Read O‘zbek tilidagi Muqaddas Kitob, 2013 Luqo 20 Bible Online

Luqo 20 - O‘zbek tilidagi Muqaddas Kitob, 2013 bible

Luqo 20

¹Bir kuni Iso Ma’badda xalqqa ta’lim berib, Xushxabar aytayotgan edi. Shu payt bosh ruhoniylar, Tavrot tafsirchilari va oqsoqollar kelib qoldilar.

²Ular Isodan so‘radilar: — Bizlarga ayting–chi, Siz bu ishlarni qanday hokimiyat bilan qilyapsiz? Bu hokimiyatni Sizga kim bergan?

³Iso ularga shunday javob berdi: — Men ham sizlarga bir savol berayin, Menga aytinglar:

⁴Yahyo xalqni suvga cho‘mdirish huquqini Xudodan olganmidi yoki insondanmi?

⁵Ular esa o‘zaro mulohaza yuritdilar: “Agar Xudodan desak, U: “Nega Yahyoga ishonmadingizlar?” — deydi.

⁶Agar insondan desak, butun xalq bizni toshbo‘ron qiladi, chunki xalq Yahyoning payg‘ambarligiga qat’iy ishonadi.”

⁷Shunday qilib, ular: — Qayerdanligini bilmaymiz, — deb javob berdilar.

⁸Iso ularga dedi: — Unday bo‘lsa, Men ham bu ishlarni qaysi hokimiyat bilan qilayotganimni sizlarga aytmayman.

⁹Iso xalqqa quyidagi masalni aytdi: “Bir odam uzumzor barpo qilibdi. Uzumzorni bog‘bonlarga ijaraga berib, o‘zi uzoq vaqtga safarga ketibdi.

¹⁰Yig‘im–terim mavsumida, uzumzor hosilidan tegishli ulushini olish uchun o‘sha odam xizmatkorini bog‘bonlar oldiga yuboribdi. Ammo bog‘bonlar xizmatkorni kaltaklab, qup–quruq qaytarib yuborishibdi.

¹¹Keyin uzumzor egasi yana boshqa bir xizmatkorini yuboribdi. Bog‘bonlar bu xizmatkorni ham urib, sharmanda qilib, qup–quruq qaytarib yuborishibdi.

¹²Yana uchinchisini yuboribdi, uni ham yarador qilib, quvib chiqarishibdi.

¹³Keyin uzumzor egasi o‘ylabdi: “Endi nima kilsam ekan? Endi suyukli o‘g‘limni yuboraman. Balki bog‘bonlar uni hurmat qilishar.”

¹⁴Ammo bog‘bonlar uning o‘g‘lini ko‘rishlari bilan o‘zaro muhokamaga tushib: — Bu merosxo‘r–ku! Uni o‘ldiraylik, shunda merosi bizga qoladi, — deyishibdi–da,

¹⁵o‘g‘lini uzumzordan tashqariga chiqarib, o‘ldirishibdi. Xo‘sh, sizningcha, endi uzumzor egasi ularni nima qilar ekan?

¹⁶U kelib bog‘bonlarni o‘ldiradi, uzumzorini esa boshqalarga ijaraga beradi.” Buni eshitganlar: — Xudo ko‘rsatmasin! — deb yuborishdi.

¹⁷Iso esa ularga tikilib, shunday dedi: — Unday bo‘lsa, Muqaddas Bitiklardagi: “Binokorlar rad etgan tosh Binoning tamal toshi bo‘ldi”, degan so‘zlarning ma’nosi nima?

¹⁸Kimki bu toshga yiqilsa, parcha–parcha bo‘ladi. Tosh kimning ustiga tushsa, uni ezib yuboradi.

¹⁹Iso aytgan bu masal tafsirchilar bilan bosh ruhoniylarga qarshi aytilgan edi. Ular buni anglab yetdilar va shu zahoti Isoni qo‘lga olmoqchi bo‘ldilar. Ammo xalqdan qo‘rqdilar.

²⁰Tafsirchilar bilan bosh ruhoniylar Isoni kuzatib yurdilar. Uning ortidan o‘zlarini samimiy ko‘rsatadigan odamlarni qo‘ydilar. Ular esa Isoni tilidan ilintirib, hokimning qo‘liga va hukmiga bermoqchi edilar.

