Read O‘zbek tilidagi Muqaddas Kitob, 2013 Luqo 11 Bible Online

Luqo 11 - O‘zbek tilidagi Muqaddas Kitob, 2013 bible

Luqo 11

¹Bir payt Iso ibodat qilayotgan edi. Ibodatni tamom qilgach, shogirdlaridan biri Unga dedi: — Hazrat! Yahyo o‘z shogirdlariga ibodat qilishni o‘rgatgandi. Siz ham bizga ibodat qilishni o‘rgating.

²Iso ularga dedi: — Ibodat qilayotganingizda shunday deb aytinglar: Ey Otamiz! Sening muqaddas noming ulug‘lansin. Sening Shohliging kelsin.

³Kundalik rizqimizni bergin.

⁴Gunohlarimizni kechirgin, Chunki biz ham o‘zimizga qarshi gunoh qilgan har bir odamni kechiramiz. Bizni vasvasaga duchor qilmagin.

⁵Iso shogirdlariga dedi: — Faraz qilaylik, orangizdan birortangiz yarim kechasi do‘stingizning oldiga borib, shunday deb iltimos qildingiz: “Do‘stim, menga uchta non qarz berib tur.

⁶Hozir uyimga bir do‘stim kelib qoldi, uning oldiga qo‘yadigan biron yeguligim yo‘q.”

⁷Ichkaridagi do‘stingiz esa sizga shunday javob berdi deylik: “Meni bezovta qilma! Eshik qulf, bolalarim men bilan bir to‘shakda yotishibdi. O‘rnimdan turib senga non berolmayman!”

⁸Men sizlarga aytaman: u sizga nonni do‘sti bo‘lganingiz uchun bermasa ham, siz uni holi–joniga qo‘ymay so‘rayversangiz, so‘ragan narsangizni albatta sizga beradi.

⁹Sizlarga aytaman: so‘rang va sizga beriladi. Izlang, topasizlar. Taqillating, eshik ochiladi.

¹⁰Chunki so‘ragan har bir odam oladi, izlagan topadi, taqillatganga eshik ochiladi.

¹¹Orangizdan qaysi bir ota, o‘g‘li baliq so‘raganda, unga baliq o‘rniga ilon beradi?

¹²Yoki tuxum so‘raganda, unga chayon beradi?

¹³Sizlar gunohkor bo‘la turib bolalaringizga yaxshi hadyalar bera olar ekansiz, osmondagi Ota ham Undan so‘raganlarga Muqaddas Ruhni berishga qanchalar tayyor.”

¹⁴Bir kuni Iso soqov odamdan yovuz ruhni quvib chiqardi. Jin chiqqandan so‘ng, soqov tilga kirdi, xalq esa hayratda qoldi.

¹⁵Ammo oralaridan ba’zilari: “U ins–jinslar hukmdori — Baalzabulning kuchi bilan jinlarni quvib chiqaryapti!” — dedilar.

¹⁶Boshqalar esa Isoning Xudodan kelganini sinab ko‘rmoqchi bo‘lib, mo‘jizali alomat ko‘rsatishini talab qildilar.

¹⁷Iso esa ularning nima haqida o‘ylayotganini bilib turardi. U o‘sha odamlarga dedi: “O‘z ichidan bo‘linib ketgan har bir shohlik huvullab qoladi, o‘z ichidan bo‘lingan xonadon xarob bo‘ladi.

¹⁸Shu singari, shayton shohligi ham o‘zaro bo‘linib ketsa, uning shohligi qanday tura oladi?! Sizlarning gapingizga ko‘ra, ins–jinslar hukmdori — Baalzabul ato etgan qudrat bilan Men jinlarni quvib chiqarayotgan emishman.

¹⁹Agar Men jinlarni Baalzabul kuchi bilan quvib chiqarayotgan bo‘lsam, u holda o‘z sheriklaringiz kimning kuchi bilan jinlarni quvib chiqarishyapti? Shu sababdan ham sheriklaringiz sizlarni hukm qiladi.

²⁰Agar Men jinlarni Xudoning qudrati bilan quvayotgan bo‘lsam, demak, Uning Shohligi sizlarga ham kelgan.

²¹Boshdan–oyoq qurollangan kuchli odam uyini qo‘riqlaganda, uning mol–mulki bexatar bo‘ladi.

²²Ammo undan kuchlirog‘i hujum qilib uni yengsa, uning tayangan barcha qurollarini tortib oladi va o‘ljasini istaganiga taqsimlab beradi.

²³Kim Men bilan birga bo‘lmasa, Menga qarshidir. Kim Men bilan birga yig‘masa, sochadi.

²⁴Yovuz ruh insondan chiqqandan keyin, huzur–halovat izlab, suvsiz yerlarni kezadi va topmagach: “Chiqqan uyimga qaytib boraman”, deydi.

²⁵Uyiga kelganda, uyni supurilgan va yig‘ishtirilgan holda ko‘radi.

²⁶Shunda borib, o‘zidan ham yovuzroq boshqa yettita ruhni chaqiradi va ular bilan uyga kirib, joylashib oladi. Oxir–oqibat o‘sha odamning ahvoli oldingidan ham yomonroq bo‘ladi.”

²⁷Iso shu gaplarni aytayotganda, olomon orasidan bir ayol baland ovozda Isoga dedi: — Sizni qornida ko‘tarib yurgan, sizni emizgan ayol baxtlidir!

²⁸Iso esa javoban shunday dedi: — To‘g‘ri, lekin Xudoning kalomini tinglab, unga rioya qiladiganlar baxtliroqdir!

