Read O‘zbek tilidagi Muqaddas Kitob, 2013 Luqo 12 Bible Online

Luqo 12 - O‘zbek tilidagi Muqaddas Kitob, 2013 bible

Luqo 12

¹Shu orada minglab odamlar to‘planib, bir–birlarini itarib siqishayotgan edilar. Iso avval shogirdlariga gapira boshladi: “Farziylarning xamirturushidan, ya’ni ularning ikkiyuzlamachiligidan ehtiyot bo‘linglar!

²Axir, har qanday yashirin narsa ma’lum bo‘ladi, har qanday sir ochiladi.

³Shu bois qorong‘ida aytganlaringiz yorug‘likda eshitiladi, yopiq eshiklar ortida shivirlab aytganlaringizni uylarning tomi ustida baqirib e’lon qilishadi.”

⁴“Sizlarga shuni aytay, do‘stlarim, tanani o‘ldirib, undan keyin boshqa biron narsa qila olmaydiganlardan qo‘rqmanglar.

⁵Biroq kimdan qo‘rqishingiz kerakligini sizlarga uqtiray: Xudodan qo‘rqinglar, chunki U odamni o‘ldirib, do‘zaxga tashlashga ham qodir. Ha, sizlarga aytaman, Xudodan qo‘rqinglar!

⁶Beshta chumchuq ikki tangaga sotiladi, shunday emasmi? Biroq bularning birontasi ham Xudoning nazaridan chetda qolmagan.

⁷Sizlarning esa hatto boshingizdagi har bir tola sochingiz sanalgan. Qo‘rqmanglar, sizlar ko‘plab chumchuqlardan qadrliroqsizlar.

⁸Sizlarga yana shuni aytay: kim Meni insonlar oldida tan olsa, Inson O‘g‘li ham Xudoning farishtalari oldida uni tan oladi.

⁹Ammo kim insonlar oldida Meni rad etsa, u ham Xudoning farishtalari oldida rad etiladi.

¹⁰Kimki Inson O‘g‘liga qarshi so‘z aytsa, kechiriladi. Lekin kim Muqaddas Ruhga kufrlik qilsa, kechirilmaydi.

¹¹Sizlarni sinagogalarga, boshliqlar va hokimlar oldiga olib kelganlarida: “O‘zimizni qanday himoya qilamiz, nima aytamiz”, deb xavotir olmanglar.

¹²Nima deb gapirishingizni o‘sha vaqtda sizga Muqaddas Ruh o‘rgatadi.”

¹³Olomon orasidan kimdir Isoga aytdi: — Ustoz, akamga ayting, otamiz bizga qoldirgan merosni men bilan bo‘lishsin.

¹⁴— Ey inson! Kim Meni sizlarga qozi yoki meros bo‘luvchi qilib qo‘yibdi? — dedi unga Iso.

¹⁵So‘ng xaloyiqqa dedi: — Ehtiyot bo‘linglar, o‘zingizni har qanday ochko‘zlikdan saqlanglar. Zero, insonning umri mol–mulkining ko‘pligiga bog‘liq emas.

¹⁶Iso ularga shunday masal aytdi: —Bir boy odamning dalasi mo‘l hosil beribdi.

¹⁷Boy ko‘nglida: “Nima qilsam ekan, hosilimni saqlashga yetarli joyim yo‘q–ku”, deb o‘ylabdi.

¹⁸Nihoyat, u shunday debdi: “Endi bunday qilaman: omborlarimni buzib, kattaroqlarini quraman. Hamma don–dunlarimni, boyliklarimni o‘sha yerda saqlayman.

¹⁹Shunda o‘zimga o‘zim deyman: ko‘p yillarga yetadigan mol–mulk to‘pladim. Endi rohatlanaman, yeb–ichaman, kayfu safo qilaman.”

²⁰Ammo Xudo unga shunday debdi: “Ey nodon! Shu tundayoq joning olinadi. Shunda yig‘ib–tergan mol–mulking kimga qoladi?”

