Read O‘zbek tilidagi Muqaddas Kitob, 2013 Luqo 23 Bible Online

Luqo 23 - O‘zbek tilidagi Muqaddas Kitob, 2013 bible

Luqo 23

¹Butun Kengash a’zolari turib, Isoni Pilatning oldiga keltirdilar.

²Ular Isoni ayblay boshladilar: — Biz bu Odamni xalqimizni yo‘ldan ozdirayotganda ushlab oldik. U, Qaysarga soliq to‘lamanglar, Men Masihman, shohman, deb aytib yuribdi.

³Pilat Isodan: — Sen yahudiylarning shohimisan? — deb so‘radi. — Siz shunaqa deysiz, — deb javob berdi Iso.

⁴Shunda Pilat bosh ruhoniylarga va olomonga: — Men bu odamni ayblashga hech qanday sabab ko‘rmayapman, — dedi.

⁵Ammo ular qattiq turib oldilar: — U O‘z ta’limoti bilan butun Yahudiyadagi odamlarni qo‘zg‘olonga da’vat qilyapti. U bu qilmishini Jalilada boshlagandi, endi shu yerga ham yetib kelibdi.

⁶Pilat bu gapni eshitib: — Bu Odam Jalilalikmi? — deb so‘radi.

⁷Iso Hirodning qo‘l ostidagi hududdan ekanini Pilat bilgach, Uni Hirod huzuriga jo‘natdi. Hirod o‘sha paytda Quddusda edi.

⁸Hirod Isoni ko‘rib, juda xursand bo‘lib ketdi. U anchadan buyon Isoni ko‘rmoqchi bo‘lib yurgan edi. Chunki Hirod Iso haqida eshitgan, Uning biron mo‘jizasini ko‘rsam, degan niyatda edi.

⁹Hirod Isoga ko‘p savollar berdi, ammo Iso hech biriga javob qaytarmadi.

¹⁰Shu yerda turgan bosh ruhoniylar bilan Tavrot tafsirchilari esa Uni shiddat bilan qoraladilar.

¹¹Shundan keyin Hirodning o‘zi ham askarlari bilan birga Isoni kamsitib masxaraladi. Unga shohona chopon kiydirib, Pilatning oldiga qaytarib yubordi.

¹²Bir–biriga dushman bo‘lgan Hirod bilan Pilat o‘sha kuni do‘stlashdilar.

¹³Pilat bosh ruhoniylar, boshliqlar va xalqni chaqirib,

¹⁴ularga dedi: — Sizlar bu Odamni xalqni yo‘ldan ozdirishda ayblab, oldimga olib keldingizlar. Men Uni sizlarning oldingizda tekshirib ko‘rdim. Ammo sizlar Unga qo‘ygan ayblardan birontasini men topmadim.

¹⁵Hirod ham hech nima topolmagani uchun Uni bizning oldimizga qaytarib yubordi. Xullas, bu Odam o‘limga loyiq biron ish qilmagan.

¹⁶[16-17] Shuning uchun, men Uni kaltaklab, ozod qilib yuboraman [1].

¹⁷

¹⁸Xaloyiq esa bir og‘izdan: — Unga o‘lim! Bizga Barabbani ozod qiling! — deb baqira ketishdi.

¹⁹Barabba shaharda yuz bergan isyonda ishtirok etib, qotillik qilgan, shuning uchun zindonga tashlangan edi.

²⁰Pilat Isoni ozod qilmoqchi bo‘lib, olomonga yana murojaat etdi.

²¹Ammo olomon: “Xochga mixlansin! Xochga mixlansin!” deb shovqin ko‘tardi.

²²Pilat uchinchi marta ularga aytdi: — U nima yomonlik qildi, axir?! Men Unda o‘limga loyiq biror ayb topganim yo‘q. Shunday ekan, men Uni kaltaklab, ozod qilib yuboraman!

²³Biroq olomon ovozi boricha: “Iso xochga mixlansin!” deb baqirib, talab qilaverdi. Nihoyat ularning baqir–chaqirlari ustun keldi.

²⁴Pilat ularning talabini bajarishga qaror qildi.

²⁵Olomonning istagiga ko‘ra, isyonda ishtirok etib, qotillik qilgani uchun zindonga tashlangan odamni Pilat ozod qildi, Isoni esa olomonning ixtiyoriga topshirdi.

²⁶Askarlar Isoni olib ketdilar. Ular ketayotganlarida, Shimo‘n degan bir odamni uchratib qoldilar. Shimo‘n Kirineyalik bo‘lib, daladan shaharga qaytib kelayotgan ekan. Askarlar uning yelkasiga xochni ortib, Isoning ketidan borishga majbur qildilar.

²⁷Bir talay olomon Isoning ortidan ergashib kelayotgan edi. Ularning orasida ayollar ham bor edi. Ayollar ko‘ksiga urib, Iso uchun faryod qilardilar.