²⁹Isoning oldiga katta olomon yig‘ilgandan keyin, Iso so‘z boshladi: — Hozirgi nasl qabih bir nasldir. Bu nasl alomat so‘raydi, ammo ularga Yunusning alomatidan boshqa alomat berilmaydi.

³⁰Yunus Naynavo aholisiga alomat bo‘lgani singari, Inson O‘g‘li ham hozirgi nasl uchun alomat bo‘ladi.

³¹Janub malikasi qiyomat kunida o‘rnidan turib, bu naslning odamlarini mahkum etadi. Chunki malika Sulaymonning dono ta’limotini tinglagani dunyoning u chetidan kelgan edi. Bu yerda esa Sulaymondan ham buyukroq bir Zot turibdi!

³²Naynavo aholisi qiyomat kunida o‘rnidan turib, bu naslni mahkum etadi. Chunki Naynavoliklar Yunusning va’zidan keyin tavba qilganlar. Bu yerda esa Yunusdan ham buyukroq bir Zot turibdi!

³³“Hech kim chiroqni yoqib, uni ko‘rinmas yerga qo‘ymaydi. Aksincha, kirganlar yorug‘likni ko‘rsin, deb uni chiroqpoyaga qo‘yadi.

³⁴Tananing chirog‘i — ko‘z. Agar ko‘zingiz pok bo‘lsa, butun taningiz yop–yorug‘ bo‘ladi. Agarda ko‘zingiz yomon bo‘lsa, butun tanangiz zimziyo zulmat bo‘ladi.

³⁵Shuning uchun e’tibor bering: sizdagi nur zulmat bo‘lmasin.

³⁶Agar tanangiz yop–yorug‘ bo‘lib, bironta qorong‘i joyi bo‘lmasa, chiroqning nuri sizni yoritib turganday, badaningiz tamomila yop–yorug‘ bo‘ladi.”

³⁷Iso bularni gapirib turganda, bir farziy Uni mehmonga taklif qildi. Iso uning uyiga kirib, dasturxon yoniga yonboshladi.

³⁸Iso ovqatdan oldin qo‘llarini yuvmaganini farziy ko‘rib, ajablandi.

³⁹Rabbimiz Iso unga dedi: “Ey farziylar, sizlar piyolayu idishning sirtini tozalaysizlar–u, ammo ichingiz ochko‘zlik va yovuzlikka to‘la!

⁴⁰Hoy befahmlar! Narsaning sirtini yaratgan uning ichini ham yaratgan emasmi?!

⁴¹Yaxshisi, idishingiz ichidagini kambag‘allarga xayr–sadaqa qilib beringlar. Shunda hamma narsa siz uchun halol bo‘ladi.

⁴²Ey farziylar, holingizga voy! Sizlar yalpiz, za’faron va har xil oshko‘kdan ushr berasizlar–u, ammo adolat va Xudoning sevgisini pisand qilmaysizlar! Bularning birini bajara turib, ikkinchisini ham tashlab qo‘ymasligingiz kerak edi.

⁴³Ey farziylar, holingizga voy! Sizlar sinagogalarning to‘rida o‘tirishni va bozorlarda sizlarga salom berishlarini yaxshi ko‘rasizlar.

⁴⁴Holingizga voy! Sizlar belgisi yo‘q qabrlarga o‘xshaysizlar. Odamlar bilmay turib o‘sha qabrlar ustidan bosib o‘tadilar.”

⁴⁵Tafsirchilardan biri Isoga dedi: — Ustoz, bu so‘zlaringiz bilan bizni haqorat qildingiz!

⁴⁶Iso esa dedi: — Ey tafsirchilar, sizlarning ham holingizga voy! Sizlar ko‘tarib bo‘lmaydigan og‘ir yukni odamlarga yuklaysizlar–u, ularga yordam bergani o‘zlaringiz hatto barmog‘ingizni ham qimirlatmaysizlar.

⁴⁷Holingizga voy! Sizlar ota–bobolaringiz o‘ldirgan payg‘ambarlarga maqbaralar quryapsizlar.

⁴⁸Shu tariqa ota–bobolaringizning qilmishlarini ma’qullaganingizni tasdiqlayapsizlar. Ular payg‘ambarlarni o‘ldirishgan bo‘lsa, sizlar payg‘ambarlarga maqbaralar quryapsizlar!

⁴⁹Shuning uchun ham Xudo O‘z hikmatlarida shunday degan: “Men ularga payg‘ambarlar va havoriylar yuboraman. Ulardan ba’zilarini o‘ldiradilar, ba’zilarini esa quvg‘in qiladilar.”

⁵⁰Dunyo yaratilgandan beri hamma payg‘ambarlarning to‘kilgan qoni uchun bu nasl jazolanadi.

⁵¹Ular Hobilning to‘kilgan qonidan tortib, qurbongoh bilan Ma’bad orasida o‘ldirilgan Zakariyoning qonigacha javob berishadi. Ha, sizlarga aytib qo‘yay, bu nasl shu hamma qotilliklar uchun javobgar bo‘ladi.

⁵²Holingizga voy, ey tafsirchilar! Sizlar ilmu ma’rifat kalitini tortib oldingizlar. Ammo o‘zlaringiz kirmadingizlar, kirmoqchi bo‘lganlarning ham yo‘llarini to‘sdingizlar.”

⁵³Iso u yerdan chiqishi bilanoq, tafsirchilar va farziylar Uni qattiq siquvga oldilar, ko‘p savollarga javob berishga majburladilar.

⁵⁴Ular Isoni tilidan ilintirib olish uchun fursat poylardilar.