²¹Ha, o‘zi uchun boylik yiqqan, ammo Xudoning nazarida boy bo‘lmagan odamning qismati shunday bo‘ladi.”

²²Iso shogirdlariga shunday dedi: — Shuning uchun sizlarga aytaman: “Tirikchiligingizdan xavotir olib, nima yerkanmiz, ustimizga nima kiyarkanmiz, demanglar.

²³Axir, hayot ovqatdan, tana esa kiyimdan muhimroq–ku!

²⁴Qarg‘alarga qaranglar: ular na ekadi, na o‘radi, na omborlari, na qo‘ralari bor. Shunga qaramay, Xudo ularning rizqini beradi. Sizlar esa qushlardan ancha qadrlisizlar!

²⁵Birontangiz tashvishlanib, umringizni bir lahzaga bo‘lsa ham uzaytira olarmidingiz?!

²⁶Shunday arzimas ish qo‘lingizdan kelmas ekan, nega qolgan narsalar haqida tashvish tortasiz?

²⁷Nilufar gullarning qanday o‘sishiga e’tibor qiling: ular mehnat qilmaydi, ip yigirmaydi. Ammo sizlarga aytamanki, hatto shoh Sulaymon o‘zining shuhrat cho‘qqisida ham o‘sha gullarning biriday kiyinmagan.

²⁸Bugun bor, ertaga esa o‘choqqa tashlanadigan dala o‘tini Xudo shunday bezagan bo‘lsa, nahotki sizlarni kiyintirmasa, ey imoni sustlar!

²⁹Nima yeymiz, nima ichamiz, deb qayg‘urib bezovta bo‘lmanglar.

³⁰Dunyo xalqlari hadeb bu narsalarning payida yuradilar. Lekin osmondagi Otangiz bularga muhtoj ekaningizni biladi–ku!

³¹Sizlar, yaxshisi, Xudoning Shohligi payida bo‘linglar va qolgan narsalar ham sizga beriladi.

³²Ey kichik suruv, qo‘rqmanglar! Osmondagi Otangiz O‘z Shohligini sizlarga berishni ma’qul topdi.

³³Mol–mulkingizni sotib, sadaqa beringlar. O‘zingizga eskirmaydigan hamyonlar, samolarda bitmas–tuganmas xazina tayyorlanglar. U yerga o‘g‘ri yaqinlasha olmaydi, xazinangizni kuya yeya olmaydi.

³⁴Xazinangiz qayerda bo‘lsa, yuragingiz ham o‘sha yerda bo‘ladi.”

³⁵“Har doim tayyor holda turinglar: belbog‘laringiz belingizda bog‘langan, chiroqlaringiz yonib turgan bo‘lsin!

³⁶Sizlar xo‘jayinining to‘ydan qaytishini intizorlik bilan kutgan xizmatkorlarday bo‘linglar. Xo‘jayin kelib, eshikni taqillatishi bilanoq eshikni ochadigan bo‘linglar.

³⁷Xo‘jayin kelganda hushyor turgan xizmatkorlar baxtlidir! Sizlarga chinini aytay: xo‘jayin belini bog‘lab, xizmatkorlarini dasturxonga o‘tqazadi va ularga o‘zi xizmat qiladi.

³⁸Xo‘jayin yarim tunda keladimi yoki tongga yaqin keladimi, xizmatkorlarini hushyor holda ko‘rsa, o‘sha xizmatkorlar naqadar baxtlidir!

³⁹Ammo shuni bilib qo‘yingki, agar uy egasi o‘g‘rining qachon kelishini bilganda edi, uyiga buzib kirishga o‘g‘riga yo‘l qo‘ymagan bo‘lardi.

⁴⁰Shuningdek, sizlar ham tayyor turinglar, chunki Inson O‘g‘li sizlar kutmagan vaqtda keladi.”

⁴¹Shu payt Butrus so‘radi: — Hazrat, bu masalni faqat bizga aytyapsizmi yo hammagami?