²⁸Iso ayollarga qarab dedi: — Men uchun yig‘lamanglar, ey Quddus qizlari! O‘zlaringiz uchun, farzandlaringiz uchun yig‘langlar.

²⁹Shunday kunlar keladiki: “Tug‘magan, bola emizmagan, bepusht ayollar baxtlidir”, — deb aytishadi.

³⁰O‘shanda odamlar tog‘larga: “Bizni yashiringlar!” deya baqirishadi. Qirlarga: “Ustimizga qulanglar!” deb yolvorishadi.

³¹Ko‘karib turgan daraxtga shunday qilsalar, qurigan daraxtni nima qilar ekanlar?!

³²Iso bilan birga ikki jinoyatchini ham qatl qilishga olib ketayotgan edilar.

³³Bosh suyagi degan joyga yetib kelganlaridan so‘ng, askarlar Isoni xochga mixladilar. Iso bilan birga ikkita jinoyatchini ham mixladilar, ularning biri Isoning o‘ng tomonida, biri chap tomonida edi.

³⁴Iso: — Ey Ota! Ularni kechirgin, ular nima qilayotganini bilmaydilar, — dedi. Askarlar qur’a tashlab, Isoning kiyimlarini bo‘lishib oldilar.

³⁵Olomon qarab turardi. Boshliqlar esa Isoning ustidan kulib, shunday derdilar: — U boshqalarni qutqarardi. Agar U Xudo tanlagan Masih bo‘lsa, endi O‘zini qutqarib ko‘rsin–chi! — deyishardi.

³⁶Askarlar ham Isoni masxaraladilar. Ular Isoga arzon sharob ichirgani yaqinlashib,

³⁷shunday dedilar: — Agar Sen yahudiylarning Shohi bo‘lsang, O‘zingni O‘zing qutqar–chi!

³⁸Isoning bosh tomonida “Bu Yahudiylarning Shohidir” degan yozuv bor edi.

³⁹Osilgan jinoyatchilardan biri Isoni haqoratlab dedi: — Masih ekansan, O‘zingni ham, bizni ham qutqarmaysanmi?!

⁴⁰Ikkinchi jinoyatchi esa bu sherigiga ta’na qildi: — Xudodan qo‘rqmaysanmi?! O‘zing ham shu odam kabi jazoga mahkum bo‘lgansan–ku!

⁴¹Biz qilmishimizga yarasha adolatli jazo oldik. U esa hech qanday yomonlik qilgani yo‘q.

⁴²Keyin dedi: — Ey Iso, taxtingizga o‘tirib, Shoh bo‘lganingizda meni eslang!

⁴³Iso unga dedi: — Senga chinini aytayin, bugunoq sen Men bilan birga jannatda bo‘lasan.

⁴⁴[44-45] Tush payti edi. Kun qoraydi, soat uchga qadar hamma yoq zulmatga cho‘mdi. Ma’baddagi parda o‘rtasidan yirtildi.

⁴⁵

⁴⁶Iso baland ovoz bilan faryod qildi: — Ota! Ruhimni Sening qo‘llaringga topshiryapman. Shunday dedi–da, jon berdi.

⁴⁷Voqeani ko‘rib turgan yuzboshi Xudoni ulug‘lab: — Haqiqatan ham, bu Odam solih ekan, — dedi.

⁴⁸Tomoshaga to‘plangan olomon sodir bo‘lgan voqealarni ko‘rib, qayg‘udan ko‘ksiga ura–ura uylariga qaytib ketdilar.

⁴⁹Isoni bilganlar esa, shu jumladan, Jaliladan Unga ergashib kelgan ayollar yuz bergan voqealarni uzoqdan kuzatib turardilar.

⁵⁰Oliy kengash a’zolari orasida Yusuf ismli yaxshi va solih bir kishi bor edi.

⁵¹U yahudiylarning Arimateya shahridan bo‘lib, Xudoning Shohligini intizorlik bilan kutardi. Yusuf Kengash a’zolarining bu qarorini va qilgan ishini ma’qullamagan edi.

⁵²U Pilatning oldiga borib, Isoning jasadini so‘radi.

⁵³Yusuf jasadni xochdan tushirib olib, zig‘ir mato bilan kafanladi. Keyin jasadni qoyaga o‘yilgan qabrga qo‘ydi. Bu qabrga hali hech kim qo‘yilmagan edi.

⁵⁴Bu kun Shabbat arafasi bo‘lib, Shabbat kuni boshlanishiga oz qolgandi.

⁵⁵Jaliladan Iso bilan birga kelgan ayollar Yusufning orqasidan ergashib bordilar. Ular qabrni va Isoning jasadi qanday dafn qilinganini ko‘rdilar.

⁵⁶Ular uylariga qaytib borib, jasadga surtish uchun xushbo‘y moylar va atirlar tayyorladilar. Shabbat kuni esa, Qonunda buyurilganday, dam oldilar.