²¹Shuning uchun ular Isoga dedilar: — Ustoz, siz aytayotgan so‘zlaringiz va o‘rgatayotgan ta’limotingiz to‘g‘ri ekanini bilamiz. Siz hech kimga yuz–xotir qilmay Xudoning yo‘lini to‘g‘ri o‘rgatasiz.

²²Ayting–chi, Qaysarga soliq to‘lashimiz to‘g‘rimi yoki yo‘qmi?

²³Iso ularning makkorligini anglab, dedi:

²⁴— Qani, Menga bir dinor ko‘rsatinglar! Bu tangadagi surat va yozuv kimniki? — Qaysarniki, — deb javob berdi ular.

²⁵Iso: — Unday bo‘lsa, Qaysarning haqini Qaysarga, Xudoning haqini Xudoga beringlar, — dedi.

²⁶Ular xalqning ko‘z o‘ngida Isoni tilidan ilintira olmadilar. Isoning javobidan lol qolib, jim bo‘ldilar.

²⁷Sadduqiylar o‘liklarning tirilishini inkor etardilar. Ularning ba’zilari Isoning oldiga kelib, xalq oldida Unga shunday savol berdilar:

²⁸— Ustoz! Muso bizga shunday yozib qoldirgan: “Agar birovning akasi farzand ko‘rmay o‘tib ketsa, ukasi akasining xotiniga uylanib, akasi uchun farzandni dunyoga keltirsin. Tug‘ilgan bola marhum akasiniki hisoblanadi.”

²⁹Yetti aka–uka bo‘lgan ekan. Birinchisi uylanibdi, ammo farzand ko‘rmay olamdan o‘tibdi.

³⁰So‘ng ikkinchisi o‘sha xotinni olib, bola ko‘rmay o‘libdi.

³¹Uchinchisi ham xuddi shu ko‘yga tushibdi. Xullas, yettita aka–ukaning hammasi o‘sha xotinga uylanib, farzandsiz o‘tib ketibdi.

³²Oxiri, xotin ham o‘libdi.

³³Ayting–chi, Xudo odamlarni tiriltirganda o‘sha ayol qaysi birining xotini hisoblanadi? Yettovi ham unga uylangan edilar–ku!

³⁴Iso ularga shunday javob berdi: — Bu dunyoda odamlar uylanadilar va erga tegadilar.

³⁵Ammo o‘likdan tirilishga va kelajakdagi dunyoda yashashga sazovor bo‘lganlar u dunyoda uylanmaydilar, erga ham tegmaydilar.

³⁶Ular bamisoli farishtalarday bo‘lganlari uchun, hech qachon o‘lmaydilar. Ular Xudoning bolalaridir, chunki tirilgandirlar.

³⁷Hatto Musoning o‘zi ham tirilishni tasdiqlab, yonayotgan buta to‘g‘risidagi hikoyada Egamizni — Ibrohim, Is’hoq va Yoqubning Xudosi deb atagan.

³⁸Zotan Xudo o‘liklarning emas, tiriklarning Xudosidir. Xudo uchun hamma tirikdir.

³⁹[39-40] Tafsirchilarning ba’zilari Isoga yana savol berishga jur’at etmaganlari uchun: — Ustoz, yaxshi gapirdingiz, — dedilar. Iso tafsirchilarga dedi:

⁴⁰

⁴¹“Nega Masihni Dovudning o‘g‘li deydilar?

⁴²[42-43] Mana, Dovudning o‘zi Zabur kitobida shunday degan: “Egamiz aytmoqda Rabbimga: Dushmanlaringni oyoqlaring ostiga poyandoz qilmagunimcha, Sen Mening o‘ng tomonimda o‘tirgin.”

⁴³

⁴⁴Demak, Dovud Masihni Rabbim deb atagan bo‘lsa, qanday qilib Masih Dovudning o‘g‘li bo‘ladi?!”

⁴⁵Butun xalq Isoni tinglab turar ekan, U shogirdlariga dedi:

⁴⁶“Tavrot tafsirchilaridan ehtiyot bo‘linglar! Ular uzun kiyimlar kiyishni, bozorlarda yurganlarda ularga salom berishlarini yaxshi ko‘radilar. Sinagogalarda yaxshi joylarda o‘tirishni, ziyofatlarda to‘rda o‘tirishni yoqtiradilar.

⁴⁷Ammo beva ayollarning uy–joylarini tortib oladilar, xo‘ja ko‘rsinga uzoq duo o‘qiydilar. Bunday odamlar nihoyatda qattiq jazoga mubtalo bo‘ladilar.”