⁴²Rabbimiz Iso shunday javob berdi: — Ishonchli va aqlli uy boshqaruvchisi kim? Xo‘jayin bunday odamni o‘z xizmatkorlariga boshliq qilib qo‘yadi, ularga o‘z vaqtida ovqat tarqatishni unga topshiradi.

⁴³Xo‘jayin uyga qaytganda o‘sha xizmatkorini yumush ustida ko‘rsa, xizmatkor naqadar baxtli!

⁴⁴Sizlarga chinini aytay: xo‘jayin o‘sha xizmatkorini butun mulki ustidan boshqaruvchi qilib qo‘yadi.

⁴⁵Ammo o‘sha xizmatkor o‘ziga: “Xo‘jayinim kechikib keladi”, deb boshqa xizmatkorlarni ura boshlasa, yeb–ichib, mast bo‘lsa,

⁴⁶xizmatkor kutmagan kunda, o‘ylamagan soatda xo‘jayini kelib qoladi, xizmatkorini tilka–pora qiladi, boshiga sadoqatsizlarning kunini soladi.

⁴⁷Xo‘jayinning xohishini bilgan, ammo hozirlik ko‘rmagan va uning xohishini bajarmagan xizmatkor ko‘p kaltak yeydi.

⁴⁸Bilmay turib jazoga munosib ish qilgan xizmatkor esa ko‘p kaltaklanmaydi. Kimga ko‘p berilgan bo‘lsa, undan ko‘p so‘raladi. Kimga ko‘p ishonib topshirilgan bo‘lsa, undan ko‘proq talab qilinadi.”

⁴⁹“Men yer yuziga olov keltirgani keldim. Qaniydi, bu olov hoziroq alanga olib ketsa!

⁵⁰Men chuqur qayg‘u–alamlarga botaman. Bu amalga oshmaguncha qattiq iztirob chekaman!

⁵¹Meni yer yuziga tinchlik olib kelgan, deb o‘ylaysizlarmi? Yo‘q, deb aytaman, bo‘linish olib kelganman!

⁵²Zero, bundan buyon bir uyda yashagan besh kishi bo‘linadi, uchtasi ikkitasiga va ikkitasi uchtasiga qarshi bo‘ladi.

⁵³Ha, ular bo‘linadi: Ota o‘g‘liga qarshi chiqadi, O‘g‘il otasiga qarshi bo‘ladi, Ona qiziga qarshi chiqadi, Qiz onasiga qarshi bo‘ladi, Qaynana keliniga qarshi chiqadi, Kelin qaynanasiga qarshi bo‘ladi.”

⁵⁴Iso olomonga shunday dedi: — G‘arbda bulut ko‘tarilib kelayotganini ko‘rganingizda, sizlar darrov: “Hozir yomg‘ir yog‘adi”, deb aytasizlar. Shunday bo‘ladi ham.

⁵⁵Janubdan shamol esayotganini ko‘rganingizda, sizlar: “Jazirama issiq bo‘ladi”, deb aytasizlar. Shunday bo‘ladi ham.

⁵⁶Ey ikkiyuzlamachilar! Sizlar yeru osmonning avzoyiga qarab, ob–xavoni aniqlay olasizlar–ku! Nima uchun hozirgi zamonni talqin qila olmaysizlar?!

⁵⁷Nima to‘g‘riligini nega o‘zingiz qaror qila olmaysizlar?

⁵⁸Shunday ekan, birontasi bilan da’volashib, u bilan birga mahkamaga ketayotaningizda, yo‘lda u bilan yarashishga harakat qiling. Agar shunday qilmasangiz, u sizni qozining oldiga sudrab boradi, qozi sizni zindonbonga topshiradi. Zindonbon esa sizni zindonga tashlaydi.

⁵⁹Sizlarga shuni aytay: qarzingizni oxirgi tiyinigacha to‘lamaguningizcha, u yerdan chiqolmaysiz.