Read O‘zbek tilidagi Muqaddas Kitob, 2013 Luqo 21 Bible Online

Luqo 21 - O‘zbek tilidagi Muqaddas Kitob, 2013 bible

Luqo 21

¹Iso Ma’badning ehson qutisiga nazar solar ekan, ehson tashlab turgan boy odamlarni ko‘rdi.

²Shuningdek, ikki chaqa tashlagan bir kambag‘al beva ayolni ham ko‘rdi.

³Shunda Iso dedi: “Sizlarga chinini aytayin, bu kambag‘al beva hammadan ko‘proq ehson berdi.

⁴Chunki boylarning hammasi o‘zlarining ortiqcha pullaridan ehson qildilar. Ammo bu ayol kambag‘alligiga qaramasdan, o‘zining bor–yo‘g‘ini tashladi.”

⁵Shogirdlardan ba’zilari Ma’badning go‘zal toshlar va Xudoga nazr qilingan in’omlar bilan bezatilgani to‘g‘risida gaplashayotgan edilar. Shunda Iso dedi:

⁶— Shunday kunlar keladiki, siz ko‘rib turganlarning hammasi vayron bo‘ladi. Bu yerda tosh ustida turgan bironta tosh qolmaydi.

⁷Ular Isodan so‘radilar: — Ustoz, bu hodisalar qachon yuz beradi? Tez orada yuz berishini nimadan bilsak bo‘ladi?

⁸Iso dedi: — Ehtiyot bo‘linglar, yo‘ldan ozmanglar, chunki ko‘pchilik o‘zlarini Mening nomim bilan atab: “Men O‘shaman”, “Vaqt yaqin”, deb aytadi. Ularga ergashmanglar.

⁹Sizlar urush va isyonlar to‘g‘risida xabarlarni eshitganingizda, vahimaga tushmanglar, chunki bu hodisalar birinchi bo‘lib sodir bo‘lishi kerak. Ammo bu hali so‘nggi nihoya emas.

¹⁰Keyin Iso ularga dedi: “Xalq xalqqa qarshi, shohlik shohlikka qarshi ko‘tariladi.

¹¹Ayrim joylarda shiddatli zilzilalar, qahatchiliklar, o‘latlar bo‘ladi. Osmonda vahimali hodisalar, buyuk alomatlar yuz beradi.

¹²Lekin bularning hammasidan oldin sizlarni hibsga oladilar, quvg‘in qiladilar, sinagogalarga topshirib, qamoqlarga tashlaydilar. Mening nomim tufayli sizlarni shohlar va hokimlar oldiga olib boradilar.

¹³Bular Xushxabarni aytishingiz uchun imkoniyat bo‘ladi.

¹⁴O‘zimizni qanday himoya qilamiz, deb oldindan qayg‘urmaslikka qaror qilinglar.

¹⁵Men O‘zim sizlarga so‘z, donolik ato qilamanki, raqiblaringizdan birontasi aytganlaringizni rad qila olmaydilar yoki e’tiroz bildira olmaydilar.

¹⁶Sizlarni hatto ota–onangiz, aka–ukalaringiz, qarindosh–urug‘laringiz, do‘stlaringiz tutib berishadi. Ular ba’zilaringizni o‘ldirishadi.

¹⁷Mening nomim tufayli hamma sizlardan nafratlanadi.

¹⁸Biroq boshingizdan bir tola soch ham tushmaydi.

¹⁹Qat’iyatli bo‘linglar, shunda hayotga erishasiz.”

²⁰“Quddusni dushman lashkarlari o‘rab olganini ko‘rganingizda, bilingki, shahar yaqin orada vayron qilinadi.

²¹Shunda Yahudiyada bo‘lganlar tog‘larga qochsin, shaharning ichida bo‘lganlar tashqariga chiqsin, dalalarda bo‘lganlar shaharga kirmasin.

²²Chunki Xudoning qasos oladigan kunlari keldi. O‘sha kunlarda hamma bashoratlar amalga oshadi.

²³U kunlarda homilador va emizikli ayollarning holiga voy! Chunki yer yuzini katta musibat chulg‘ab oladi, bu xalqning boshiga Xudoning g‘azabi yog‘iladi.

²⁴Ba’zilari qilichdan o‘tkaziladi, boshqalari barcha yurtlarga asir qilib olib ketiladi. G‘ayriyahudiylarning davru davroni tugamaguncha, ular Quddusni oyoq osti qiladilar.”

²⁵“Quyosh, oy va yulduzlarda alomatlar paydo bo‘ladi. Dengizlar va to‘lqinlar shovqinidan xalqlar sarosimaga tushib, iztirob chekadi.

²⁶Odamlar dunyoga keladigan falokatlarni ko‘rib, qo‘rquvdan hushidan ketadilar. Chunki o‘shanda samoviy kuchlar larzaga keladi.

²⁷Shunda hamma odam Inson O‘g‘lini ko‘radi. Inson O‘g‘li qudratga va buyuk ulug‘vorlikka burkanib, bulutlarda keladi.

²⁸Bu hodisalar yuz bera boshlaganda, turib, boshingizni baland ko‘taring. Chunki qutqariladigan vaqtingiz yaqinlashmoqda.”

²⁹Iso shogirdlariga bir masalni aytib berdi: “Anjir daraxtiga va boshqa hamma daraxtlarga qaranglar.

³⁰Daraxtlar barg yozayotganini ko‘rganingizda, yoz yaqinlashib qolganini bilasiz.

³¹Shu singari, mana bu voqealar sodir bo‘lganda, bilingki, Xudoning Shohligi yaqin.

³²Sizlarga chinini aytayin, bu nasl o‘tmasdanoq, bularning hammasi sodir bo‘ladi.

³³Yeru osmon yo‘q bo‘lib ketadi, ammo Mening so‘zlarim kuchda qoladi.

³⁴Hushyor bo‘linglar! Kayfu safoga, bu hayotning tashvishlariga berilib ketmanglar. Tag‘in o‘sha kun kelib qolganda sizlar to‘satdan to‘rga tushgan odamlarga o‘xshab qolmanglar!

³⁵Chunki u kun butun yer yuzida yashovchilarning boshiga tushadi.

³⁶Doim hushyor bo‘linglar. Yuz beradigan bu hamma musibatlardan qutula olishingiz va Inson O‘g‘li oldida munosib tura olishingiz uchun doimo ibodatda bo‘linglar.”

³⁷Har kuni Iso Ma’badda ta’lim berardi, kechalari esa shahardan chiqib, tunni Zaytun deb ataladigan tog‘da o‘tkazar edi.

³⁸Xalq sahardan Isoni tinglagani Ma’badga kelardi.