifo berib, shahardagi odamlarga: “Xudoning Shohligi sizlarga yaqinlashdi”, deb aytinglar.

¹⁰Ammo biron shaharga kirganingizda sizlarni qabul qilmasalar, o‘sha shaharning shoh ko‘chalariga chiqib shunday deb aytinglar:

¹¹“Noroziligimiz tariqasida shahringizdan oyoqlarimizga yopishgan changni ham qoqib ketyapmiz. Ammo bilib qo‘ying, Xudoning Shohligi yaqinlashdi!”

¹²Sizlarga aytamanki, qiyomat kunida o‘sha shaharning holi Sado‘m shahrining holidan battar bo‘ladi.

¹³“Sening holingga voy, ey Horazin! Sening holingga voy, ey Baytsayda! Agar sizlarda sodir bo‘lgan mo‘jizalar Tir bilan Sidon shaharlarida yaratilganda edi, ular allaqachon qanorga o‘ranib, kulga o‘tirib, tavba qilgan bo‘lardilar.

¹⁴Qiyomat kunida sizning holingiz Tir va Sidonning holidan battar bo‘ladi.

¹⁵Ey Kafarnahum! Xudo seni ko‘klarga ko‘taradi deb o‘ylaysanmi?! Yo‘q, U seni tubsiz chuqurlikka uloqtiradi!”

¹⁶Iso shogirdlariga dedi: “Sizlarga quloq solgan Menga quloq solgan bo‘ladi. Sizlarni rad qilgan Meni rad qilgan bo‘ladi. Meni rad qilgan esa Meni Yuborganni rad qilgan bo‘ladi.”

¹⁷Yetmish ikki shogird xursand bo‘lib safardan qaytib keldilar. Ular Isoga shunday dedilar: — Hazrat, biz Sizning nomingizdan buyruq berganimizda, hatto jinlar ham itoat etyaptilar.

¹⁸Iso ularga dedi: — Men shaytonning osmondan yashinday tushganini ko‘rdim.

¹⁹Men sizlarga ilonu chayonlarni bosib ezish hokimiyatini va shaytonning butun kuch–qudratini oyoq osti qilish hokimiyatini berganman. Hech narsa sizlarga zarar yetkazmaydi.

²⁰Biroq jinlar sizga bo‘ysunayotganidan xursand bo‘lmanglar, balki nomlaringiz osmonda yozilganidan xursand bo‘linglar!

²¹Shu on Iso Muqaddas Ruhning shodligiga to‘lib, dedi: “Ey Ota, yeru osmonning Egasi! Sen bu ishlarni donolaru idroklilardan yashirib, go‘daklarga ma’lum etganing uchun Senga shukrlar aytaman. Ha Ota, bu Sening ezgu xohishing edi.”

²²So‘ng Iso odamlarga dedi: “Otam hamma narsani Mening ixtiyorimga topshirgan. O‘g‘ilning kimligini Otadan boshqa hech kim bilmaydi. Otaning kimligini ham O‘g‘ildan boshqa va O‘g‘il ayon qilishni istagan odamdan boshqa hech kim bilmaydi.”

²³Iso shogirdlariga o‘girilib qaradi–da, ularga alohida dedi: “Sizlar ko‘rayotganlarni ko‘radigan ko‘zlar baxtlidir!

²⁴Sizlarga shuni aytay: qancha payg‘ambarlar, qancha shohlar sizlar ko‘rgan voqealarni ko‘rishni istaganlar, ammo ko‘rmaganlar. Sizlar eshitganlarni eshitishni istaganlar, ammo eshitmaganlar.”

²⁵Shunda Isoni sinash maqsadida kelgan Tavrot tafsirchilaridan biri turib, Unga savol berdi: — Ustoz, abadiy hayotga ega bo‘lishim uchun men nima qilishim kerak?

²⁶Iso: — Qonunda bu to‘g‘rida nima yozilgan? Siz nima deb tushunasiz? — deb so‘radi.

²⁷U kishi shunday javob berdi: — “Egangiz Xudoni butun qalbingiz bilan, jonu dilingiz bilan, butun ongingiz bilan, kuchingiz boricha seving”, yana: “O‘zgani o‘zingizni sevganday seving”, deb yozilgan.

²⁸Iso unga: — To‘g‘ri javob berdingiz. Siz ham shunday qiling, ana shunda yashaysiz! — dedi.

²⁹Ammo u odam o‘zini oqlamoqchi bo‘lib, Isodan: — Mening yaqinim kim? — deb so‘radi.

³⁰Iso shunday javob berdi: — Bir odam Quddusdan Yerixoga borayotgan ekan, qaroqchilar qo‘liga tushib qolibdi. Qaroqchilar uning kiyimlarini yechib olib, kaltaklab, chalajon qilib tashlab ketibdilar.

³¹Tasodifni qarangki, o‘sha yo‘ldan bir ruhoniy ketayotgan ekan. U haligi odamni ko‘ribdi–yu, yo‘lning narigi chetidan o‘tib ketaveribdi.

³²O‘sha joydan o‘tib ketayotgan levi ham xuddi shunday qilibdi. U yarador odamni ko‘rib, yo‘lning narigi chetidan o‘tib ketaveribdi.

³³Ammo o‘sha yerdan o‘tib ketayotgan bir Samariyalik yarador odamni ko‘rib, unga achinib ketibdi.

³⁴Uning yoniga kelib, yaralariga moy, sharob surib, bog‘lab qo‘yibdi. So‘ng uni o‘z uloviga mindiribdi–da, mehmonxonaga olib kelib, uni parvarish qilibdi.

³⁵Ertasi kuni ikki dinor chiqaribdi–da, mehmonxona egasiga berib: “Unga yaxshi qarang, agar bundan ortiq xarajat qilsangiz, qaytishimda sizga to‘layman”, debdi.

³⁶Sizningcha, o‘sha uch odamdan qaysi biri qaroqchilar qo‘liga tushgan odamning yaqini hisoblanadi?

³⁷Tafsirchi: — Unga shafqat ko‘rsatgan odam–da, — deb javob berdi. — Boring, siz ham shunday qiling! — dedi unga Iso.

³⁸Iso va Uning shogirdlari yo‘lda davom etdilar. Ular bir qishloqqa kirdilar. Bu yerda Marta ismli ayol Isoni uyiga taklif qildi.

³⁹Uning Maryam ismli bir singlisi bor edi. Maryam Rabbimiz Isoning oyoqlari oldida o‘tirib, Uning so‘zlarini tinglar edi.

⁴⁰Marta esa mehmon kutish bilan ovora edi. U Isoning oldiga kelib dedi: — Hazrat! E’tibor bermayapsizmi, singlim hamma ishni bir o‘zimga tashlab qo‘ydi–ku! Unga ayting, menga yordam bersin.

⁴¹Rabbimiz Iso unga shunday javob berdi: — Eh, Marta, Marta, buncha urinib tashvishlanmasang!

⁴²Zarur bo‘lgan bittagina narsa bor. Maryam o‘zi uchun eng yaxshisini tanladi va bu undan tortib olinmaydi.