Read O‘zbek tilidagi Muqaddas Kitob, 2013 Luqo 16 Bible Online

Luqo 16 - O‘zbek tilidagi Muqaddas Kitob, 2013 bible

Luqo 16

¹Iso shogirdlariga shunday dedi: “Bir boy odamning ish boshqaruvchisi bor ekan. Boyga: “Ish boshqaruvchingiz mol–mulkingizni sovurib yuribdi” degan xabar yetib keldi.

²Boy odam ish boshqaruvchisini chaqirib, unga shunday debdi: “Sen haqingda ba’zi gaplarni eshitdim. Bu nimasi?! Menga boshqaruving to‘g‘risida hisobot ber, endi ishlarimni sen boshqarmaysan.”

³Shunda ish boshqaruvchi o‘ziga o‘zi debdi: “Xo‘jayinim meni ishdan bo‘shatyapti. Endi nima qilaman? Yer chopishga kuchim yetmaydi, sadaqa so‘rashga uyalaman.

⁴Eha, topdim! Bir ish qilaman, shunda bo‘shatilganimdan keyin odamlar uylarining eshiklarini men uchun ochib berishadi”, — debdi–da,

⁵xo‘jayinning qarzdorlarini bittama–bitta chaqiribdi. Birinchisidan so‘rabdi: — Xo‘jayinimdan qancha qarzing bor?

⁶— Yuz ko‘za zaytun moyi, — deb javob beribdi u. — Tilxatingni ol, tezda o‘tirib ellik ko‘za deb yoz! — debdi unga ish boshqaruvchi.

⁷Keyin boshqasidan ham so‘rabdi: — Sening qancha qarzing bor? — Yuz qop bug‘doy, — deb javob beribdi u. Unga ham: — Tilxatingni ol, sakson qop deb yoz! — debdi ish boshqaruvchi.

⁸Ha, ayyor ish boshqaruvchi ishini boplab bajardi! Chindan ham bu dunyoning odamlari zamondoshlari orasida nur ahliga karaganda o‘z ishiga ancha pishiqdirlar.

⁹Men sizlarga aytaman, bu dunyoning boyligidan foydalanib do‘st orttiringlar, toki bu boylik tugagach, Xudo sizni abadiy maskaniga qabul qilsin.

¹⁰Kichik ishda sadoqatli bo‘lgan odam katta ishda ham sadoqatli bo‘ladi. Kichik ishda sadoqatsiz bo‘lgan esa katta ishda ham sadoqatsiz bo‘ladi.

¹¹Agar sizga bu dunyoning boyligini ishonib topshirib bo‘lmasa, kim sizga haqiqiy boylikni ishonib topshiradi?!

¹²Agar sizga boshqalarning narsasini ishonib topshirib bo‘lmasa, o‘zingizga atalgan narsani sizga kim beradi?!

¹³Hech qanday xizmatkor ikki xo‘jayinga xizmat qilolmaydi. U yo birini yomon ko‘rib, boshqasini yaxshi ko‘radi, yoki biriga bag‘ishlanib, boshqasini mensimaydi. Sizlar ham Xudoga, ham boylikka birdek xizmat qila olmaysizlar.”

¹⁴Pulparast farziylar bularni eshitib, Isoni mazax qildilar.

¹⁵Iso ularga dedi: “Siz odamlar oldida o‘zingizni taqvodor qilib ko‘rsatasizlar, lekin Xudo yuragingizni biladi. Odamzod ko‘kka ko‘targan narsalar Xudoning nazarida jirkanchdir.

¹⁶Yahyo va undan oldin kelganlar Tavrot va payg‘ambarlar bitiklarini e’lon qilganlar. Endi esa Xudoning Shohligi to‘g‘risidagi Xushxabar e’lon qilinmoqda va har bir odam bu Shohlikka kirishga undalmoqda.

¹⁷Biroq Tavrotdan bir nuqtaning yo‘qolishidan ko‘ra, yeru osmonning yo‘qolishi osonroqdir.

¹⁸Kim o‘z xotini bilan ajrashib boshqasiga uylansa, zino qilgan bo‘ladi. Shuningdek, eri bilan ajrashgan xotinga uylangan kishi ham zino qilgan bo‘ladi.”

¹⁹“Bir boy odam bor ekan. U qimmatbaho liboslar kiyib yurar, har kuni dabdabali hayot kechirar ekan.

²⁰Boyning darvozasi oldida butun badaniga yara toshgan Lazar ismli bir qashshoq gadoy yotar ekan.

²¹U boy dasturxonidan to‘kilgan ushoqlar bilan qorin to‘ydirishni orzu qilar ekan. Itlar kelib uning yaralarini yalab ketar ekan.

²²Bir kuni gadoy o‘lib qolibdi, farishtalar uni Ibrohimning yoniga olib ketibdilar. Keyin boy ham o‘lib, dafn qilinibdi.

²³Jahannamda azob chekayotgan boy boshini ko‘tarib, uzoqda Ibrohimni va uning yonidagi Lazarni ko‘ribdi.

²⁴So‘ng shunday deb faryod qilibdi: — Ey Ibrohim ota! Menga rahm qilib Lazarni yuboring. U barmog‘ining uchini suvga botirib, tilimga tomizsin. Bu alanga ichida azob chekyapman!

²⁵Ibrohim unga shunday javob beribdi: — Unutma, o‘g‘lim, sen hayotligingda hamma yaxshi narsalaringni olib bo‘lding, Lazar esa faqat yomonlik ko‘rdi. Endi u bu yerda tasalli topyapti, sen bo‘lsang, azob chekyapsan.

²⁶Bundan tashqari, sen bilan bizning oramizda tubsiz jarlik bor. Bu yerdan siz tomonga o‘tmoqchi bo‘lganlar o‘ta olmaydilar va u yerdan biz tomonga ham o‘tmaydilar.

²⁷Shunda boy aytibdi: — Unday bo‘lsa, ey ota, sizdan o‘tinib so‘rayman, Lazarni otamning uyiga yuboring.

²⁸Mening beshta ukam bor. Ular ham bu azobli joyga kelmasliklari uchun ularni ogohlantirib qo‘ysin.

²⁹Ibrohim javob beribdi: — Ularda Musoning va payg‘ambarlarning bitiklari bor–ku, o‘shalarga quloq solishsin.

³⁰Boy esa: — Yo‘q, Ibrohim ota, ular quloq solmaydilar. Ammo o‘liklardan biri ularning oldiga borsa, o‘shanda tavba qiladilar, — debdi.

³¹Ibrohim shunday debdi: — Agar Muso va boshqa payg‘ambarlarning so‘zlariga quloq solmagan bo‘lsalar, o‘liklardan biri tirilib borsa ham ishonmaydilar.