Read O‘zbek tilidagi Muqaddas Kitob, 2013 Luqo 14 Bible Online

Luqo 14 - O‘zbek tilidagi Muqaddas Kitob, 2013 bible

Luqo 14

¹Bir Shabbat kuni Iso farziylar rahnamolaridan birining uyiga mehmonga bordi. Uni diqqat bilan kuzatib o‘tirishardi.

²Isoning oldiga istisqo dardidan qo‘l–oyoqlari shishib ketgan bir odam kelib qoldi.

³Iso Tavrot tafsirchilaridan va farziylardan so‘radi: — Qonunimizga ko‘ra Shabbat kuni odamga shifo berish mumkinmi yoki yo‘qmi?

⁴Ular esa indamadilar. Iso xasta odamga qo‘l tekkizib, shifo berdi va uni jo‘natib yubordi.

⁵So‘ng ularga dedi: — Birortangizning farzandingiz yoki molingiz quduqqa tushib ketsa, Shabbat kuni bo‘lishiga qaramay, uni darhol chiqarib olmaysizlarmi?!

⁶Ular esa bu gapga biron javob topa olmadilar.

⁷Mehmonlar to‘rdan joy tanlashga intilayotgan edilar. Iso buni ko‘rib, shunday masal aytdi:

⁸“Sizni to‘y ziyofatiga taklif qilishganda, to‘rga chiqib olmang. Mehmonga chaqirilganlar orasida sizdan ham hurmatliroq boshqasi bo‘lishi mumkin.

⁹Ikkovingizni taklif qilgan mezbon kelib, sizga: “Joyingizni bu odamga bo‘shatib bering”, deb aytishi mumkin. Shunda siz xijolat tortib, poygakda o‘tirishga majbur bo‘lasiz.

¹⁰Shuning uchun, taklif etilganingizda, poygakda o‘tiring, toki mezbonning o‘zi kelib sizga: “Do‘stim, iltimos to‘rga chiqing”, — deb aytsin. Shunda boshqa mehmonlar ko‘zida sizning hurmatingiz oshadi.

¹¹Zotan, o‘zini o‘zi yuksaltirgan kamsitiladi, o‘zini past tutgan esa yuksaltiriladi.”

¹²Iso O‘zini taklif qilgan xonadon sohibiga aytdi: “Tushki yo kechki ziyofat berganingizda, do‘stlaringizni yoki aka–ukalaringizni, qarindosh–urug‘laringizni yo bo‘lmasa, boy qo‘shnilaringizni taklif qilmang. Aks holda, ular ham sizni mehmonga chaqirib, qilgan yaxshiligingizni qaytaradilar.

¹³Aksincha, ziyofat berganingizda, kambag‘al–qashshoqlarni, cho‘loq, shollarni, ko‘rlarni taklif qiling.

¹⁴Shunda baxtli bo‘lasiz. Chunki ular qilgan yaxshiligingizni qaytara olmasalar–da, solihlar tirilgan zamonda buning savobini ko‘rasiz.”

¹⁵Dasturxon atrofida o‘tirgan mehmonlardan biri Isoning bu so‘zlarini eshitib, Unga dedi: — Xudoning Shohligida ziyofat yeydigan kishi baxtlidir!

¹⁶Iso o‘sha odamga shunday dedi: “Bir odam katta ziyofat tayyorlab, ko‘pchilikni taklif etibdi.

¹⁷Ziyofat vaqti bo‘lganda: — Kelinglar, dasturxon tayyor bo‘ldi, — deb mehmonlarni chaqirgani xizmatkorini yuboribdi.

¹⁸Ammo taklif qilinganlarning hammasi birday uzr so‘ray boshlabdilar. Birinchisi unga debdi: — Men yer sotib olgan edim, o‘sha yerni ko‘rgani borishim kerak. Iltimos, meni kechiring.

¹⁹Boshqasi esa: — Men besh juft ho‘kiz sotib oldim, ularni sinagani ketyapman. Iltimos, meni kechiring, — debdi.

²⁰Yana boshqasi: — Men yangi uylandim, shuning uchun bora olmayman, — debdi.

²¹Xizmatkor qaytib kelib, xo‘jayiniga axborot beribdi. Shunda uy sohibi g‘azablanib, xizmatkoriga buyuribdi: — Hoziroq shahar ko‘chalarini, yo‘laklarini aylanib chiq. Qashshoq, cho‘loq, ko‘r va shollarni bu yerga olib kel.

²²Biroz vaqtdan keyin xizmatkor shunday deb keldi: — Xo‘jayin, buyurganlaringizni bajardim, lekin yana bo‘sh joy qoldi.

²³Shunda xo‘jayin xizmatkoriga aytibdi: — Yo‘llarga, yo‘laklarga bor, odamlarni ko‘ndirib olib kel, toki uyim to‘lsin.

²⁴Sizlarga aytay, taklif qilinganlarning birortasi ham ziyofatimdan totib ko‘rmaydi.”

²⁵Katta bir olomon Isoga ergashib ketayotgan edi. Iso ularga qarab dedi:

²⁶“Menga ergashgan odam Meni ota–onasidan, aka–uka va opa–singillaridan, hatto o‘z jonidan ortiq yaxshi ko‘rishi kerak, aks holda u Mening shogirdim bo‘lolmaydi.

²⁷O‘z xochini ko‘tarib, ortimdan yurmagan odam ham Mening shogirdim bo‘lolmaydi.

²⁸Sizlardan birortangiz minora qurmoqchi bo‘lsangiz, uni bitirish uchun mablag‘ yetarlimi, deb oldindan xarajatini hisoblab chiqmaysizmi?

²⁹Aks holda, siz poydevor yotqizasizu minorani bitkaza olmaysiz. Buni ko‘rganlarning hammasi ustingizdan kulib, shunday deb aytishadi:

³⁰“Bu odam qurilishni boshladi, ammo bitira olmadi.”

³¹Yoki qaysi shoh boshqa bir shohga qarshi urushga chiqishdan avval o‘tirib: “Dushman yigirma ming askari bilan menga qarshi kelyapti, men o‘n ming askarim bilan unga bas kela olamanmi?” deb o‘ylamaydimi?!

³²Kuchi yetmasa, dushman hali uzoqdaligida uning oldiga elchi yuborib, sulh tuzaylik, deb iltimos qiladi.

³³Xuddi shu singari, bor mol–mulkingizdan kechmasangiz, birontangiz ham Mening shogirdim bo‘la olmaysiz.

³⁴Tuz — yaxshi narsa. Lekin tuz o‘z ta’mini yo‘qotsa, uni yana qanday sho‘r qilib bo‘ladi?

³⁵Bunday tuz yerga ham, go‘ngga ham yaramaydi, uni tashlab yuboradilar. Kimning eshitar qulog‘i bo‘lsa, eshitsin!”